Khmer
English
Chinese
Frence
Vietnamese
Thai
ខ្យល់ព្យុះមៀរីវាយប្រហារចូលឧប ទ្វីបកូរ៉េ ស្លាប់៩នាក់
ដោយ ៖ ម៉ែវ សាធី ថ្ងៃទី 27 មិថុនា 2011ម៉ោង 09:47:23
សារព័ត៌មានរ៉យទ័របានដកស្រង់សម្ដីមន្ដ្រីជាន់ខ្ពស់របស់កូរ៉េខាងត្បូងមួយរូបបានឱ្យដឹងនៅថ្ងៃទី២៧ មិថុនា ថា យ៉ាងហោចណាស់ក៏មានមនុស្ស៩ នាក់ស្លាប់ ភាគច្រើនដោយសារតែទឹកជំនន់កួចទៅបាត់ក្រោយពេលខ្យល់ព្យុះ មៀរីបោកបក់ចូលទៅកាន់កូរ៉េខាងត្បូង កាលពីចុងសប្ដាហ៍កន្លងមក។
លោកលី ហ្គោហ៊ី មកពីមជ្ឈមណ្ឌលគ្រប់គ្រងគ្រោះមហន្ដរាយនាទីក្រុងសេអ៊ូលបានឱ្យដឹងទៀតថា ក្រៅពីអ្នកស្លាប់នៅមានមនុស្ស៣នាក់បាត់ខ្លួនផងដែរ។
ជើងហោះហើរក្នុងស្រុកជាច្រើនបានលុបចោលកាលពីថ្ងៃទី២៦ មិថុនា ហើយបណ្ដានាវានេសាទក៏បានស្នើមិនឱ្យចេញទៅដែនសមុទ្រផងដែរ។ តាមគម្រោងខ្យល់ព្យុះមៀរីនឹងបោកបក់ទៅលើដីគោកប្រទេសកូរ៉េខាងជើងនៅថ្ងៃទី២៧ មិថុនា នេះផងដែរ ។
សារព័ត៌មានខេស៊ីអិនអេរបស់កូរ៉េខាងជើងបានផ្សព្វផ្សាយថា កូរ៉េខាងជើងបានប្រកាសអាសន្នដល់ប្រជាពលរដ្ឋរស់នៅតាមតំបន់ឆ្នេរសមុទ្រភាគខាង ត្បូងខេត្ដហាមយ៉ុងនិងកាន់វ៉ុនឱ្យត្រៀមលក្ខណៈទប់ទល់នូវរលកសមុទ្រធំៗ ក៏ដូចជាភ្លៀងធ្លាក់ខ្លាំងជាប់ៗគ្នាជាច្រើន ថ្ងៃនៅតំបន់ទាំងនោះ។
ពេលកន្លងមកខ្យល់ព្យុះនេះក៏បាន វាយប្រហារប្រទេសហ្វីលីពីន ធ្វើឱ្យពលរដ្ឋហ្វីលីពីនជាង១លាននាក់រងផលប៉ះពាល់ ហើយមានអ្នកស្លាប់និងបាត់ខ្លួនជិត៣០នាក់ផងដែរ។ សារព័ត៌មាន ស៊ីនហួបានផ្សព្វផ្សាយថា មូលនិធិកុមារអន្ដរជាតិបានប្រកាសអាសន្នដល់កុមារហ្វីលីពីនប្រមាណ៤៥០ពាន់នាក់ថាអាចប្រឈមនឹងជំងឺរាករូស រលាកសួត ដោយសារស្ថានភាពរស់នៅគ្មានអនាម័យក្រោយទឹកជំនន់ខ្យល់ព្យុះឆ្លងផុតទៅ។ ក្រៅពីហ្វីលីពីន ប្រទេសវៀតណាមក៏រងផលប៉ះពាល់យ៉ាងធ្ងន់ បណ្ដាលឱ្យមានអ្នកស្លាប់និងរងរបួស ហើយបំផ្លាញទ្រព្យសម្បត្ដិ ផ្ទះសម្បែងរាប់សិបខ្នងផងដែរ៕
.jpg)
.jpg)
