សារព័ត៌មាន នគរវត្ត តែងតែនាំមុខគេជានិច្ច
មិនដឹងថាពលរដ្ឋនៅរាជធានីភ្នំពេញសាទរចំពោះការដំឡើងថ្លៃសេវាប្រមូលសំរាមដែរឬយ៉ាងណានោះទេ ។ សព្វថ្ងៃតម្លៃសេវាប្រមូលសំរាមត្រូវបង់៤ពាន់រៀលក្នុងមួយខែ ។ អំណឹះតទៅ អ្នកធ្លាប់បង់៤ពាន់រៀល ឬ១ដុល្លារ ត្រូវបង់១០៦០០រៀល ក្នុងមួយខែ ។ ពោលគឺកើនឡើងស្ទើរ៣ដងឯណោះ ។ ក្នុងនាមប្រជាពលរដ្ឋម្នាក់មើលឃើញថា មិនគួរឡើងថ្លៃអ្វីដល់ម្លឹងពេកទេ បើឡើងគួរតែត្រឹមទ្វេដងបានហើយ ។ យ៉ាងណាក៏ដោយ យើងខ្ញុំជាប្រជាពលរដ្ឋរង់ចាំមើលគុណភាពនៃការចុះប្រមូលសំរាមរបស់ក្រុមហ៊ុនប្រមូលសំរាម តើទៀងទាត់តាមកាលកំណត់ដែរឬទេ?
ការកំណត់តម្លៃក្នុងមួយខែ៤ពាន់រៀល ត្រូវគេអះអាងថា បានព្រមព្រៀងគ្នាតាំងពីឆ្នាំ១៩៩៦ ។ ដូច្នេះវា ត្រឹមត្រូវហើយ ដែលត្រូវកែប្រែសេវាប្រមូលសំរាមនេះ ។ ប៉ុន្តែការដែលដំឡើងថ្លៃច្រើនពេក ក៏មិនជាល្អចំពោះស្មារតីរបស់ប្រជាពលរដ្ឋនៅទីក្រុងនេះដែរ ។ ប៉ុន្តែយ៉ាងណាក៏ដោយ វាអាស្រ័យទៅលើគុណភាពសេវានៃការចុះប្រមូលសំរាមនោះថា តើវាទៀងទាត់កម្រិតណា? បើថា សេវាប្រមូលសំរាមរីយីករយាកដូចសព្វថ្ងៃនេះទេ បញ្ហាដំឡើងថ្លៃសេវាប្រមូលសំរាមមិនគួរកើតមានទេ? ពោលគឺបើប្រមូលសំរាមរបៀបដូចសព្វថ្ងៃនេះ ការដំឡើងថ្លៃរហូតដល់ស្ទើរ៣ដងនោះ គឺជារឿងខុសឆ្គងមួយធ្ងន់ណាស់ ។
សព្វថ្ងៃនេះ សេវាប្រមូលសំរាមធ្វើឡើងភ្លឹបភ្លែតៗ ដូចភ្លើងក្នុងបារ ជួនកាលបាត់ពីរ ឬបីថ្ងៃ ឬពេលខ្លះដល់មួយសប្តាហ៍ ទើបឃើញឡានក្រុមហ៊ុនប្រមូលសំរាមចុះមកធ្វើការងារ ។ បើនិយាយពីនៅតាមតំបន់ជាយក្រុងឯណេះវិញ ដូចជាខណ្ឌដង្កោ, សែនសុខ ឬឫស្សីកែវ សកម្មភាពប្រមូលសំរាមបានធ្វើឡើងនៅក្នុងរយៈពេលមួយសប្តាហ៍ ឬ១០ថ្ងៃម្តង ។ ប៉ុន្តែការប្រមុលលុយមិនបានខកខាន ឬត្រូវបានពន្យារនោះទេ ។ បើទោះជាយ៉ាងនេះក្តី អាជ្ញាធរអះអាងថា បានចេញខាតជំនួសប្រជាពលរដ្ឋលើវិស័យប្រមូលសំរាមនេះ ។ គេរំពឹងថា បន្ទាប់ពីការឡើងថ្លៃសេវាប្រមូលសំរាមនេះទៅ អាជ្ញាធរលែងបង់ខាតទៀតហើយ ។
