ព័ត៌មានទាន់ហេតុការណ៍៖

យន្តហោះទម្លាក់គ្រាប់​អាមេរិក ត្រូវបង្ខំបង្វែទិសដៅ ក្រោយរុស្ស៊ីបញ្ជូន​ Su-27ទៅរារាំង

ចែករំលែក៖

តំបន់ដែនអាកាសរវាងអាមេរិក នឹងរុស្ស៊ី​ ជាតំបន់យុទ្ធសាស្ត្រដ៏សំខាន់បំផុត​ ហើយភាគីទាំងពីរ​តែងតែ មានសកម្មភាព ស៊ើបការណ៍គ្នាទៅវិញទៅវិញទៅមក ។ មិនតែប៉ុណ្ណោះ មានទាំងការបញ្ជូនយន្តហោះ ទម្លាក់គ្រាប់យុទ្ធសាស្ត្រ ហោះចូលកៀកផងដែរ ដើម្បីស្ទាបស្ទង់ពីសម្ថភាពការពារដែនអាកាសរបស់ភាគីនីមួយៗ។

រយៈពេលកន្លងមក​ យន្តហោះទម្លាក់គ្រាប់យុទ្ធសាស្ត្រ ទាំងអាមេរិក និងរុស្ស៊ី​ តែងតែបំពានដែនអាកាសគ្នាទៅវិញទៅមក ធ្វើឲ្យភាគីនីមួយៗត្រូវបញ្ជូនយន្តហោះ​ចម្បាំងរបស់ខ្លួនទៅរារាំង ។​ ពេលថ្មីៗនេះ រុស្ស៊ី បានបញ្ជូនយន្តហោះចម្បាំង​ Su-27​ទៅរារាំង​ B-52 របស់អាមេរិកនៅព្រំដែន ។

ក្រសួងការពារជាតិរុស្ស៊ី កាលពីថ្ងៃទី​២១ ខែមីនា​ បានបង្ហោះឃ្លីបវីដេអូស្តីពីយន្តហោះចម្បាំង​រុស្ស៊ី​ Su-27 ​ទៅរារាំងយន្តហោះទម្លាក់គ្រាប់យុទ្ធសាស្ត្រ របស់អាមេរិក B-52 ដែលបានចូលមកកៀកព្រំដែន​រុស្ស៊ី បង្ខំឲ្យយន្តហោះអាមេរិកត្រូវងាកក្បាលចេញវិញ។

ឃ្លីបវីដេអូខាងលើមានប្រវែង​១០វិនាទី ​បង្ហាញឲ្យឃើញថា ក្រុមយន្តហោះទម្លាក់គ្រាប់ B-52 Stratofortress ​របស់អាមេរិក​បានចូលទៅកៀក ព្រំដែនរុស្ស៊ីនៅតំបន់​​ Baltic ​​ ហើយត្រូវបង្ខំឲ្យ​ងាកក្បាល​ចេញទៅវិញ ក្រោយពេលឃើញយន្តហោះចម្បាំងរុស្ស៊ីពីរគ្រឿង ទៅរារាំង ។ ក្រសួងការពារជាតិរុស្ស៊ីមិនបានបង្ហាញពី​ពេលវេលា ដែលបញ្ជូនយន្តហោះទៅស្ទាក់នោះឡើយ។

ព័ត៌មានខាងលើ បានផ្សាយជាសាធារណៈក្នុងពេលដែល កម្លាំងទាហានអាកាសអាមេរិក​បានបញ្ជូនយន្តហោះ​ទម្លាក់គ្រាប់យុទ្ធសាស្ត្រ​ B-52 ៦គ្រឿងទៅកាន់អឺរ៉ុប ។ យន្តហោះទម្លាក់គ្រាប់ទាំងនោះបានហោះហើរ​ហ្វឹកហាត់នៅតំបន់យុទ្ធសាស្ត្រជាច្រើន ក្នុងនោះ មានដែនសមុទ្របាល់តិច និងសមុទ្រមេឌីទែរ៉ាណេផងដែរ ៕


ចែករំលែក៖