ព័ត៌មានទាន់ហេតុការណ៍៖

អាមេរិកដកខ្លួនចេញពីអង្គការ WTO៖ គ្មានអាមេរិកទីផ្សារពិភពលោកនៅតែបើកទ្វារ

ចែករំលែក៖

ប្រធានាធិបតីអាមេរិក ដូណាល់ ត្រាំ កំពុងតែខិតខំ «កាច់បំបាក់» នូវសមិទ្ធផល នានា ដែលប្រធានាធិបតីអាមេរិកជាច្រើន រូបច្រើនជំនាន់ បានខិតខំបង្កើតឡើង ដោយសារតែលោកត្រាំ ព្យាយាមអនុវត្តគោលនយោបាយអាមេរិកជាដំបូងរបស់ ខ្លួន។

ក្រោយពេលលោកត្រាំ បានដកអាមេ រិកចេញពីកិច្ចព្រមព្រៀងពាណិជ្ជកម្មឆ្លង ទ្វីបTPP ក៏ដូចជាស្នើឲ្យពិភាក្សាឡើងវិញ នូវកិច្ចព្រមព្រៀងពាណិជ្ជកម្មសេរី អាមេរិក ខាងជើង NAFTA លោកត្រាំ ក៏បានបន្ត ប្រកាសសង្គ្រាមជាមួយអង្គការពាណិជ្ជ កម្មពិភពលោក WTO ប្រសិនបើអង្គការនេះមិនមានការយោគយល់ដល់អាមេរិក ក៏ដូចជាត្រួតពិនិត្យឡើងវិញ នូវច្បាប់មួយចំនួនដែលរដ្ឋាភិបាលអាមេរិកថាមិនមានតម្លាភាពសម្រាប់ទីក្រុងវ៉ាស៊ីនតោន។ បើ អង្គការ WTO មិននៅខាងអាមេរិកទេ លោកត្រាំនឹងដកអាមេរិកចេញពីអង្គការពាណិជ្ជកម្មពិភពលោកមួយនេះ។

សារព័ត៌មាន Bloomberg បានផ្សាយ ថា ការដែលអង្គការ WTO ត្រូវបាន បង្កើតឡើងនៅឆ្នាំ១៩៩៤ ដោយមានការ ខិតខំរបស់ប្រទេសជាច្រើន ដែលដឹកនាំ ដោយអាមេរិក ក្នុងគោលដៅបង្កើតវេទិកាដើម្បីដោះស្រាយ វិវាទពាណិជ្ជកម្ម ។ ប៉ុន្ត ែកន្លងមកមន្ត្រីអាមេរិក មិនពេញចិត្តទៅលើសកម្មភាពរបស់ចៅក្រម WTO ដែលតែងតែចេញសេចក្តីសម្រេចអវិជ្ជមានដល់អាមេរិក មិនគាំទ្រអាមេរិក ពិសេសគឺនៅ ក្នុងការលក់បំផ្លាញតម្លៃ ។

សារព័ត៌មាន Bloomberg បានដកស្រង់របាយការណ៍ពីមជ្ឈមណ្ឌលស្រាវជ្រាវ CATO មានទីតាំងនៅទីក្រុងវ៉ាស៊ីនតោន ដែលបង្ហាញឲ្យឃើញថា បណ្តាប្រទេស ដែលបានដាក់ពាក្យតវ៉ាឡើងទៅកាន់ WTO តែងតែទទួលបានជ័យជម្នះចំណែកអ្នកជាប់ចោទត្រូវចាញ់ជានិច្ច ។ កន្លងមក អាមេរិក បានចាញ់នៅក្នុងការប្តឹងផ្តល់នៅ WTO មានរហូតដល់ទៅជាង៩០ភាគរយ ។

