សារព័ត៌មាន នគរវត្ត តែងតែនាំមុខគេជានិច្ច
សហរដ្ឋអាមេរិក៖ ពិតជាភ្ញាក់ផ្អើលក្រោយពីគេឃើញវត្តមានតារាក្បាច់គុន និងជាកីឡាការិនីប្រដាល់ក្នុងទ្រុង សំ ថារ័ត្ន បង្ហាញមុខក្នុងផ្ទះស្តេចប្រដាល់ មេនី ប៉ាគីអាវ នៅលើទឹកដីសហរដ្ឋអាមេរិក ។ នាងបានបង្ហាញក្តីរំភើបដោយមិននឹកស្មានដល់ថា បានជួបផ្ទាល់ និងបានចូលមកដល់ផ្ទះអ្នកប្រដាល់កំពូលរូបនេះ ។
ក្នុងរូបថតប៉ុន្មានសន្លឹកបង្ហាញអំពីវត្តមានកីឡាការិនី សំ ថារ័ត្ន បានឈរថតក្នុងផ្ទះស្កឹមស្កៃជាមួយស្តេចប្រដាល់ ប៉ាគីអាវ នារដ្ឋឡូអេនជីលេស សហរដ្ឋអាមេរិក ។ តារាស្រីរូបនេះបានបង្ហាញពីក្តីរំភើបរីករាយមិននឹកស្មានដល់ ។ នាងថាបានទៅដល់ផ្ទះស្តេចប្រដាក់រូបនេះជាមួយនឹងការទទួលទានអាហារជុំគ្នាដែលជាឱកាសកម្រសម្រាប់ជីវិតនាង ហើយក៏ធ្វើដំណើរទៅទីនោះគឺមានតែនាងម្នាក់ប៉ុណ្ណោះដែលជាជនជាតិខ្មែរ ។ ថារ័ត្ននិយាយថានាងបានទៅផ្ទះស្តេចប្រដាល់រូបនេះតាមរយៈមិត្តភ័ក្កិដែលធ្វើការងារទាក់ទងនឹងកិច្ចការប្រដាល់ ។
គួរបញ្ជាក់ដែរថាកីឡាការនីគុនល្បុក្កតោ កញ្ញា សម ថារ័ត្ន ក្រៅពីជាកីឡាការិនីនាងក៏ជាសិល្បការិនីផ្នែកក្បាច់គុនដ៏មានប្រជាប្រិយ ។ នាងគឺជាតួអង្គសំខាន់មួយរូប នៅក្នុងខ្សែភាពយន្តឯកសារ រឿង “ការរស់រានឡើងវិញនៃក្បាច់គុនល្បុក្កតោ” ដែលជា ការផ្សព្វផ្សាយ និងជួយគាំទ្រក្បាច់គុនខ្មែរ នឹងជួយឲ្យពិភពលោកមើលឃើញអំពីភាពអស្ចារ្យ នៃសម្បត្តិវប្បធម៌ខ្មែរ និងមោទនភាពជាតិខ្មែរ ។ ភាពយន្ត នេះ ផលិតឡើងដោយជនជាតិកាណាដា ពីរនាក់ប្តីប្រពន្ធ គឺអ្នកស្រី សាន់ដ្រា លឺបា (Sandra Leuba) និងលោក ម៉ាក បក់ស្ល័រ (Mark Bochsler) ដែលត្រូវប្រើពេលផលិត និងតម្លើងអស់រយៈពេលជាង ៨ឆ្នាំ ។ ខ្សែភាពយន្តនេះបានដាក់បញ្ជាំងនៅរោងភាពយន្ត Lightbox Film Center នៅទីក្រុង Philadelphia នៅថ្ងៃទី៩ ខែវិច្ឆិកានេះ ។ បន្ទាប់មក ខ្សែភាពយន្តនេះត្រូវបានយកទៅដាក់បញ្ចាំងនៅប្រទេសកាណាដាផងដែរ ។ នាងក៏ជាកូនស្រីអ្នកនិពន្ធ និងជាតន្ត្រីករ ស្តេចវីយូឡុង លោក អ៊ុំ ដារ៉ាផងដែរ៕ វឌ្ឍនា
