សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ក្រុមការងារបង្ក្រាបបទល្មើសចលនាសត្វ និងផលិតផលសត្វ របស់អគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តស្វាយរៀង បានឃាត់រថយន្ត ១គ្រឿងដឹកសត្វជ្រូករស់ជិត១០០ក្បាល ចេញមកពីប្រទេសវៀតណាម ចូលមកតាមច្រករបៀងធ្លក ក្រុងបាវិត ខេត្តស្វាយរៀង ជ្រូកនាំចូលពីវៀតណាម តាមច្រករបៀងធ្លកត្រូវមន្ត្រីជំនាញចុះឃាត់សកម្មភាពរបស់ក្រុមការងារចុះប្រតិបត្តការណ៍ ទប់ស្កាត់ការនាំចូលសត្វជ្រូកខុសច្បាប់ ពីប្រទេសវៀតណាមមកកាន់ប្រទេសកម្ពុជាដោយមូលហេតុគ្មានលិខិតអនុញ្ញាត។
ការចុះឃាត់រថយន្តដឹកជ្រូកនេះបាន ធ្វើឡើង នៅវេលាម៉ោង៨និង៣០នាទីយប់់ ថ្ងៃទី១២ ខែមករា ឆ្នាំ២០១៩ ក្រោមការបញ្ជាផ្ទាល់ពីលោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុក ជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ឲ្យក្រុមការងារបង្ក្រាបបទល្មើសចលនាសត្វ និងផលិតផលសត្វ របស់អគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តស្វាយរៀង។
មន្ត្រីការិយាល័យផលិតកម្ម និងបុសុព្យាបាលនៃមន្ទីរកសិកម្មខេត្តស្វាយរៀងបានឲ្យដឹងថា បានឃាត់រថយន្ត ១គ្រឿងដឹកសត្វជ្រូករស់ជាច្រើនក្បាល ចេញមកពីប្រទេសវៀតណាម បំណងដឹកទៅកាន់រាជធានីភ្នំពេញ ដោយចូលមកតាមច្រករបៀងធ្លក ឬហៅថាច្រកម្ទេស ភូមិម្ទេស សង្កាត់ច្រកម្ទេស ក្រុងបាវិត ខេត្តស្វាយរៀង ដោយគ្មានលិខិតអនុញ្ញាត ឬឯកសារអ្វីទាំងអស់។
មន្ត្រីជំនាញបន្តថា ក្រោយពីក្រុមការងារបានឃាត់រថយន្តនោះមក ក្រុមការងារ បានប្រគល់វត្ថុតាងបទល្មើស ជូនទៅការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តស្វាយរៀង ដើម្បីអនុវត្តតាមនីតិវិធីច្បាប់។
ពាក់ព័ន្ធករណីខាងលើនេះលោក ឈឹន សៅ មន្ត្រីបសុពេទ្យខេត្តបានឲ្យដឹងតាមទូរស័ព្ទថា ជ្រូកនោះមានចំនួន១៩ក្បាលទេដែលរក្សាទុកនៅមន្ទីរកសិកម្មខេត្តហើយឈាមបញ្ជូនទៅពិនិត្យពិសោធអគ្គនាកដ្ឋានបសុព្យាបាលឯភ្នំពេញមិនទាន់បានលទ្ធផលនោះទេ។
តាមអ្នកភូមិរស់់នៅក្បែរច្រកធ្លកក្រុងបាវិតបានបង្ហើបឲ្យដឹងថាមានរថយន្តជាច្រើនគ្រឿងបានដឹកសត្វជ្រូកបានដឹកចេញចូលជាច្រើនឆ្នាំមកហើយមិនឃើញមានសមត្ថកិច្ចជំនាញចុះមកត្រួតពិនិត្យនិងចាប់ឃាត់អ្វីនោះទេប៉ុន្តែស្រាប់តែនៅថ្ងៃកើតហេតុមានសមត្ថកិច្ចក្រុមការងាររបស់អគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តស្វាយរៀង ឃាត់បានរថយន្តមួយគ្រឿងទំនងជាមានរឿងនិយាយគ្នារឿងទឹកតែមិនត្រូវហើយមើលទៅបានចុះចាប់បែបនេះ? ៕ យឹម សុថាន
