យី​ង​ឡាក់​នាយករដ្ឋមន្ត្រី​ជាប់សែស្រឡាយ​ព្រះ​រាជវង្ស​

ដោយ​ ៖ សហការី ថ្ងៃទី 06 កញ្ញា 2011ម៉ោង 11:20:54

នៅពេល​ដែល​អ្នកស្រី យី​ង​ឡាក់ ស៊ីណា​វ៉ា​ត្រ ដឹកនាំ​គណបក្ស ភឿ​ថៃ បាន​ឈ្នះឆ្នោត​យ៉ាង​ភ្លូកទឹកភ្លូកដី ហើយ​ត្រូវបាន​ជ្រើសរើស​ជា នាយករដ្ឋមន្ដ្រី​ទី​២៨ នៃ​ប្រទេស​ថៃ ដែល​ជា​នាយករដ្ឋមន្ដ្រី​ស្រី​លើកដំបូង​នៅ ក្នុង​ប្រវត្ដិសាស្ដ្រ​នោះ មាន​មនុស្ស​ជាច្រើន​នាក់​ទាំងនៅ ក្នុង​ប្រទេស ក៏ដូចជា​នៅ​ក្រៅ​ប្រទេស​ដណ្ដឹង​សួរថា លោកស្រី​គឺ​ជា​នរណា​? មក​ពី​ណា​និង​ជា​កូនចៅ​នរណា​? ទស្សនាវដ្ដី​នគរ​វត្ដ​មាន​កិត្ដិយស​លើ​ក​យក​ប្រវត្ដិរូប និង សកម្មភាព​របស់​លោក​ស្រី យី​ង​ឡាក់ មក បង្ហាញជូន​ដូចខាងក្រោម​។
​លោកស្រី យី​ង​ឡាក់ ស៊ីណា​វ៉ា​ត្រ កើត នៅ​ថ្ងៃ​ទី​២១ ខែមិថុនា ឆ្នាំ​១៩៦៧ ឈ្មោះ ហៅ​ក្រៅ “​ភូ​” ជា​អ្នកជំនួញ និង​ជា​អ្នកនយោបាយ​ផងដែរ ជា​មេដឹកនាំ​នៅ​ជួរ​មុខ​នៃ​គណបក្ស ភឿ​ថៃ ហើយ​ត្រូវបាន​ជ្រើសតាំងជាបេ​ក្ខ​នារី​នាយករដ្ឋមន្ដ្រី​ក្នុងកា​រ​បោះឆ្នោត​ទូទៅ​និង​បន្ទាប់មក​ត្រូវបាន​ជ្រើសតាំង​ជា​នាយក​រដ្ឋមន្ដ្រី​នៅ​ថ្ងៃ ទី​៤ ខែ​សីហា ឆ្នាំ​២០១១ នេះ​។  កើត​នៅ​ខេត្ដ​ឈៀង​ម៉ៃ លោកស្រី​មាន​សញ្ញា បត្រ​បរិញ្ញាបត្រ​នៃ​សាកលវិទ្យាល័យ  នៅ​​ឈៀង​ម៉ៃ និង ថ្នាក់​បណ្ឌិត​ពី​សាកលវិទ្យាល័យ​រដ្ឋ KentuckyState University ផ្នែក​សាធារណៈ​និង​ផ្នែក​រដ្ឋបាល​។ លោកស្រី​បាន​ក្លាយជា​នាយក​ប្រតិ​ប​ត្ដិ​នៃ​ក្រុមហ៊ុន​ជំនួញ​ដែល​បង្កើតឡើង ដោយ​បងប្រុស​ របស់​ លោក ស្រី គឺ​អតីត​នាយករដ្ឋមន្ដ្រី​ថៃ​ធ្លាក់​ពី​តំណែង​ដោយ​រដ្ឋប្រហារ​យោធា​គឺ  លោក ថាក់ ស៊ីន ស៊ីណា​វ៉ា​ត្រ ហើយក្រោយ មកទៀត លោក ស្រី​បាន​ក្លាយជា​ប្រធាន​ក្រុមហ៊ុន​អភិវឌ្ឍន៍​ទ្រព្យសម្បត្ដិ SIC និង​ជា​ចាងហ្វាង​នៃ​ក្រុមហ៊ុន Advanced Info Service បើទោះបីជា​បង​របស់​លោក​ស្រី លោក ថាក់ ស៊ីន ត្រូវបាន​កង​យោធា​ធ្វើ​រដ្ឋប្រហារ​មិន បង្ហូរឈាម ហើយ​ត្រូវ​ចាប់បង្ខំ​ឱ្យ​រស់នៅ​នី​រទេស ដោយ​តុលាការ​ចោទប្រកាន់​ថា បាន​រំលោភ​លើ​អំណាច​របស់​ខ្លួន​។ នៅ​ខែ​ឧសភា ឆ្នាំ​២០១១ បក្ស​ភឿ​ថៃ​ដោយ​មាន​ការគាំទ្រ​យ៉ាង​ជិតស្និទ្ធ ពី​លោក ថាក់ស៊ីន លោកស្រី យី​ង​ឡាក់ ត្រូវ បាន​តែងតាំង​ជាបេ​ក្ខ​នារី​នាយករដ្ឋមន្ដ្រី សម្រាប់​ការបោះឆ្នោត​ទូទៅ​ក្នុង​ឆ្នាំ​២០១១​។       លទ្ធផល​ដំបូង​បានបង្ហាញ​ថា បក្ស​ភឿ​ថៃ បានឈ្នះ​ភ្លូកទឹកភ្លូកដី ដោយ​ដណ្ដើមបាន ២៦៥​កៅអី លើ​៥០០​នៃ​រដ្ឋសភា ប្រទេស​ថៃ ដែល​ព្រឹត្ដិការណ៍​នេះ​បង្ហាញថា គណបក្ស​តែ មួយ​អាច​ដណ្ដើមបាន​សំឡេង​ភាគច្រើន​បាន ដល់​ទៅ​២​លើក ក្នុង​ការដណ្ដើម​កៅអី​នៅ ក្នុង រដ្ឋសភា​ថៃ​។ លោកស្រី​យី​ង​ឡាក់ ដែលមាន អាយុ​៤៤​ឆ្នាំ គឺជា​ស្ដ្រី​លើកដំបូង​នៅ​ក្នុង​ប្រវត្ដិសាស្ដ្រ ដែល​បាន​ក្លាយជា​នាយក​រដ្ឋមន្ដ្រី​។  
​

ជីវិត​ចុង​ក្រោយ​និង​ការងារ​ជំនួញ​របស់​យី​ង​ឡាក់
​ជីតា​ទួត​របស់​លោកស្រី យី​ង​ឡាក់ ឈ្មោះ Seng Sackhu គឺជា​ជនជាតិ​ចិនដីគោក ចុះ​មក​ពី​តំបន់​ហ្គាំង​ដុង (Guangdong) មក​នៅ​ប្រទេស​សៀម​នៅ​ឆ្នាំ​១៨៦០ ហើយ​តាំងទី​លំ នៅ​ឈៀង​ម៉ៃ នៅ​ឆ្នាំ​១៩០៨​ ។ កូនច្បង​របស់ គាត់​ឈ្មោះ Chiang Sakhu ដែល​បាន​កើត នៅក្នុង​ខេត្ដ​ចន្ទ​បុរី ក្នុង​ឆ្នាំ​១៨៩០ ហើយ​បាន​រៀបការ ជាមួយ​នឹង​ស្រី​ជនជាតិ​ថៃ​ម្នាក់ ឈ្មោះ Saeng Som na ។ កូនប្រុស​ច្បង របស់ Chiang  ឈ្មោះ Sak បាន​ព្រម​ទទួល យក​គោត្ដនាម​បែប​ថៃ​ឈ្មោះ ស៊ីណា​វ៉ា​ត្រ (Shinawatra)​ក្នុង​ឆ្នាំ​១៩៣៨​។ Shinawatra ក្រោយ មក​ទៀត​បាន​បង្កើត​ជា ស៊ីណា វ៉ា​ត្រ សិប្បកម្ម​ផលិត​សរសៃសូត្រ​បន្ដ​មក​ទៀត ជា​ក្រុមហ៊ុន​ហិរញ្ញវត្ថុ ក្រុមហ៊ុន សាងសង និង ក្រុមហ៊ុន​អភិវឌ្ឍន៍​ផ្នែក​អចលវត្ថុ​។ បិតា​របស់ លោកស្រី យី​ង​ឡាក់ ឈ្មោះ Lert បានកើត នៅក្នុង​ខេត្ដ​ឈៀង​ម៉ៃ នៅក្នុង​ឆ្នាំ​១៩១៩ ហើយ​បាន​រៀបការ​ជាមួយ​ព្រះ​នាង យីន​ឌី​រ៉ា ម៉ី​វង្ស (Yindi Raming Wong) ជា​កូនស្រី​របស់ ព្រះ​មហាក្សត្រិយានី ណា​ឈៀង​ម៉ៃ​)​។
នៅក្នុង​ឆ្នាំ​១៩៦៨ លោក Lert Shinawatra  បាន​ចូលប្រឡូក​ឆាកនយោបាយ ហើយ​បាន​ក្លាយជា​តំណាងរាស្ដ្រ​នៅក្នុង​មណ្ឌល ឈៀង​ម៉ៃ ហើយ​បន្ទាប់​មកទៀត បាន​ក្លាយ​ជា​អនុប្រធាន គណបក្ស Liberal Party ។ លោក Lert បាន​ចាកចោល​នយោបាយ​នៅ ឆ្នាំ​១៩៧០ ហើយ​បាន​ទៅ​បើកហាង​កាហ្វេ ដាំ​ដំណាំ​ក្រូច ដាំ​ផ្កា នៅ​ឈៀង​ម៉ៃ ក្នុងស្រុក San Kam phaeng ហើយ​បាន​បង្កើត រោង កុន​ចំនួន​២ ស្ថានីយ​ហ្គាស និង​ហាង​លក់​ឡាន​និង​ម៉ូតូ​ថែម ទៀត​។  លោកស្រី យី​ង​ឡាក់ ស៊ីណា​វ៉ា​ត្រ គឺ ជា​កូនពៅ​ក្នុងចំណោម បង ប្អូន​ប្រុស​ស្រី​៩​នាក់ នៃ​គ្រូ​សារ​លោក ឡ​រេ​ត និង​អ្នក​ម្នាង យីន​ឌី​។      លោកស្រី​ត្រូវបាន​គេ​ដាក់​ឈ្មោះ​ហៅ​ក្រៅ​ថា ភូ (​តាម​ភាសាថៃ មានន័យ​ថា ក្ដាម​)​។ លោកស្រី យី​ង ឡាក់ ធំធាត់​នៅ ឈៀង​ម៉ៃ ហើយ​បាន​ចូលរៀន​នៅ​សាលារៀន​សម្រាប់ តែ​ស្រីៗ គឺ​វិទ្យាល័យ Regina Coeli Col lege បន្ទាប់​មក​រៀន​នៅ Yupparaj col lege​។ ​លោកស្រី​បាន​ជាប់​បរិញ្ញាបត្រ​ផ្នែក​នយោបាយ​វិទ្យាសាស្ដ្រ និង​រដ្ឋបាល​សាធារណៈ​នៅ​សាល​ក​វិទ្យាល័យ ឈៀង​ម៉ៃ នៅ​ឆ្នាំ​១៩៨៨ និង​ទទួលបាន​សញ្ញាបត្រ​ផ្នែក MPA degree (Specialization in Management Information System) BI Kentucky នៃ​សាកលវិទ្យាល័យ​រដ្ឋ​ក្នុង​ឆ្នាំ​១៩៩១ ។​
​លោកស្រី យី​ង​ឡាក់ ស៊ីណា​វ៉ា​ត្រ ចាប់ផ្ដើម​ការងារ​ជា​លើកដំបូង​របស់​ខ្លួន​ជា​អ្នក​លក់​និង ផ្នែក​ទីផ្សារ​នៅក្នុង​ក្រុមហ៊ុន Shinawatra និង​ក្រុមហ៊ុនទូរស័ព្ទ​ដែល​បង្កើតឡើង​ដោយ AT&T international ហើយ​បន្ទាប់មក បាន​ក្លាយជា​ចាងហ្វាង​នៃ​ផ្នែក​ផ្ដល់​និង​បេសកកម្ម របស់​ទូរស័ព្ទ​។ នៅ​ឆ្នាំ ១៩៩៤ លោក ស្រី​បាន​ក្លាយជា​ចាងហ្វាង​ចាត់ការ​ទូទៅ​នៃ សារ​ជីវ​កម្ម​ឈ្មោះ Rainbow Media គឺ ជា​សារ​ជីវ កម្ម​ផ្សព្វផ្សាយ​ជា​អន្ដរជាតិ ដែល​ក្រោយមក គឺជា​ប៉ុស្ដិ៍​ទូរទស្សន៍​ឈ្មោះ True Vision​។ លោកស្រី​បាន​លាលែង​ពី​អនុប្រធាន នៃ ក្រុមហ៊ុន IBC នៅ​ឆ្នាំ​២០០២ ហើយ​បាន​ក្លាយជា​នាយក​គ្រប់គ្រង​នៃ ក្រុមហ៊ុន    Advance Info Service (AIS) ដែល​ជា​ក្រុមហ៊ុន ទូរស័ព្ទ​ធំ​ជាង​គេ​បំផុត​នៅ​ប្រទេស​ថៃ​។ បន្ទាប់​ពី​លក់​ក្រុមហ៊ុន Shin Corporation ទៅឱ្យ​ក្រុមហ៊ុន Temasek Holding លោក ស្រី យី​ង​ ឡាក់ បាន​លាលែង​ចេញពី​តំណែង ជា​នាយក AIS តែ​នៅ​រក្សា​តួនាទី​ជា​ចាងហ្វាង​នៃ​ក្រុមហ៊ុន SC Asset Co.,Ltd ដែលជា ក្រុមហ៊ុន​របស់​គ្រួសារ​ស៊ីណា​វ៉ា​ត្រ (The Shinawatra family property develop ment Company) ។ លោកស្រី​ត្រូវបាន ស៊ើបអង្កេត​ដោយ​គណៈកម្មាធិការ​សន្ដិ​សុខ និង​លក់ដូរ​ទ្រព្យសម្បត្ដិ​ផ្ទៃក្នុង​គ្រួសារ បន្ទាប់​ពី​លោកស្រី បាន​លក់​ភាគហ៊ុន​នៃ​ក្រុមហ៊ុន AIS (Shin Corporation) ទៅឱ្យ ក្រុមហ៊ុន Temasek Holding ។​
