សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ឌី រ័ត្នខេមរុណ អភិបាលរងខណ្ឌមានជ័យ បានដឹកនាំមន្រ្តីជំនាញចុះពិនិត្យទីតាំង អាជីវកម្មលក់មាន់ ដែលបានបង្កផលប៉ះពាល់សុខភាពដល់អ្នករស់នៅជិតខាង។
កាលពីព្រឹកថ្ងៃពុធ ៣កើតខែ ភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១២ ខែ កញ្ញា ឆ្នាំ ២០១៨ ក្រុមការងារ រដ្ឋបាលខណ្ឌមានជ័យ ដែលដឹកនាំដោយ លោក ឌី រ័ត្នខេមរុណ អភិបាលរង ខណ្ឌមានជ័យ បានចុះត្រួតពិនិត្យទីតាំង អាជីវកម្មលក់មាន់ របស់ឈ្មោះ ប្រាក់ ស្រីមុំ ដែលមានទីតាំងស្ថិតនៅ ផ្លូវ បេតុង ភូមិចំរើនផល៣ សង្កាត់បឹងទំពុនទី១ ខណ្ឌមានជ័យ រាជធានីភ្នំពេញបានបង្ក ផលប៉ះពាល់ដល់អ្នករស់នៅជិតខាង ។
ការចុះត្រួតពិនិត្យនេះមានការចូលរួមពី លោក ខេង គឹមសាន ប្រធានការិយាល័យ ឧស្សាហកម្ម ខណ្ឌមានជ័យ, លោកស្រី ណុប ណាវី ប្រធានការិយាល័យ កសិកម្ម ខណ្ឌមានជ័យ, លោក ទិត សៅ ប្រធានការិយាល័យបរិស្ថាន ខណ្ឌមានជ័យ, លោក សួស សារិន ចៅសង្កាត់បឹងទំពុនទី១ និង លោក មេភូមិចំរើនផល៣ ផងដែរ។
លោក ឌី រ័ត្នខេមរុណ អភិបាលរងខណ្ឌមានជ័យ ក៏បានណែនាំ ម្ចាស់អាជីវកម្មលក់មាន់ ត្រូវរៀបចំបែបបទសុំច្បាប់អនុញ្ញាត (បន្តច្បាប់), ត្រូវរៀបចំសម្អាតទីតាំងជាប្រចាំ មានការបាញ់ទឹកសំអាត រៀបចំទុកដាក់កាកសំណល់ រឹង និង រាវ ឲ្យបានត្រឹមត្រូវ រៀបចំកាកសំណល់រាវ មុនបង្ហូរបញ្ចូលទៅក្នុងបឹងត្រូវបាចកំបោរ ឬ IM កន្លែងស្តុកមាន់ដើម្បីកាត់បន្ថយក្លិន នឹងត្រូវរៀបចំធ្វើកិច្ចសន្យាបរិស្ថាន ជាមួយការិយាល័យបរិស្ថាន៕ តាឡឹម
