សារព័ត៌មាន នគរវត្ត តែងតែនាំមុខគេជានិច្ច
ការបោះឆ្នោតនៅក្នុងសភាពីរលើកកន្លងមកស្តីពីគម្រោងចាកចេញពីអឺរ៉ុប របស់អង់គ្លេស បន្តបរាជ័យ ធ្វើឲ្យរដ្ឋមន្ត្រីទាំងអស់ ដាក់គំនាបទៅលើនាយករដ្ឋមន្ត្រីឲ្យលាលែងចេញពីតំណែង ។
នាយករដ្ឋមន្ត្រីអង់គ្លេស លោកស្រី Theresa May ប្រឈមនឹងការលាលែងចេញពីតំណែង ក្រោយពេល ដែលរដ្ឋមន្ត្រី១១រូប ក្នុងគណៈរដ្ឋមន្ត្រី បានដាក់គំនាប់ទៅលើ នាយករដ្ឋមន្ត្រី ឲ្យលាលែងចេញពីតំណែង បន្ទាប់ពី គម្រោងចាកចេញពីអឺរ៉ុប របស់លោកស្រីត្រូវសភា ច្រានចោល ២លើកកន្លងមក។ គណៈរដ្ឋមន្ត្រីអង់គ្លេសចង់រកបុគ្គលថ្មីមកជំនួសលោកស្រី May ដើម្បីដោះស្រាយបញ្ហា Brexit ។
នៅពេលនេះ គេមិនទាន់ដឹងថា ការចាកចេញពីអឺរ៉ុប របស់អង់គ្លេសនឹងទៅជាយ៉ាងណានោះឡើយ បើទោះបីមានការខិតខំ រយៈពេលកន្លងមក។
ការចាកចេញពីអឺរ៉ុប របស់អង់គ្លេស កំពុងតែបង្កឲ្យមានវិបត្តិកាន់តែខ្លាំងនៅក្នុងប្រទេសនេះ ។ កាលពីថ្ងៃទី២៤ ខែមីនា មានពលរដ្ឋប្រមាណ១លាននាក់ នាំគ្នាដង្ហែក្បួនបាតុកម្ម ប្រឆាំងការចាកចេញរបស់អង់គ្លេស ដោយស្នើឲ្យបោះឆ្នោតប្រជាមតិជាលើកទីពីរ ។ ការធ្វើបាតុកម្មកន្លងមក មានទ្រង់ទ្រាយធំបំផុត មិនធ្លាប់មាន ចាប់តាំងពីឆ្នាំ២០០៣ មកទល់ពេលនេះ។ បាតុកម្មកាលពីឆ្នាំ២០០៣ គឺស្នើដល់អង់គ្លេសដកទាហានចេញពីសង្គ្រាមនៅអ៊ីរ៉ាក់ ។
នៅក្នុងមហាបាតុកម្មកាលពីចុងសប្តាហ៍កន្លងមក នៅអង់គ្លេស គឺឃើញមាន អ្នកនយោបាយល្បីៗជាច្រើនចូលរួម ក្នុងនោះមានទាំង អភិបាលក្រុងឡុងផងដែរ។ ជាមួយគ្នានេះ គេហទំព័ររបស់សភាអង់គ្លេស ទទួលបានការចុះហត្ថលេខាពីពលរដ្ឋជាង ៤លាននាក់ស្នើឲ្យលុប Brexit ៕
