ព័ត៌មានទាន់ហេតុការណ៍៖

អូឡាំពិក ប្រកាសអ្នកឈ្នះរង្វាន់២នាក់ ទៅទស្សនាស៊ីហ្គេមនៅម៉ាឡេស៊ី

ចែករំលែក៖

ភ្នំពេញ៖ ក្រោយពីសមាជិកប្រតិបត្តិ របស់គណៈកម្មាធិការជាតិអូឡាំពិកកម្ពុជា បានប្រជុំសម្រេចកែលម្អឡើងវិញ នូវគេហទំព័រថ្មី គឺ nocc.org.kh នោះក្នុងគោលបំណងផ្តល់ជំនឿចិត្ត ដល់មហាជន ក្នុងការរាយការណ៍ ព័ត៌មានកីឡា ពិសេសព័ត៌មានដែលពាក់ព័ន្ធព្រឹត្តិការណ៍កីឡា នៅក្រៅប្រទេស ដូចជា អាស៊ានហ្គេម អាស៊ីហ្គេម និងអូឡាំពិកហ្គេមជាដើម។

លោក វ៉ាត់ ចំរើន អគ្គលេខាធិការ NOCC បានឲ្យដឹងថា គេហទំព័រថ្មីនេះ គឺជាផ្នែកមួយក្នុងការផ្សព្វផ្សាយរាល់ដំណឹងកីឡា ក្រោយពីសមាជិកប្រតិបត្តិ NOCC បានអនុម័តបង្កើត និងដំណើរការផ្សាយ ដើម្បីផ្តល់ព័ត៌មានកីឡាពិតដល់មហាជនអាចជឿទុកចិត្តបាន ។ ដូច្នេះអូឡាំពិកបាន រៀបចំកម្មវិធីផ្សងសំណាងមួយ សម្រាប់អ្នកស្នេហាវិស័យកីឡានៅកម្ពុជា៦នាក់ទៅទស្សនាការប្រកួតកីឡាស៊ីហ្គេមនៅប្រទេសម៉ាឡេស៊ី រយៈពេល ៣ថ្ងៃ បន្ទាប់ពីពួកគាត់បានចុះឈ្មោះ ចូលជាសមាជិកគេហទំព័រថ្មីរបស់អូឡាំពិកកម្ពុជា។ អគ្គលេខាធិកាNOCC ក៏បានអំពាវនាវ ដល់ពលរដ្ឋទូទៅមកចុះឈ្មោះចូលជាសមាជិកគេហទំព័រថ្មីរបស់ខ្លួនដើម្បីទទួលបានអត្ថប្រយោជន៍ជាច្រើន គ្រប់កម្មវិធីកីឡារបស់អូឡាំពិកកម្ពុជា។

លោកអគ្គលខាធិការបានមានប្រសាសន៍ថា៖ “ការចាប់ឆ្នោតលើដំបូងនេះ អូឡាំពិករកឃើញអ្នកឈ្នះរង្វាន់២នាក់ក្នុងចំណោមមហាជនដែលជាសមាជិករបស់ អូឡាំពិកកម្ពុជាតាមរយៈការចុះឈ្មោះនៅតាមគេហទំព័រថ្មី (nocc.org.kh) របស់ NOCC” ។ អ្នកដែលឈ្នះសំបុត្រទាំងពីរមានលេខសម្គាល់ ឬ TICKET ID: PXEP2DU70U2H91 និងម្នាក់ទៀតមានលេខសម្គាល់TICKET ID៖ ROXEW87MFM8RMX ។

លោកវ៉ាត់ ចំរើន បានបន្តថា សមាជិកដែលឈ្នះរង្វាន់ទាំងពីរខាងលើ នឹងរីករាយជាមួយការធ្វើដំណើរទៅកាន់ប្រទេសម៉ាឡេស៊ី ក្នុងពិធីបើកព្រឹត្តិការណ៍ស៊ីហ្គេមលើកទី២៩ និងការប្រកួតកីឡាដែលពួកគេចង់ទស្សនាក៏ដូចជាការស្នាក់នៅ ៣ថ្ងៃ ២យប់រាល់ករចំណាយ ជាបន្ទុក របស់គណៈកម្មាធិការជាតិអូឡាំពិកកម្ពុជា ។

ដោយឡែកការចាប់ឆ្នោតផ្សេងសំណាងលើកទី២ធ្វើនៅថ្ងៃទី២ ខែសីហានេះ ដើម្បីចូលរួមការផ្សងសំណាង លោកអ្នកគ្រាន់តែចុះឈ្មោះជាសមាជិក NOCC Club តាមរយៈគេហទំព័រ www.nocc.org.kh/register ខណៈដែលគេហទំព័រនេះត្រូវបានបង្កើតឡើងសម្រាប់ផ្ដល់ព័ត៌មានជុំវិញព្រឹត្តិការណ៍កីឡានានាទាំងថ្នាក់ជាតិ និងអន្ដរជាតិឲ្យដល់ដៃប្រជាពលរដ្ឋខ្មែរក្នុងសម័យទំនើបកម្មនេះ ។ មិនត្រឹមតែប៉ុណ្ណោះ NOCC បាគ្រោងបង្កើត App (Application) ផ្ដល់ព័ត៌មានតាមរយៈស្មាតហ្វូនផងដែរ៕ សារីម


ចែករំលែក៖