សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ រឿងរ៉ាវឈ្មួញដី និងជាឧកញ៉ាក្លែងក្លាយ សូ សារឹម ភេទប្រុស អាយុ ៣៩ ឆ្នាំ ទិញដីមិនឲ្យលុយគ្រប់ និងលួចដីគេយកទៅចុះបញ្ជីលក់ឲ្យអ្នកដទៃ នៅភូមិរំលេច ឃុំព្រះស្រែ ស្រុកឧដុង្គ ខេត្តកំពង់ស្ពឺទំហំសរុប១០ហិចតា ៣៣៦០ ម៉ែត្រការ៉េ តែដីទិញជាក់ស្ដែងមានតែ ៨ ហិចតា ទើបឃាត់ខ្លួនយកទៅដាក់ពន្ឋនាគារកាលពីពេលថ្មីៗ កន្លងទៅ ពេនេះលេចឮល្ហិចល្ហៀងថា មានអ្នករត់ការដោះលែងហើយ ។ អ្នកដែលរត់ការជាមួយតុលាការ ដើម្បីឲ្យឈ្មោះ សូ សារឹម មានសេរីភាពវិញនោះ ត្រូវបានដឹងថា ម្នាក់ជាក្រុមប្រឹក្សាស្រុកឧដុង្គម្នាក់ទៀត ជាអធិការរងស្រុក ហើយម្នាក់ទៀតជាទាហានផ្កាយ៣ ។
យោងតាមឯកសារដែលភ្នាក់ងារទទួលបាន ១គឺឈ្មោះ តាណយ មានដីស្រែទំហំ ៩៨៩៧ ម៉ែត្រការ៉េ បានព្រមព្រៀងលក់ឲ្យឈ្មោះ សូ សារឹម ក្នុង តម្លៃ ៥,៥ ដុល្លារ មួយម៉ែត្រការ៉េ ឈ្មោះ សូ សារឹម បានកក់ ១០០០០ ដុល្លារ តាំងពីខែ មេសា ឆ្នាំ ២០១៨ បច្ចុប្បន្នហួសការសន្យា ។ ២- ឈ្មោះ ឌុល សត មានដីទំហំ៥៦១៧ ម៉ែត្រការ៉េ លក់ក្នុងតម្លៃ ៥,៥ ដុល្លារ មួយម៉ែត្រការ៉េ តែឈ្មោះ សូ សារឹម បានត្រឹមសួរនាំប៉ុណ្ណោះ ហើយមិនមានប្រាក់កក់នោះទេ ។ ដីរបស់ ឌុល សត ត្រូវ ឈ្មោះសូ សារឹម លួចចុះបញ្ជី (ការលួចចុះបញ្ជីនេះ ម្ចាស់ដីមិនបានដឹងនោះទេ) រួចលក់ឲ្យឈ្មោះ លី ជុន ។
នៅក្នុងការទិញដីទំហំជាង ៨ ហិចតាដែលលក់ទៅឲ្យឈ្មោះ លី ជន នោះ ឈ្មោះសូ សារឹម នៅខ្វះលុយប្រជាពលរដ្ឋ ចំនួន ០៣ គ្រួសារ ផ្សេងទៀត រួមមាន ÷
១-ឈ្មោះ ឆាយ អែម នៅខ្វះ ៦០០០ ដុល្លារ តាំងពីចូលឆ្នាំខ្មែរ ឆ្នាំ២០១៨
២-ឈ្មោះ តែម ឌួង នៅខ្វះ ១៣៥០០ ដុល្លារ តាំងពីចូលឆ្នាំខ្មែរ ឆ្នាំ២០១៨
៣-ឈ្មោះ បុិច នៅខ្វះ ១១០០ ដុល្លារសរុប ២០៦០០ ដុល្លារ ។
តាមការបញ្ជាក់ពីប្រជាពលរដ្ឋ ០៣គ្រួសារខាងលើ និយាយដូចៗគ្នាថា ពួកគាត់បានព្យាយាមជួបជាមួយឈ្មោះសូ សារឹម នៅផ្ទះភូមិអង្រ្គងឃុំព្រះស្រែ ស្រុកឧដុង្គ ដែរតែមិនបានលទ្ធផលទេ ដោយសារតែ សូ សារឹម ចេះតែសន្យាថៃ្ងនេះ ថៃ្ងនោះ ថៃ្ងខ្លះមិនចេញមកជួបទេ នៅពេលទូរស័ព្ទចូល គឺមិនលើកទេ បើលើកបានត្រឹមតែនិយាយថា ចាំជួបគ្នា រវល់ណាស់ នៅជាមួយឧកញ៉ា កំពុងទូទាត់លុយលក់ដី ។
