ព័ត៌មានទាន់ហេតុការណ៍៖

លួចម៉ូតូបានសម្រេច ជិះយកទៅលក់ត្រូវនគរបាលស្រុកស្អាងចាប់ខ្លួន

ចែករំលែក៖

ខេត្តកណ្តាលៈ ជនសង្ស័យម្នាក់ធ្វើសកម្មភាពលួចម៉ូតូបានសម្រេច ជិះគេចខ្លួនពីភ្នំពេញគោល​បំណងយកដើរលក់នៅឃុំក្រាំងយ៉ូវ ខណៈជិះដល់ឃុំស្អាងភ្នំ ក៏ត្រូវបានសមត្ថកិច្ចនគរបាល​ស្រុកស្អាងចេញល្បាតចាប់ខ្លួនបាន កាល​ពីវេលាម៉ោងរសៀលថ្ងៃទី១៧ ខែសីហា ឆ្នាំ២០១៦ ត្រង់ចំណុចស្ពានកំពង់ស្វាយ ស្ថិតក្នុងភូមិ​ពាមសាលា ឃុំស្អាងភ្នំ ស្រុកស្អាង ខេត្តកណ្តាល ។

មន្ត្រីនគរបាលស្រុកស្អាងបានឲ្យដឹងថា ជនសង្ស័យឈ្មោះ អន អូន ភេទប្រុស អាយុ១៧ឆ្នាំ ជនជាតិខ្មែរ មុខរបរ លក់ធូប-ទៀន នៅមុខវាំង បច្ចុប្បន្នស្នាក់នៅភូមិសម្លរកកូរ ប្លុកស្ថានីយ៍ទូរទស្សន៍ស៊ីធីអិន ខណ្ឌឬស្សីកែវ រាជធានីភ្នំពេញ ។ ក្នុងប្រតិបត្តិការចាប់ខ្លួន​ជនសង្ស័យខាងលើនេះសមត្ថកិច្ចបានធ្វើការដកហូតវត្ថុតាង ម៉ូតូមួយគ្រឿងម៉ាកស៊ុយហ្ស៊ូគី និច ពណ៌លឿងលាយស ពាក់ស្លាកលេខភ្នំពេញ1CJ-8980 ជាកម្មសិទ្ធរបស់ជនរងគ្រោះ​ឈ្មោះ ថោង ដនរិទ្ធិពង្ស ភេទប្រុស អាយុ១៨ឆ្នាំ ជនជាតិខ្មែរ មុខរបរ សិស្ស មានទី​លំនៅ​ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។

ប្រភពដដែលបានបន្តថា នៅមុនពេលចាប់ខ្លួនជនសង្ស័យខាងលើនេះសមត្ថកិច្ច​នគរបាលស្រុកស្អាងបានចេញល្បាតក្នុងភូមិសាស្ត្រឃុំស្អាងភ្នំ ខណៈនោះបានប្រទះឃើញ​ជនសង្ស័យកំពុងជិះម៉ូតូតាមដងផ្លូវ ។ អ្វីដែលធ្វើឲ្យសមត្ថកិច្ចឈានដល់ចាប់ខ្លួននោះ ពេល​ជនសង្ស័យឃើញសមត្ថកិច្ចបានព្យាយាមបន្ថែមល្បឿនបើកគេច ទើបសមត្ថកិច្ចដេញ​តាម​ចាប់ធ្វើបញ្ជូនទៅកាន់អធិការដ្ឋានននគរបាលស្រុក ដើម្បីធ្វើការសាកសួរ ។

ជនសង្ស័យឈ្មោះ អន អូន បានសារភាពប្រាប់សមត្ថកិច្ចនគរបាលថា នៅវេលា​ម៉ោងប្រមាណ១០ព្រឹក ថ្ងៃទី១៧ ខែសីហា ឆ្នាំ២០១៦ រូបគេបានធ្វើសកម្មភាពលួចម៉ូតូមួយ​គ្រឿង​ដែលខ្លួនជិះនេះ​ចេញពីផ្សារសាន់ហាន់ ស្ថិតក្នុងសង្កាត់ឫស្សីកែវ ខណ្ឌឬស្សីកែវ រាជធានីភ្នំពេញ ក្នុងគោល​បំណងយកដើរលក់ ។ ពេលជិះមកជួបសមត្ថកិច្ចរូបគេមានការ​ភ័យខ្លាចក៏បើកម៉ូតូរត់គេចខ្លួន តែរត់មិនរួចក៏ត្រូវសមត្ថកិច្ចនគរបាលក្របួចជាប់តែម្តង ៕ ស្អាងជ័យ

999

kdal (1)

kdal (2)
សូមអានបន្តទៀត ៖លោក​ ប៉ា​ ងួនទៀង​ សន្យា​ចូល​បំភ្លឺ​លើក​ក្រោយ​ទៀត​ ប្រសិន​បើ​តុលាការ​កោះ​ហៅ​លើក​ទី​ពីរ​


ចែករំលែក៖