សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ កម្លាំងជំនាញអធិការនគរបាលស្រុកកំពង់សៀម សហការជាមួយ ប៉ុស្តិ៍នគរបាលរដ្ឋបាលអាង ដឹកនាំដោយលោកវរសេនីយ៍ទោ ឯក ប៉ាន់ដន បានបើកប្រតិបត្តិការចុះបង្រ្កាបទីតាំងលេងល្បែងស៊ីសងបញ្ជល់មាន់ដោយខុសច្បាប់មួយកន្លែង ស្ថិតនៅចំណុចភូមិរអាងលើ ឃុំរអាង ស្រុកកំពង់សៀម ខេត្តកំពង់ចាម ។
លោកវរសេនីយ៍ទោ ឯក ប៉ាន់ដន អធិការនគរបាលស្រុកកំពង់សៀមបានអោយដឹងថា ជាលទ្ធផល កម្លាំងបង្រ្កាបនិងចាប់បានអ្នកលេងល្បែង២នាក់ ១.ឈ្មោះ ស៊ត កុយ ភេទប្រុសអាយុ៤៥ឆ្នាំ និង ២.ឈ្មោះ ហ៊ត គឹមហ៊ន់ ភេទប្រុស ៣៨ឆ្នាំ ។ អ្នកទាំងពីរនាក់ ស្នាក់នៅភូមិគៀនជ្រៃក្រៅ ឃុំគៀនជ្រៃស្រុកកំពង់សៀម ។
លោកបន្តថា ក្រៅពីឃាត់មនុស្ស កម្លាំងចាប់យកវត្ថុតាងម៉ូតូ១១គ្រឿង និងឧបករណ៍មួយចំនួនទៀត ។
ប្រតិបត្តិការបង្ក្រាបទីតាំងបញ្ជល់មាន់ខាងលើនេះ ធ្វើឡើងកាលពីវេលាម៉ោង១១ និង៣០នាទី ថ្ងៃទី១៦ ខែធ្នូ ឆ្នាំ២០១៧ ក្រោមបទបញ្ជាលោក ឧត្តមសេនីយ៍ត្រី ឯម កុសល ស្នងការនគរបាលខេត្តកំពង់ចាម ។
បច្ចុប្បន្នជនសង្ស័យ និងវត្ថុតាងខាងលើ បានបញ្ជូនមកកាន់អធិការរដ្ឋាននគរបាលស្រុកកំពង់សៀម ដើម្បីធ្វើការសាកសួរ និងកសាងសំណុំរឿងអនុវត្តតាមនីតិវិធី ៕ វណ្ណៈ