បច្ចុប្បន្នឈ្មោះ សូ សារឹម បានយកដីទំហំ ១០ ហិចតា ៣៣៦០ ម៉ែត្រការ៉េ ទៅចុះបញ្ជីតាំងពីភូមិ ឃុំ ស្រុក ដើម្បីចុះបញ្ជីជាប្រព័ន្ធ រួចរាល់ បានប្រគល់ទៅឲ្យឈ្មោះ លី ជុន អ្នកទិញដី និងបានទទួលប្រាក់គ្រប់ចំនួន តែនៅពេល ឈ្មោះ លី ជុន ទៅកាយព្រំដីតាមបង្គោលដែលបានកំណត់ស្រាប់តែមានប្រជាពលរដ្ឋ ០៥គ្រួសារ ចេញមុខមកអះអាងថា ដីនេះជាកម្មសិទ្ធិរបស់ពួកគាត់ ហេតុអីមកកាយព្រំ ឈ្មោះលី ជុន បានបង្ហាញប្លង់ដឺម៉ាស ដែលមានចុះហត្ថលេខា ពីជំនាញ ភូមិ ឃុំ និង អភិបាលស្រុកឧដុង្គ ជូនពួកគាត់ទើបដឹងថា ដីទំហំ ជាង ១ ហិចតា កន្លះ នៅក្នុងប្លង់រួម (១០ ហិចតា ៣៣៦០ ម៉ែត្រការ៉េ) ឈ្មោះសូ សារឹម មិនទាន់បានទិញពីគេនៅឡើយ ហើយមកបន្លំចុះបញ្ជី ធ្វើឯកសារដើម្បីយកមកលក់ និងទទួលប្រាក់ពីឈ្មោះ លី ជុន ។
ពាក់ព័ន្ឋនឹងការចុះបញ្ជីដីនេះដែរត្រូវបានមន្ត្រីសាលាស្រុកមួយរូបបង្ហើបថា”ដំបូងគេហៅជំនាញចុះទៅវាស់ចេញប្លង់ដឺម៉ាសរួចហើយយកទៅឲ្យអាជ្ញាធរ និងជំនាញចុះបញ្ជីជាប្រព័ន្ឋតាំពីភូមិរហូតដល់ស្រុកទើបយកទៅបង់ពន្ឋប្រថាប់ត្រាដើម្បីរត់ការចេញប្កង់កម្មសីទ្ឋិប្រគល់ទៅឲ្យលីជនជាអ្នកទិញ ។ នៅពេលលីជនចុះកាយព្រំដឹងដល់ម្ចាស់ដីដែល សូ សារឹម លួចដាក់ចូលក្នុងប្លង់ហើយយកទៅចុះប្រព័ន្ឋចេញមុខមករារាំងទើបបែកធ្លាយរឿងតែម្តង ។
បន្ទាប់ពីបែករឿងទើបទាំងអ្នកទិញ និងម្ចាស់ដីដឹងថា ចាញ់បោកបុគ្គលខាងលើ ក៏សម្រេចចិត្តដាក់ពាក្យបណ្តឹងដើម្បីឲ្យសមត្ថកិច្ច និងអ្នកច្បាប់ជួយរកយុត្តិធម៌ រហូតដល់តំណាងអយ្យការចេញដីកា ឃាត់ និងឃុំខ្លួន ។
មហាជនដែលដឹងរឿង បាននាំគ្នានិយាយថា បើសិនជាដីដែលឈ្មោះ សូ សារឹម ធ្វើប្លង់រំលោភយកដីរបស់អ្នកដទៃទៅចុះបញ្ជី ហើយលក់ទៅឲ្យ លី ជន ហេតុអ្វីអាជ្ញាធរតាំងពីភូមិ ឃុំ ស្រុក និងជំនាញសុរិយោដី មិនពិនិត្យឲ្យបានច្បាស់លាស់សិន មុននឹងចុះហត្ថលេខាដាក់ចូលប្រព័ន្ឋដើម្បីធ្វើប្លង់?
