Khmer
English
Chinese
Frence
Vietnamese
Thaiគួរនៅឱ្យឆ្ងាយពីបារីដើម្បីសុខភាពមាំមួន
ដោយ ៖ លី ហ៊ាង|ថ្ងៃទី 22 ឧសភា 2011 ម៉ោង 14:52:50
ភ្នំពេញ៖ អ្នកជក់បារីមានផលប៉ះពាល់ធ្ងន់ធ្ងរ២យ៉ាង ទី១-កត្ដាចម្បងបញ្ហាសុខភាព ទី២-គឺដុតលុយចោលតែម្ដង។ បច្ចុប្បន្នគេបានសង្កេតឃើញប្រព័ន្ធផ្សព្វផ្សាយមួយចំនួននៅតែដាក់តាំងផ្សាយពាណិជ្ជកម្មបារី បើទោះគេដឹងថាបារីធ្វើឱ្យប៉ះពាល់ដល់សុខភាពប្រជាពលរដ្ឋអ្នកជក់ក៏ដោយ។
តាមរបាយការណ៍របស់អ្នកវិទ្យាសាស្ដ្រចំនួន៣០ ពីប្រទេសចំនួន១០ ដោយរៀបចំឡើងពីវិទ្យាស្ថានស្រាវជ្រាវជំងឺមហារីកអន្ដរជាតិ (IARC) ក្រោមការគាំទ្រពីអង្គការសុខភាពពិភពលោក ឱកាសប្រជុំក្នុងអំឡុងខែតុលាឆ្នាំមុននោះ ទាក់ទងនឹងជំងឺមហារីក និងការជក់បារីបានបង្ហាញថា ការជក់បារីជាមូលហេតុនៃជំងឺមហារីកប្រភេទថ្មី៥ប្រភេទ គឺមហារីកពោះវៀនធំ មហារីកអូរវែរ៍ មហារីកសុដន់ មហារីកថ្លើម។ ចំពោះទារកដែលឪពុកម្ដាយជក់បារី នឹងកើតមហារីកគ្រាប់ឈាមសចំពោះឪពុកម្ដាយដែលជក់បារីមុនពេលមានគភ៌។ ចំពោះអ្នកស្រូបផ្សែងបារីពីគេ គឺមហារីកបំពង់ក និងប្រអប់សំឡេង។
ចំពោះមហារីកដែលត្រូវបានប្រកាសថា ជាលទ្ធផលនៃការជក់បារីមុននេះ មាន១០ប្រភេទ គឺមហារីកសួត, មហារីកមាត់, មហារីកបំពង់ក, និងប្រអប់សំឡេង, មហារីកបំពង់អាហារ, មហារីកក្រពះ មហារីកលំពែង, មហារីកគ្រាប់ឈាមស, មហារីកតម្រងនោម, មហារីកបោ្លកនោម និងមហារីកមាត់ស្បូន គ្រាដែលវិទ្យាស្ថានមហារីកជាតិរបស់សហរដ្ឋអាមេរិកបានប្រកាសថា ៣៥ភាគរយនៃមហារីកទាំងអស់ គឺជាលទ្ធផលបណ្ដាលមកពីការជក់បារី និងស្រូបផ្សែងបារី។
តាមការស្រាវជ្រាវផ្សេងទៀតបានបង្ហាញថា អ្នកផ្ទុកមេរោគហ៊ីវ ឬអេដស៍ ដែលជក់បារីប្រឈមនឹងការកើតមហារីកសួតខ្ពស់ជាងមនុស្សធម្មតា។ លទ្ធផលស្រាវជ្រាវរបស់វិទ្យាស្ថានវេជ្ជសាស្ដ្រសហរដ្ឋអាមេរិកក្នុងរដ្ឋកាលីហ្វ័រ ញ៉ា បានរកឃើញថាស្ដ្រីដែលផ្ទុកមេរោគអេដស៍បើកាន់តែជក់បារីនោះ វារឹតតែប្រឈមនឹងការកើតជំងឺមហារីកសួត ខ្លាំងជាងក្រុមដែលមិនផ្ទុកមេរោគអេដស៍រាប់សិបដង ក៏ព្រោះតែប្រពន្ធការពាររាងកាយអ្នកផ្ទុកមេរោគអេដស៍ធ្វើការខ្សោយជាងអ្នកដែលមិនផ្ទុក។