យ៉ាងណាក៏ដោយ ក្នុងនាមប្រជាពលរដ្ឋម្នាក់នៅរាជធានីភ្នំពេញយល់ឃើញថា ការដំឡើងថ្លៃសំរាមស្ទើរតែបីដងនោះ វាដូចជាថ្លៃពេកហើយ ។ បើការដំឡើងត្រឹមតែពី៤ពាន់រៀលទៅ៨ពាន់រៀល ទើបអាចថាសមរម្យ ឬសមល្មម ។ ប៉ុន្តែយ៉ាងណាក៏ដោយ វាអាស្រ័យទៅលើសេវាកម្មនៃការប្រមូលនោះតើទៀងទាត់ឬទេ? អាជ្ញាធរបានដាក់គំនាបលើប្រជាពលរដ្ឋមិនឲ្យចោលសំរាមផ្តេសផ្តាស់ ។ ជាក់ស្តែងនៅពេលនេះ អាជ្ញាធរបានអំពាវនាវប្រជាពលរដ្ឋទុកដាក់សំរាមនៅក្នុងផ្ទះបណ្តោះអាសន្ន ព្រោះតែបុគ្គលិកប្រមូលសំរាមស៊ីនទ្រី ត្រូវឈប់សម្រាកក្នុងឱកាសបុណ្យចូលឆ្នាំ ។ នៅពេលដែលមានបុណ្យទានម្តងៗ សំរាមភាគច្រើនត្រូវបានគរនៅក្នុងលំនៅឋាន ឬក៏ប៉ើងហោះតាមខ្យល់ក្នុងរាជធានី។
ប្រសិនបើការដំឡើងថ្លៃស្ទើរ៣ដង អនុវត្តបានដោយជោគជ័យ នោះគ្មានទេការស្នើសុំឲ្យប្រជាពលរដ្ឋទុកសំរាមនៅក្នុងផ្ទះ ។ ក្រុមហ៊ុនប្រមុលសំរាមត្រូវទទួលខុសត្រូវទាំងស្រុងចំពោះការបញ្ជូនចេញសំរាមទាំងអស់ដោយមិនទុកឲ្យកកស្ទះទៀតឡើយ ។ ពោលគឺនៅពេលដែលឡើងថ្លៃរហូតដល់១០៦០០រៀលហើយនោះ មិនថានៅជាយខណ្ឌសែនសុខ, ដង្កោ, ពោធិ៍សែនជ័យ ឬខណ្ឌឫស្សីកែវនោះឡើយ សេវាប្រមូលសំរាមត្រូវធ្វើឲ្យបានទៀងទាត់តាមការព្រមព្រៀងជាមួយអាជ្ញាធរ ។ ឧបមាថា តំបន់ «ក» ត្រូវចុះប្រមូលសំរាមរយៈពេល២ថ្ងៃម្តង នាវេលាម៉ោង១២ថ្ងៃត្រង់ ដូច្នេះនៅវេលាកំណត់ ត្រូវតែមានរថយន្តប្រមូលសំរាមមកដល់ ។ ការចុះប្រមូលសំរាមទៀងទាត់តាមម៉ោងពេល នោះអាជ្ញាធរអាចផាកពិន័យចំពោះប្រជាពលរដ្ឋណាដែលចេះតែចោលសំរាមផ្តេសផ្តាស់នោះបានហើយ ។
នៅពេលដែលសេវាដំឡើងថ្លៃត្រូវបានអនុវត្ត រថយន្តប្រមូលសំរាមក៏មិនត្រូវហូរទឹកស្អុយកក្លាក្សចាល់លើទ្រូងថ្នល់ពេលឈប់ភ្លើងស្តុបនោះដែរ ។ ជាងនេះទៅទៀត នៅពេលចេញដំណើរត្រូវគ្របសំរាមឲ្យបានត្រឹមត្រូវ មិនមែនត្រូវបើកបើរលឿនដូចហោះ ហើយសំរាមប៉ើងចេញពីលើរថយន្តដូចសព្វថ្ងៃនេះទេ ។ នៅមានបញ្ហាជាច្រើនទៀតដែលជាបញ្ហាប្រឈមសម្រាប់ក្រុមហ៊ុនប្រមូលសំរាមត្រូវដោះស្រាយ ។ ការដោះស្រាយជំហានដំបូងនោះគឺការប្រមូលសំរាមឲ្យទៀតទាត់ រួមទាំងកែលម្អរថយន្តប្រមូលសំរាម… និងបញ្ហាផ្សេងៗទៀត ៕ ប្រជាពលរដ្ឋម្នាក់