មានការលើកឡើងទៀតថា ការងារទាំងនេះ ធ្វើបានទៅដោយរលូន គឺដោយសារតែមានក្រុមប្រឹក្សាស្រុកម្នាក់ ដែលមានសម្ព័ន្ឋភាពជិតស្និទ្ធនឹងគ្នាជាមួយលោក សូ សារឹម ជាអ្នកកាន់ឯកសាររត់ការទើបបានជារឿងដំណើរការទៅដោយរលូនបាន ។ និយាយរួម សមត្ថកិច្ចទាំងនេះបើជំនាញ និងអាជ្ញាធរ មិនធ្វើជាប្រព័ន្ធទេមិនអាចទៅរួចឡើយ ។
ក្នុងនាមពលរដ្ឋស្លូតត្រង់មិនចេះច្បាប់រំពឹងលើ អស់លោកអ្នកច្បាប់ជួយរកយុត្តិធម៌ តែបើសិនជាមកដល់កន្លែងច្បាប់ហើយ មិនអាចរកយុត្តិធម៌បានទៀត មិនដឹងថា ត្រូវរំពឹងលើអ្នកណាឡើយ ។
ហេតុដូច្នេះហើយពួកខ្លួនមានតែ សូមអង្វរដល់លោកចៅក្រមមេត្តា ជួយផ្ដល់យុត្ដិធម៌ជូនប្រជាពលរដ្ឋដែលរងគ្រោះដោយសារអំពើឆបោករបស់ ឧកញ៉ាត្បាញអាយ សូ សារឹម នេះផង បើដោះលែងឲ្យបុគ្គលនេះ នៅក្រៅឃុំ ពួកគាត់ប្រាកដជាមិនអាចទទួលបានយុត្តិធម៌ឡើយ ។ ជាងនេះ ទៅទៀត ឧកញ៉ាក្លែងក្លាយនេះ ច្បាស់ជាមិនរអាចកដីសងពួកគាត់បានទេ ។
ពួកគាត់បានជាបាត់បង់ដី ទៅហើយ សូមលោកចៅក្រមគិតពិចារណារឿងនេះឲ្យច្បាស់សិន ពួកគាត់មិនចង់ចាញ់បោកឈ្មោះ សូ សារឹម ទៀតនោះទេ ។
ចុងក្រោយពលរដ្ឋរងគ្រោះទាំងអ្នកទិញ និងម្ចាស់ដី សូមដល់លោកអភិបាលខេត្ត សូមមេត្តាជួយអន្តរាគមន៍ កុំឲ្យមានការដោះលែងជនសង្ស័យ ព្រោះពួកគាត់មិនទាន់ទទួលបានសំណងសមស្របនៅឡើយទេ ។ បើតាមអ្វីដែលពួកគាត់ទទួលបាន គឺខាងតុលាការនឹងដោះលែង សូ សារឹមនៅពេលឆាប់ៗនេះហើយ ៕ សេនាស័ក្តិ
