សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ប្រភពព័ត៌មានរបស់ស្នងការដ្ឋាននគរបាលខេត្តព្រះសីហនុ បានឲ្យដឹងថា ៖ វេលាម៉ោង៧:០០នាទីព្រឹកថ្ងៃទី២០ ខែមីនា ឆ្នាំ២០១៩ នេះ មានគ្រោះថ្នាក់ចរាចរណ៍មួយកើតឡើងនៅ លើវិថីផែ ជិតស្ថានីយ៍ប្រេងសូគីមិច (កែងរ៉ា)ស្ថិតនៅ ភូមិ៣ សង្កាត់លេខ៣ ក្រុង/ខេត្តព្រះសីហនុ បង្កឡើងដោយរថយន្តធុនធ្ងន់១គ្រឿងម៉ាក HYUNDAI ពណ៌ក្រហម ពាក់ស្លាក
លេខ ព្រៃវែង3A-0248 ដឹកឥដ្ឋពេញ ចុះចំណោតពីឃ្លាំងលើមកផ្លូវបំបែករ៉ា ហ្វ្រាំងមិនស៊ី បានបុករះរថយន្តឡិចស៊ីស អស់២គ្រឿង ហើយបន្តដំណើរទៅបុកចូលផ្ទះប្រជាពលរដ្ឋ នៅផ្លូវចុះទៅទំនប់រលក ទើបរថយន្តនោះអស់ល្បឿន ហើយអ្នកបើកបរបានចុះគេចខ្លួនតែម្តង តែគ្រោះថ្នាក់នេះមិនបណ្តាលឲ្យមានមនុស្សស្លាប់ឡើយ ។
យោងតាម របាយការណ៍របស់សមត្ថកិច្ចបានឲ្យដឹងថា៖ រថយន្តដឹកឥដ្ឋនៅពេលចុះចំណោតមក បានបុករថយន្តស្របទិសគ្នា លើកទី១ ម៉ាក LEXUS RX300 ពណ៌ទឹកមាស ស្លាក លេខភ្នំពេញ 2D-9111 អ្នកបើកបរឈ្មោះ សេក នី ភេទប្រុស អាយុ ៤៨ឆ្នាំ មុខរបររត់តាក់ស៊ី មានទីលំនៅភូមិ១ សង្កាត់លេខ១ ក្រុង/ខេត្តព្រះសីហនុ។
បន្ទាប់មក រថយន្តនេះ បន្តជ្រុលទៅបុកលើកទី២ រថយន្ត ម៉ាក LEXUS RX300 ពណ៌ស ពាក់ស្លាក លេខភ្នំពេញ2AS-0507 អ្នកបើកបរឈ្មោះ ប៊ុន ធឿន ភេទប្រុស អាយុ ៣៩ឆ្នាំ មុខរបរបើកបររថយន្ត រួមដំណើរប្រពន្ធឈ្មោះ ប៊ុន ទី អាយុ ៣៨ឆ្នាំ មុខរបរកម្មករ មានទីលំនៅ ភូមិ១ សង្កាត់លេខ១ ក្រុង/ខេត្តព្រះសីហនុ ហើយរថយន្ត LEXUS RX300 បានខ្ទាតទៅបុកនឹងខឿនបែងចែកទ្រូងផ្លូវ បាក់អស់មួយចំនួន បន្ទាប់មក រថយន្តដឹកឥដ្ឋនោះ បានបន្តល្បឿនទៅបុកចូលផ្ទះប្រជាពលរដ្ឋមួយទៀត នៅផ្លូវចុះទៅទំនប់រលក ទើបអស់ល្បឿន ហើយអ្នកបើកបរបានចុះពីរថយន្តគេចខ្លួនតែម្តង។
គ្រោះថ្នាក់នេះមិនបណ្ដាលឲ្យមានមនុស្សស្លាប់ទេ រងរបួស មនុស្សស្រី១នាក់ ឈ្មោះ ប៊ុន ទី រងរបួសស្រាល បញ្ជូនទៅព្យាបាលនៅគ្លីនិកសេតេ ។
រថយន្តទាំង ៣គ្រឿង ( ធុនធំ១គ្រឿង ) សមត្ថកិច្ច បានចាត់ចែងយកមករក្សារទុកនៅការិយាល័យចរាចរណ៍ផ្លូវគោក ៕ ឆ្លាម សមុទ្រ
