សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ នាយឧត្ដមសេនីយ៍ កិត្តិបណ្ឌិត ហ៊ីង ប៊ុនហៀង អគ្គមេបញ្ជា ការរង កងយោធពលខេមរភូមិន្ទ(ខ.ភ.ម)តំណាងនាយឧត្តមសេនីយ៍បណ្ឌិត ប៉ុល សារឿន អគ្គមេបញ្ជាការ (ខ.ភ.ម)ចូលរួមបើកវគ្គបណ្ដុះបណ្ដាលនាយទាហានសកម្មជំនាន់ទី២២ និងបិទវគ្គបណ្ដុះបណ្ដាល នាយទាហានថ្នាក់កងអនុសេនាធំ វរសេនា តូចថ្មើរជើងជំនាន់ទី១ សាលានាយ ទាហានសកម្ម នាព្រឹកថ្ងៃទី២១ ខែមីនា ឆ្នាំ២០១៨។
លោកឧត្តមសេនីយ៍ឯក ច័ន្ទ សុភត្រា នាយរងសេនាធិការចម្រុះ និងជានាយកសាលានាយទាហានសកម្ម បានឲ្យដឹងថា ក្នុងដំណាក់កាលកែទម្រង់(ខ.ភ.ម) សាលារួមចំណែកក្នុងការបណ្តុះបណ្តាល កម្មសិក្សាការីសម្រាប់បន្តវេនចំនួន២៣ ជំនាន់ ស្មើនឹង១១៨៤នាក់ ។ ក្នុងនោះ វគ្គនាយទាហានកងអនុសេនាធំ វរសេនាតូចជំនាន់ទី១ មានចំនួន៩៤នាក់ បានប្រឡងបញ្ចប់វគ្គ៩២ នាក់ (ពីថ្ងៃទី២៨ ខែកុម្ភៈ ដល់ថ្ងៃទី២ ខែមីនា ឆ្នាំ២០១៨)។ ដោយឡែកជំនាន់ទី២២ ជាវគ្គជំនាន់ថ្មី ឆ្នាំ២០១៨ មានកម្មសិក្សាការី២០០នាក់។
នាយឧត្ដមសេនីយ៍កិត្តិបណ្ឌិត ហ៊ីង ប៊ុនហៀង បានថ្លែងថា ដើម្បីបុព្វហេតុជាតិ ការពារសុខសន្តិភាព ការពាររាជរដ្ឋាភិបាល ក្រោមការដឹកនាំប្រកបដោយ យុទ្ធសាស្ត្រដ៏ឈ្លាសវៃ របស់សម្តេចតេជោ អស់រយៈកាល៣៩ឆ្នាំ បានធ្វើឲ្យប្រទេសជាតិ មានការរីកចម្រើនគ្រប់វិស័យ ក្នុងនោះវិស័យកងទ័ព ក៏មានការរីកចម្រើន ឥតឈប់ឈរ។
នាយឧត្តមសេនីយ៍ ជំរុញឲ្យថ្នាក់ដឹកនាំ យោធាចារ្យ នាយទា ហាន និងពលទាហាន សាលានាយទាហានសកម្ម ពិសេសកម្មសិក្សាការីទាំងអស់ បន្តបំពេញតួនាទីភារកិច្ច ដ៏ល្អរបស់ខ្លួន លើការបង្រៀននិងរៀនសូត្រឲ្យបានខ្លាំងក្លា បន្តចូលរួមការពារសុខ សន្តិភាព ស្ថិរភាពនយោបាយ ការពារ កសាង អភិវឌ្ឍន៍ជាតិ ដើម្បីប្រជាជន។
ក្នុងឱកាសនោះដែរ នាយឧត្ដមសេនីយ៍ កិត្តិបណ្ឌិត នាំយកអំណោយដ៏ថ្លៃថ្លារបស់សម្តេចតេជោ ហ៊ុនសែន និង សម្តេចកិត្តិព្រឹទ្ធបណ្ឌិត ផ្តល់ជូនសាលាមានអង្ករ ៥តោន ត្រីខ១០កេស ស្រាបៀរ ៥០កេស ទឹកសុទ្ធ ៥០កេស មី ២០០កេស និងថវិកា ២០លាន រៀល ព្រមទាំងឧបត្ថម្ភដល់យោធាចារ្យ និង នាយទាហានសាលា ចំនួន៣៤៦នាក់ ក្នុងម្នាក់ៗថវិកា ៥ម៉ឺនរៀល និងឧបត្ថម្ភដល់កម្មសិក្សាការី ៦១៣នាក់ ម្នាក់ៗថវិកា ៤ម៉ឺនរៀល គ្រួសារកងទ័ព៥២នាក់ ម្នាក់ៗ៤ម៉ឺនរៀល ព្រមទាំងជួយសាងសង់ខ្លោងទ្វារសាលា ផ្តល់កុំព្យូទ័រ២គ្រឿង និងព្រីនធឺ២គ្រឿង ស៊ីម៉ងត៍ប្រគេនពីរវត្ត ក្នុងមួយវត្ត១០តោនផងដែរ ៕ សុខដុម
