ព័ត៌មានទាន់ហេតុការណ៍៖

ប្រជាពលរដ្ឋ​ចាប់​បាន​ជនសង្ស័យ​ឆក់​ទូរស័ព្ទ​ពី​នារី​ម្នាក់​វាយ​ឡើង​ទ្រោម​ខ្លួន​ ខណៈ​ពួក​គេ​ជិះ​គេចខ្លួន​ក៏​ជ្រុល​បុក​រថយន្ត​មួយ​គ្រឿង​

ចែករំលែក៖

​ភ្នំពេញ​ ៖​ ជនសង្ស័យ​ ២ ​នាក់​ត្រូវ​បាន​បងប្អូន​ប្រជាពលរដ្ឋ​វាយ​ម្នាក់​មួយ​ដៃ​មួយ​ជើង​ឡើង​ទ្រោម​ខ្លួន​ ខណៈ​ដែល​ពួក​គេ​ធ្វើ​សកម្មភាព​ឆក់​ទូរស័ព្ទ​ពី​នារី​ម្នាក់​ ហើយ​បាន​ព្យាយាម​ជិះ​គេចខ្លួន​ក៏​ជ្រុល​បុក​ជាមួយនឹង​រថយន្ត​មួយ​គ្រឿង​ ហើយ​បើ​កុំ​តែ​កម្លាំង​កងរាជអាវុធហត្ថ​ខណ្ឌដូនពេញ​ ទៅ​ធ្វើការ​អន្តរាគមន៍​ទាន់​ពេលវេលា​មិនដឹង​ទៅ​ជា​យ៉ាងណា​នោះ​ទេ​ ។​

​ហេតុការណ៍​នេះ​បាន​កើតឡើង​កាលពី​វេលា​ម៉ោង​៧​និង​៤៥​នាទី​យប់​ថ្ងៃ​ទី​៨​ ខែកុម្ភៈ​ ឆ្នាំ​២០១៥​ នៅ​ចំណុច​មុខ​ក្រុមហ៊ុន​សែ​ល​កាត​ តាម​បណ្តោយ​ផ្លូវ​ព្រះ​សីហ​នុ​ ស្ថិត​ក្នុង​សង្កាត់​ចតុមុខ​ ខណ្ឌដូនពេញ​ ។​

នារី​រង​គ្រោះ​មានឈ្មោះ​ ទេស​ ចរិយា​ អាយុ​២២​ឆ្នាំ​ មាន​ទីលំនៅ​បច្ចុប្បន្ន​ផ្ទះ​លេខ​B3​ ផ្លូវ​លេខ​២០០៤​ ភូមិ​ត្រពាំង​ល្វា​ សង្កាត់​កា​កាប​ ខណ្ឌ​ពោធិ៍​សែន​ជ័យ​ ។​ រីឯ​ជនសង្ស័យ​២​នាក់​ខាងលើ​ម្នាក់​ឈ្មោះ​ ង៉ែត​ ចាន់​បូ​លី​ អាយុ​២២​ឆ្នាំ​ បច្ចុប្បន្ន​ស្នាក់​នៅ​សង្កាត់​ផ្សារ​កណ្តាល​ទី​១​ ខណ្ឌដូនពេញ​ មានស្រុក​កំណើត​នៅ​ឃុំ​កោះសូទិន​ ស្រុក​កោះសូទិន​ ខេត្តកំពង់ចាម​ និង​ម្នាក់​ទៀត​ឈ្មោះ​លី​ ជី​មី​ អាយុ​២២​ឆ្នាំ​បច្ចុប្បន្ន​ស្នាក់​នៅ​សង្កាត់​ផ្សារ​កណ្តាល​ទី​១​ ខណ្ឌដូនពេញ​។​

នារី​រង​គ្រោះ​បាន​រៀបរាប់​ឱ្យ​ដឹង​ថា​ នៅ​មុន​ពេល​កើតហេតុ​រូប​នាង​បាន​ជិះ​ម៉ូតូ​សេ​១២៥​ព​ណ៍​ខ្មៅ​ ពាក់​ស្លាក​លេខ​កណ្តាល​ 1F-8115​ ទើបតែ​ចេញពី​ធ្វើការ​ជិះ​តាម​បណ្តោយ​ផ្លូវ​ព្រះ​សីហ​នុ​ ទិស​ដៅ​ពី​កើត​ទី​លិច​ ។​ ខណៈ​មក​ដល់​ចំណុច​មុខ​ក្រុមហ៊ុន​សែ​ល​កាត​ បាន​ឈប់​រួច​ដក​ទូរស័ព្ទ​ចេញពី​ក្នុង​កាបូប​ដើម្បី​និយាយ​ ភ្លាមៗ​នោះ​ស្រាប់តែ​មាន​ជនសង្ស័យ​២​នាក់​ខាងលើ​ បាន​ជិះ​ម៉ូតូ​ស្ទេ​ប​ព​ណ៍​ខ្មៅ​ ពាក់​ស្លាក​លេខ​ភ្នំពេញ​1BL-3132​ មក​អែប​កៀន​ក្បែរ​នឹង​រូប​ខ្លួន​ ហើយ​បាន​ធ្វើ​សកម្មភាព​ឆក់​ទូរស័ព្ទ​តែ​ម្តង​ ។​

ប្រភព​បន្ត​ថា​ ក្រោយ​ពី​ធ្វើ​សកម្មភាព​ពួក​គេ​បាន​ព្យាយាម​ជិះ​គេចខ្លួន​ ប៉ុន្តែ​បាន​ប្រមាណ​ជា​៥០​ម៉ែត្រ​ ដោយ​មានការ​ស្លន់​ស្លរ​និង​ការ​ស្រែក​ឆោ​រ​ឡោ​ឡើង​ថា​ចោរៗ​នោះ​ គេ​ក៏​បាន​ជិះ​ទៅ​ពីក្រោយ​រថយន្ត​មួយ​គ្រឿង​បណ្តាល​ឱ្យ​ដួល​ ហើយ​ត្រូវ​បាន​ប្រជាពលរដ្ឋ​ នាំ​គ្នា​ព្រួត​វាយ​ម្នាក់​មួយ​ដៃ​មួយ​ជើង​ឡើង​ទ្រោម​ខ្លួន​ ហើយ​បើ​កុំ​តែ​កម្លាំង​កងរាជអាវុធហត្ថ​ខណ្ឌដូនពេញ​ទៅ​ធ្វើការ​អន្តរាគមន៍​ទាន់​ពេលវេលា​មិនដឹង​ទៅ​ជា​យ៉ាងណា​នោះ​ទេ​ ។​

​បច្ចុប្បន្ន​ជនសង្ស័យ​២​នាក់​ខាងលើ​ត្រូវ​បាន​យក​ទៅ​ឃុំខ្លួន​ជា​បណ្តោះអាសន្ន​នៅ​មូលដ្ឋាន​កង​រាជ​អាវុធ​ ហត្ថ​ខណ្ឌដូនពេញ​ ដើម្បី​ធ្វើការ​សាកសួរ​បន្ត​និង​កសាង​សំណុំរឿង​ចាត់ការ​ទៅ​តាម​ផ្លូវច្បាប់​ ៕

P2

P1


ចែករំលែក៖