ក្រុមអ្នកស្រាវជ្រាវបានរកឃើញថា អ្នកជក់បារី និងពិសាស្រាអាចបំផ្លាញសុខភាពដោយមិនដឹងខ្លួនពីសមត្ថភាពផ្លូវភេទតែម្ដង ពិសេសមនុស្សវ័យចំណាស់។ ការជក់បារីមានជាតិនីកូទីន (Nicotin) បង្កឱ្យកើតមានជំងឺសួតបេះដូង និងជំងឺសរសៃឈាម។ ពិសេសសរសៃឈាមនេះតែម្ដងដែលមិនអាចឱ្យឈាមធ្វើចលនាបានដូចប្រក្រតី ក្នុងនោះអាចបណ្ដាលឱ្យស្ទះសរសៃឈាមខួរក្បាល និងមិនអាចបញ្ជូនឈាមហូរទៅដល់សរសៃឈាមនៃលិង្គ។ ដោយសារតែបញ្ហានេះហើយទើបមានការប៉ះពាល់ដល់ភាពងើបរឹងរបស់លិង្គដែលមិនអាចរួមរ័កដូចធម្មតាដូចកាលពីមុនទៀតទេ។
ម្យ៉ាងទៀតអ្នកជក់បារី ក៏តែងតែកើតអាការៈស្ដ្រេសដែលនាំឱ្យបុរសឃ្លាតឆ្ងាយពីការនឹកឃើញរួមភេទ ហើយក៏មិនបានធ្វើលំហាត់លិង្គថែមទៀតនាំឱ្យលិង្គទន់រងៀកមិនដំណើរការ។
បញ្ហាផលប៉ះពាល់ពីការជក់បារី និងពិសាគ្រឿងស្រវឹងនេះ គឺគេបានដឹងតាមរយៈសេចក្ដីប្រកាសដែលធ្វើឡើងនៅក្នុងសន្និសីទកាសែតមួយរវាងអង្គការសុខភាពពិភពលោក (WHO) ជាមួយនឹងរដ្ឋមន្ដ្រីក្រសួងសុខាភិបាល ម៉ម ប៊ុនហេង នៅទីស្ដីការគណៈរដ្ឋមន្ដ្រីកាលពីថ្ងៃទី២០ ខែមករា ឆ្នាំ២០១០។
ប្រធានអង្គការ WHO បានថ្លែងបន្ថែមថាក្រៅតែពីការចំណាយលុយដ៏ក្រាស់ក្រែលទិញបារី ពលរដ្ឋកម្ពុជា-អ្នកជក់បារីត្រូវចំណាយលុយដើម្បីព្យាបាលជំងឺ។ លោកបញ្ជាក់ថា ការជក់បារីបណ្ដាលឱ្យកើតជំងឺជាច្រើនដូចជាដាច់សរសៃឈាមក្នុងខួរក្បាល ជំងឺបេះដូង និងជំងឺមួយចំនួនទៀត។
នៅក្នុងសន្និសីទខាងលើនេះដែរ រដ្ឋមន្ដ្រីក្រសួងសុខាភិបាលក៏បានផ្សព្វផ្សាយអនុក្រឹត្យរបស់រាជរដ្ឋាភិបាលចុះថ្ងៃទី២០ ខែតុលា ឆ្នាំ២០០៩ ស្ដីពីការបោះពុម្ពសារព្រមានសុខភាពលើកញ្ចប់បារី។ សារព្រមានសុខភាពដែលបិទលើកញ្ចប់បារី លោកថា គឺជាប្រយោជន៍ឱ្យចំនួនអ្នកជក់ថយចុះ។ ទោះបីគេដឹងថា អនុក្រឹត្យរបស់រាជរដ្ឋាភិបាលព្រមានពីការបោះពុម្ពនៅលើកញ្ចប់បារីពីបញ្ហាសុខភាពអ្នកជក់ក៏ដោយ បច្ចុប្បន្នអ្នកជក់ហាក់នៅមានការវិលវល់ដោយសារតែមើលទៅហាក់បីដូចជាបញ្ច្រាសទិសគ្នារវាងអនុក្រឹត្យរាជរដ្ឋាភិបាលថាប៉ះពាល់សុខភាព។ តែក្រុមហ៊ុននាំបារី និងប្រព័ន្ធផ្សព្វផ្សាយមួយចំនួនចេះតែពន្លឿនរុញគូទអ្នកជក់កាន់តែខ្លាំង។
ការសិក្សាមួយអះអាងថា ការជក់បារីនៅវ័យកណ្ដាល បង្កើនការកើតជំងឺសតិធ្ងន់ធ្ងរខ្លាំងជាងមុនចំនួនជិត៣ភាគ៤។ ការសិក្សានេះរកឃើញថា អ្នកជក់បារីដែលមានអាយុចន្លោះពី៤៦ឆ្នាំ និង ៧០ឆ្នាំ ប្រឈមនឹងការកើតជំងឺបាត់ការចងចាំ Alzheimer´s នៅវ័យចាស់ជរាខ្លាំងជាងអ្នកដែលមិនជក់បារី រហូតដល់ជាង៧០ភាគរយ។ ការសិក្សានេះក៏បង្ហាញឱ្យឃើញទំនាក់ទំនងរវាងជំងឺសតិធ្ងន់ធ្ងរនេះ នឹងជំងឺពាក់ព័ន្ធនឹងរបៀបរស់នៅផ្សេងៗទៀត ដូចជារោគទឹកនោមផ្អែម និងសម្ពាធឈាមខ្ពស់ផងដែរ៕
