សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ ដំរីឈ្មោលមួយក្បាលឈ្មោះ បឹកគុក អាយុ ៣៥ ឆ្នាំដែលបានជាប់ផុង នៅក្នុងព្រៃស្ថិតនៅភូមិពូតាំង សង្កាត់រមនាក្រុងសែនមនោរម្យ ហើយដួលសន្លប់នោះ ពេលនេះវាបានងាប់ហើយនៅវេលាម៉ោងប្រមាណ៥ល្ងាច ថ្ងៃសៅរ៍ ៧កើត ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១ ខែមេសា ឆ្នាំ២០១៨ ក្រោយពីវាបានដួលសន្លប់ប្រមាណជិត ៨ ម៉ោងដោយសារតែខ្វះអាហារនៅពេលដែលវាជាប់ចំណងនៅក្នុងព្រៃត្រង់ចំណុចអូរតេ។
លោក ពេជ្រ សុធារី នាយប៉ុស្តិ៍រមនាបានចុះទៅកន្លែងកើតហេតុកាលពីព្រឹកថ្ងៃអាទិត្យ ៨កើត ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២២ ខែមេសា ឆ្នាំ២០១៨ ជាមួយនឹងមន្ត្រីបរិស្ថាន និងអាជ្ញាធរពាក់ព័ន្ធជាច្រើនរូបដើម្បីពិនិត្យផងដែរ ។
លោក សុធារី បានឲ្យដឹងថា ដំរីនេះបានចុះប្រេង និងរើដាច់ច្រវាក់ ហើយបានបំផ្លាញដំណាំពលរដ្ឋក្នុងភូមិពូតាំងនៅថ្ងៃទី ២៥ និង ២៦ ខែមីនាកន្លងមក និងមានការរាយការណ៍សុំអន្តរាគមន៍ទៅអង្គការសម្ព័ន្ធភាពសត្វព្រៃ (ហៅថាវ៉ាយអេដ) ។ នៅថ្ងៃទី ២៧ ក្រុមការងាររបស់អង្គការក៏បានចុះទៅបាញ់ថ្នាំសណ្តំ ដើម្បីឲ្យម្ចាស់ឈ្មោះ ចុច ចេល ចាប់ចងនៅក្នុងព្រៃដីចម្ការរបស់គាត់។
លោកថាចាប់ចងរហូតមកដល់ថ្ងៃទី ២១ បើតាមការសន្និដ្ឋានដោយសារដាច់អាហាហើយដំរីក៏ធ្លាក់ខ្លួនឈឺបណ្តាលឲ្យងាប់តែម្តង។
ម្ចាស់មិនសូវយកចិត្តទុកដាក់ព្រោះ ខ្លាចដំរីធ្វើបាបព្រោះធ្លាប់មានដំរីចុះប្រេងជាន់ម្ចាស់ស្លាប់កាលពីឆ្នាំ២០១៧កន្លងទៅនៅក្នុងភូមិពូតាំងដដែលត្រូវបានអាជ្ញាធរមានសមត្ថកិច្ចបាញ់សម្លាប់ក្រោយពេលដែលវាបានចុះប្រេងហើយជាន់ម្ចាស់ស្លាប់និង បំផ្លាញទ្រព្យសម្បត្តិអ្នកភូមិ និងបង្កការភ័យខ្លាច។
លោកនាយប៉ុស្តិ៍ក៏បានឲ្យដឹងបន្ថែមថា ក្រោយពេលដំរីងាប់ម្ចាស់វានិងសាច់ញាតិបានជួបជុំគ្នាធ្វើការសែនព្រេនតាមលក្ខណៈប្រពៃណីដើម្បីកប់ដំរីនោះនៅក្នុងព្រនោះតែម្តង។
តាមប្រភពថាដំរីនេះក្រោយពេលចាប់ចងបានវិញម្ចាស់បានដាក់ដើមចេកឲ្យស៊ីដែរតែវាមិនសូវស៊ីចំណីទេ។
ដំរីនេះក៏ជាដំរីមួយក្បាលដែលម្ចាស់ធ្លាប់យកទៅដឹកភ្ញៀវទេសចរកម្សាន្តផងដែរ។
លោក ទ្រី ស៊ីថេង ជាប្រធានផ្នែកថែទាំសត្វនៅឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ស្ថិតនៅក្នុងខេត្តតាកែវបានឲ្យដឹងថា មន្ត្រីរដ្ឋបាលព្រៃឈ្រើក្រោមកិច្ចសហការជាមួយអង្គការសម្ព័ន្ធភាពសត្វព្រៃបានជួយបាញ់ថ្នាំធ្វើឲ្យដំរីនោះសន្លប់ ដើម្បីចាប់យកទៅចងនៅនឹងដើមឈើមួយ ហើយឲ្យម្ចាស់ជាអ្នកមើលការខុសត្រូវ។
លោកបន្តថាសត្វដំរីដែលងាប់នេះគឺបណ្តាលមកពីការខ្វះការថែទាំពីម្ចាស់ដូចជាខ្វះចំណី ពិសេសគឺទឹកនៅក្នុងរដូវក្តៅនេះ។
ដំរី ១ ក្បាលត្រូវការផឹកទឹកជាង ១០០ លីត្រក្នុង ១ ថ្ងៃ និងទឹកសម្រាប់វាងូតនិងលេងជាច្រើនទៀតផង។
លោក ងិន សុវិមាន ប្រធានមន្ទីរទេសចរណ៍នៃខេត្តមណ្ឌលគិរីបានឲ្យដឹងថា នៅក្នុងភូមិពូតាំងមានដំរីប្រមាណជា ១០ ក្បាលបម្រើក្នុងវិស័យ ដែលប្រើប្រាស់សម្រាប់ដឹកភ្ញៀវទេសចរណ៍សម្រាប់ដំណើរកម្សាន្តទៅតាមតំបន់នានាមួយចំនួននាពេលកន្លងមក។
ពេលបច្ចុប្បន្ននេះម្ចាស់ដំរីមានការយល់ដឹងច្រើនដោយមិនសូវឲ្យដំរីដឹកភ្ញៀវទេសចរនោះទេ តែឲ្យភ្ញៀវទៅមើលកម្សាន្ត ងូតទឹកឲ្យ ឬឲ្យចំណីតែប៉ុណ្ណោះ៕ ជីវន្ត
