សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយបន្ទាប់ពីរថយន្តដឹកដីមួយគ្រឿង ក្រោយពីចាក់ដីរួចហើយ ភ្លេចទម្លាក់មកវិញ ក៏ទាក់ខ្សែភ្លើង បណ្តាលឲ្យទុស្សេខ្សែភ្លើងឆេះ ផ្អើលប្រជាពលរដ្ឋ និងសមត្ថកិច្ចជួយអន្តរាគមន៍ ។
ហេតុការណ៍ នេះបានកើតទ្បើងនៅវេលាម៉ោង៧ និង១០នាទីយប់ថ្ងៃទី៣ ខែតុលា ឆ្នាំ២០១៨ តាមបណ្ដោយផ្លូវបេតុង ភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តដឹកដីប្រភេទរថយន្តបែន ពណ៌ខៀវលាយលឿង ពាក់ស្លាកលេខ ភ្នំពេញ 3D -4361 ធ្វើដំណើរក្នុងទិសដៅពីជើងទៅត្បូងខាងលើ បើកបរដោយយុវជនម្នាក់ និងមានអ្នករួមដំណើរម្នាក់ទៀត ក្នុងល្បឿនលឿន ដោយមិនបានទម្លាក់បែនចុះក្រោមនោះទេ ទើបធ្វើឲ្យរថយន្តបើកទាក់ខ្សែភ្លើងដែលកាត់ទទឹងផ្លូវ បណ្តាលឲ្យដាច់ធ្លាក់ខ្សែភ្លើងចុះរាយប៉ាយពេញផ្លូវ និងទុសេ្សខ្សែភ្លើងលាន់ឮដូចកាំជ្រួច ។
ប្រភពដដែលបានបន្ថែមថា ភ្លាមៗផងដែរ ប្រជាពលរដ្ឋនៅទីតាំងកើតហេតុ បានយកបំពង់ពន្លត់អគ្គិភ័យទៅបាញ់ពន្លត់ផងដែរ ហើយបានទាក់ទងទៅសមត្ថកិច្ចនគរបាលប៉ុស្តិ៍មកភ្លាមៗ ដោយកម្លាំងនគរបាលប៉ុស្តិ៍ បានទាក់ទងទៅអគ្គិសនីកម្ពុជា ដើម្បីបិទភ្លើង ចំណែកឯរថយន្តដឹកដីមិនបានបើកគេចឡើយ ។
បើតាមសម្តីបុគ្គលិកអគ្គិសនីកម្ពុជា បាននិយាយថា ករណីដាច់ខ្សែភ្លើងបណ្ដាលឲ្យឆេះអស់ចំនួន១ដេប៉ា ស្មើនឹង៤ខ្សែធំៗ ។
ក្រោយពេលកើតហេតុ រថយន្តខាងលើត្រូវបានជំនាញចរាចរណ៍ការិយាល័យផ្លូវគោករាជធានីភ្នំពេញ យកទៅរក្សាទុកនៅប៉ុស្ដិ៍ ដើម្បីរង់ចាំការដោះស្រាយពេលក្រោយ ចំណែកឯខាងអគ្គិសនីកម្ពុជា ព្យាយាមតភ្ជាប់ចរន្តឡើងវិញទាំងយប់ផងដែរ ៕ សុខាសែនជ័យ
