សារព័ត៌មាន នគរវត្ត តែងតែនាំមុខគេជានិច្ច
យន្តហោះចម្បាំងអ៊ីស្រាអែល ស្រាប់តែបាញ់ប្រហារតាមដែនអាកាសដោយមីស៊ីល សំដៅទៅលើទីតាំងឃ្លាំងអាវុធ នៅជិតទីក្រុង Damascus កាលពីរសៀល ថ្ងៃទី២៥ ខែធ្នូ របួសទាហាន៣នាក់ ។ ប្រភពពីយោធាស៊ីរី អះអាងថា មីស៊ីលជាច្រើនគ្រាប់ត្រូវប្រព័ន្ធការពារដែនអាកាសរបស់ស៊ីរីបាញ់ទម្លាក់ ។
ក្រុមសង្កេតការសិទ្ធិមនុស្សស៊ីរីមូលដ្ឋាននៅចក្រភពអង់គ្លេសនិយាយថា យន្តហោះចម្បាំងអ៊ីស្រាអែលវាយប្រហារគោលដៅ៣កន្លែង ភាគខាងត្បូងទីក្រុង Damascus ដែលជាទីតាំងឃ្លាំងអាវុធរបស់ក្រុម ពួកឧទ្ទាម Hezbollah លីបង់ និងកងកម្លាំងអ៊ីរ៉ង់។
នេះជាដំណឹងវាយប្រហារលើកទីមួយនៅជិតរដ្ឋធានី Damascus ក្រោយពីដូណាល់ ត្រាំ ប្រកាសដក់ទាហានអាមេរិក២ពាន់នាក់ចេញពីទឹកដីស៊ីរី ។
ក្រោយការប្រកាសរបស់ប្រធានាធិបតីអាមេរិកដកកងទ័ពនេះភ្លាម មេដឹកនាំអ៊ីស្រាអែល បែន ចាមីន ណេតាន់យ៉ាហ៊ូ ថ្លែងថា អ៊ីស្រាអែលនឹងមិនបញ្ឈប់សកម្មភាពវាយប្រហារប្រឆាំងទៅនឹងការប៉ុនប៉ងរុលខ្លួនចូលរបស់ទាហានអ៊ីរ៉ង់នៅក្នុងទឹកដីស៊ីរីនោះទេ ។
ប្រភពពីក្រសួងការពារជាតិអ៊ីស្រាអែលថា មីស៊ីលបានបាញ់ចេញពីបន្ទាយកងទ័ពជើងអាកាសLebanese ហើយត្រូវបានគេបាញ់ទម្លាក់អស់ជាច្រើនគ្រាប់ ទម្រាំបានចូលទៅដល់គោលដៅ បំផ្លាញទីតាំងឃ្លាំងអាវុធនោះ ។
អ្នកនាំពាក្យកម្លាំងយោធាអ៊ីស្រាអែលមិនបានបញ្ជាក់អំពីការការវាយឆ្មក់នេះទេ ប៉ុន្តែក្នុងសេចក្តីថ្លែងការណ៍មួយបាននិយាយថា ប្រព័ន្ធការពារដែនអាកាសអ៊ីស្រាអែលបានប្រតិបត្តិការការពារប្រឆាំងទប់ទល់ជាមួយមីស៊ីលប្រឆាំងយន្តហោះចម្បាំង ដែលបាញ់ចេញពីទឹកដីស៊ីរី ហើយថា គ្មានការខូចខាត ឬគ្រោះថ្នាក់ណាមួយដោយសារអ៊ីស្រាអែលនោះទេ ។
គេបានជឿជាក់ថា អ៊ីស្រាអែលជាអ្នកនៅពីក្រោយខ្នងការវាយប្រហារតាមដែនអាកាសច្រើនគ្រាមកហើយ គៅលដៅទៅលើកម្លាំងអ៊ីរ៉ង់ និងក្រុម Hezbollah ដែលធ្វើសមរភូមិជាមួយទាហានស៊ីរី ហើយការវាយប្រហារចុងក្រោយបំផុត គឺនៅថ្ងៃទី២៩ ខែវិច្ឆិកា ។
រុស្ស៊ីបានប្រកាសផ្តល់ជូនប្រព័ន្ធមីស៊ីលការពារ S-300 ទៅឲ្យរដ្ឋាភិបាលស៊ីរីកាលពីខែតុលា ក្រោយពីយន្តហោះឈ្លបយកការណ៍របស់រុស្ស៊ី ត្រូវបានច្រឡំបាញ់ទម្លាក់កាលពីថ្ងៃទី១៧ ខែកញ្ញា ដោយកងកម្លាំងទាហានស៊ីរី ខណៈកំពុងបាញ់តបតជាមួយមីស៊ីលអ៊ីស្រាអែលដែលបាញ់ពីអាកាស៕
