សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលប្រឆាំងបទល្មើសសេដ្ឋកិច្ចរបស់ក្រសួងមហាផ្ទៃចុះត្រួតពិនិត្យសិប្បកម្មផលិតនិងវេចខ្ចប់ទឹកត្រីនិងទឹកស៊ីអ៊ីវសញ្ញាផ្ការឈូកមួយកន្លែង ស្ថិតនៅតាមបណ្តោយផ្លូវម៉ុងឬទ្ធី សង្កាត់ភ្នំពេញថ្មី ខណ្ឌសែនសុខ ដោយរកឃើញថាការផលិតនិងវេចខ្ចប់ពុំមានលក្ខណៈនិងស្តង់ដាត្រឹមត្រូវ ក្រោយត្រួតពិនិត្យរួចកម្លាំងចម្រុះ បានធ្វើការសម្រេចបិទ សិប្បកម្មនេះជាបណ្តោះអាសន្ន កាលពីព្រឹកថ្ងៃទី១៧ ខែឧសភា ឆ្នាំ២០១៨នេះ ។
លោកវរសេនីយ៍ឯក ម៉ាត់ យូសុះ នាយការិយាល័យប្រឆាំងបទល្មើសកម្មសិទ្ធបញ្ញា បានឲ្យដឹងថា ខណៈកំពុងចុះត្រួតពិនិត្យនោះថា ប្រតិបត្តិការនេះគឺបានធ្វើឡើងក្រោមបទបញ្ជាផ្ទាល់ពីឯកឧត្តមឧត្តមសេនីយ៍ឯក ចាន់វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ មានការសម្របសម្រួលដោយព្រះរាជអាជ្ញារងលោក ហឹង វ៉ាន់ថន រួមទាំងសហការជាមួយមន្ត្រីកាំកុងត្រួល វិទ្យាស្ថានស្តង់ដាកម្ពុជា និងអាជ្ញាធរមូលដ្ឋានក្រោយពីមានការសង្ស័យថាសិប្បកម្មដែលគ្មានស្លាកយីហោនេះ បានផលិតនិងវេច ខ្ចប់នូវទឹកត្រីនិងទឹកស៊ីអ៊ីវគ្មានស្តង់ដាត្រឹមត្រូវនិងីគ្មានអនាម័យ។
លោកវរសេនីយ៍ឯក ម៉ាត់ យូសុះបានឲ្យដឹងទៀតថា ក្រោយពីពិន្យរបស់ក្រុមមន្ត្រី ចម្រុះមកបានរកឃើញថា សិប្បកម្មនេះបានផលិតនូវទឹកត្រី និងទឹកស៊ីអ៊ីវគ្មានប្រភពច្បាស់ លាស់ហើយដាក់ស្លាក់យីហោសញ្ញាផ្ការឈូកដោយគ្មានច្បាប់អនុញ្ញាតផងដែរ។
បើតាមវរសេនីយ៍ឯករូបនេះបានបញ្ជាក់ទៀតថា ក្រោយពីធ្វើការត្រួតពិនិត្យហើយ មន្ត្រីនគរបាលប្រឆាំងបទល្មើសសេដ្ឋកិច្ច និងព្រះរាជអាជ្ញារងរាជធានីភ្នំពេញសម្រេចបិទសិប្បកម្មនេះជាបណ្តោះអាសន្នដើម្បីចាត់ការទៅតាមនីតិវិធីច្បាប់ និងម្ចាស់សិប្បកម្មក៏ត្រូវបានហៅទៅសួរនាំបន្ថែមនៅក្រសួងមហាផ្ទៃផងដែរ។ យ៉ាងណាក្តីលោកម៉ាត់ យូសុះមិនបានបញ្ជាក់ថាសិប្បកម្មនេះបានផលិតតាំងពីពេលណានោះទេ ហើយប្រភពធាតុដើមក៏មិនដឹងយកមកពីណានោះដែរ ។
គួររំលឹកផងដែរថាក្នុងការបង្រ្កាបទីតាំងផលិតនិងវេចខ្ចប់ទឹកត្រីនិងទឹកស៊ីអ៊ីវ មួយចំនួនកន្លងមក គេសង្កេតឃើញសមត្ថកិច្ចចម្រុះ បានចុះត្រួតពិនិត្យសុវត្ថិភាពចំណីអាហារ និងសិប្បកម្មផលិតគ្រឿងឧបភោគបរិភោគជាច្រើន ដោយសង្ស័យថាការផលិតនោះពុំស្របតាមស្តង់ដាត្រឹមត្រូវនិងគ្មានអនាម័យដែលជាកត្តាធ្វើ ឲ្យប៉ះពាល់ដល់សុខភាពអ្នកប្រើប្រាស់និងអ្នកបរិភោគជាដើម។ ជាក់ស្តែងកាលពីដើមខែកន្លងទៅនេះក្រសួងមហាផ្ទៃបានសម្រេចដុតកំទេចចោលនូវផលិតផលក្លែងក្លាយទាំងនោះរាប់រយតោន ហើយសិប្បកម្មខ្លះត្រូវបានបិទនិងម្ចាស់សិប្បកម្មខ្លះត្រូវបានបញ្ជូនទៅតុលាការ ដើម្បីចាត់ការតាមច្បាប់ផងដែរ ៕ស តារា