ពិតជារឿងមួយគួរឲ្យអាម៉ាស់ខ្លាំងណាស់សម្រាប់អាមេរិក ក្រោយពេលប្រធានា ធិបតីដូណាល់ ត្រាំបានប្រកាសថា លោកនឹងដកអាមេរិកចេញពីអង្គការពាណិជ្ជកម្មពិភពលោក WTO ប្រសិនបើអង្គការនេះ មិនគាំទ្រអាមេរិកនោះ ។ លោកត្រាំ ក៏ បានថ្កោលទោស ទៅលើអង្គការពាណិជ្ជ កម្មកំពូលមួយនេះផងដែរ ។

ក្រុមអ្នកឯកទេសបានលើកឡើងថា ប្រសិនបើអាមេរិកដកខ្លួនចេញពីអង្គការពាណិជ្ជកម្មពិភពលោកនោះ ប្រទេសនេះ នឹងក្លាយជា «មហាអំណាចឯកា»លើឆាក អន្តរជាតិ ។ កន្លងមកអាមេរិក ក៏បានដក ខ្លួនចេញពីអង្គការកំពូលៗរបស់ពិភពលោក និងកិច្ចព្រមព្រៀងជាច្រើន ក្នុងរយៈពេលជិតពីរឆ្នាំនៃការកាន់អំណាចដឹកនាំអាមេរិករបស់លោក ត្រាំ ។ កន្លងមកលោកត្រាំបានដកអាមេរិកចេញពីអង្គការសិទ្ធិ មនុស្សអន្តរជាតិ ដោយសារតែអង្គការនេះមិនគាំទ្រអាមេរិក នៅក្នុងបញ្ហាអីុស្រាអែល និងហ្ស៊េរុយសាឡឹម, ដកខ្លួនចេញពីអង្គ ការ UNESCO , ដកខ្លួនចេញពីកិច្ចព្រមព្រៀងអាកាសធាតុទីក្រុងប៉ារីសដែលមានប្រទេសជិត២០០ បានចុះកិច្ចព្រមព្រៀង ។ ដកខ្លួនចេញពីកិច្ចព្រមព្រៀងបរមាណូអីុរ៉ង់ ដែលមានប្រទេសចុះហត្ថលេខាដល់ទៅ៧ប្រទេសផងដែរ ។

សារព័ត៌មាន Bloomberg បានដក ស្រង់សម្តីលោកត្រាំ ដែលបានបញ្ជាក់ថា «ប្រសិនបើអង្គការពាណិជ្ជកម្មពិភពលោកមិនកែប្រែ ខ្ញុំនឹងដកអាមេរិកចេញពី WTO »។ ការដែលអាមេរិកដកខ្លួនចេញពីអង្គការ WTO នឹងជះឥទ្ធិពលអាក្រក់បំផុតដល់សេដ្ឋកិច្ចពិភពលោក ជាងសង្គ្រាម ពាណិជ្ជកម្មរវាងចិន នឹងអាមេរិកទៅទៀត ដោយបានបំផ្លាញប្រព័ន្ធពាណិជ្ជកម្ម ដែលអាមេរិកខិតខំចំណាយកម្លំាងក្នុងការបង្កើតឡើង បន្ទាប់ពីសង្គ្រាមលោកលើកទីពីរ។

កាលពីខែកក្កដា កន្លងមក ប្រធានា ធិបតីដូណាល់ ត្រាំបានប្រកាសថា អាមេ រិកជួបនូវបញ្ហាជាច្រើននៅក្នុងអង្គការ ពាណិជ្ជកម្មពិភពលោក ដោយអង្គការនេះ មិនផ្តល់តម្លាភាព គាំទ្រដល់អាមេរិកជា ច្រើនឆ្នាំកន្លងមក ។ លោកត្រាំបញ្ជាក់ថា អង្គការមួយនេះគួរតែផ្លាស់ប្តូរ វិធីសាស្ត្រ របស់ខ្លួន៕ ម៉ែវ សាធី


ចែករំលែក៖