​លោក ស្រី​យី​ង ឡាក់ ក៏​ជា​សមាជិក​នៃ​គណៈកម្មការ និង​ជា​លេខាធិការ​នៃ​ក្រុម​អ្នក​បង្កើត​ក្រុមហ៊ុន Thai Com​។ យី​ង​ឡាក់ មានកូនប្រុស​ម្នាក់​ឈ្មោះ ស៊ូ​ប៉ា​សេក (Supasek) ដោយ​មាន​ប្ដី​ឈ្មោះ Anusorn Amornchat ដែល​ជាង​ចាងហ្វាង​ក្រុមហ៊ុន M Link Asia Corporation PCL ។ ប្អូនស្រី​របស់​ប្ដី​លោកស្រី​យី​ង​ឡាក់​ឈ្មោះ Yaowapa Wongsawat គឺ​ជា​ប្រពន្ធ​របស់​អតីត​នាយករដ្ឋមន្ដ្រី ស៊ុម ឆៃ វង្សា​វ៉ាត់​។​
​ការងារ​ទាក់ទង​ផ្នែក​នយោបាយ​និង ការកសាង​គណបក្ស​ភឿ​ថៃ​
​បន្ទាប់​ពី​ការគ្រប់គ្រង​ក្នុង​រដ្ឋាភិបាល​ដោយ​គណបក្ស​អំណាច​ប្រជាជន ត្រូវបាន​រំលាយ មក​គណៈកម្មការ​ប្រតិ​ប​ត្ដិ​នៃ គណបក្ស​ក៏​ត្រូវ បាន​ហាមឃាត់​មិនឱ្យ​ធ្វើ​សកម្មភាព​នយោបាយ​ដែរ ដោយ​យោង​ទៅតាម​អំណាច​តុលាការ​ធម្មនុញ្ញ កាលពី​ថ្ងៃ​ទី​២ ខែ​ធ្នូ ឆ្នាំ​២០០៨​។ អតីត សមាជិក​សភា​នៃ​គណបក្ស​អំណាច​ប្រជាជន បាន​បង្កើត​បក្ស​មួយ​ទៀត​ឈ្មោះថា បក្ស​ភឿ​ថៃ ហើយ​លោក​ស្រី​យី​ង​ឡាក់ត្រូវបាន​ស្នើសុំ​ឱ្យ​ក្លាយជា​មេដឹកនាំ​គណបក្ស តែ​ត្រូវបាន លោកស្រី​បដិសេធ ដោយ​បាន​អះអាង​ថា លោកស្រី​មិន​ចង់​ក្លាយជា​នាយក​រដ្ឋមន្ដ្រី ហើយ​លោក​ស្រី​អះអាងថា ចង់​ប្រមូលផ្ដុំ​ការយក ចិត្ដទុក​ដាក់ទៅលើ​ផ្នែកពាណិជ្ជកម្ម​វិញ​។ លោក យុង​យុទ្ធ វិឆា​ឌី បានក្លាយជា​មេដឹក នាំ​គណបក្ស​នេះ​ពី​ពេល​នោះ​តរៀងមក​។​     នៅក្នុង​សារ​មួយ​របស់​សហរដ្ឋអាមេរិក ដែល​បាន​ចេញ​នៅក្នុង​ឆ្នាំ ២០១១ បានបង្ហាញ ឱ្យដឹងថា នៅ​ក្នុង​ការជួប​ប្រជុំ​នៅ ថ្ងៃទី​៩ ខែវិច្ឆិកា ឆ្នាំ​២០០៩ អតីត​ឧបនាយករដ្ឋមន្ដ្រី ដែល​ជិតស្និទ្ធ​ជាមួយ​លោក ថាក់ ស៊ីន គឺ​លោក ស៊ំ​ពង្ស អា​មន វីវ៉ា​ត់​ (Sompong Amornvivat) បាន​ប្រាប់ លោក​ឯកអគ្គរដ្ឋទូត អាមេរិក​ប្រចាំ​ប្រទេស​ថៃ Eric John ថា គាត់​មិន បាន​ប្រគល់​តួនាទី​ធំ​ទៅឱ្យ លោកស្រី យី​ង​ឡាក់​ទេ ហើយ​ថា “​លោក​អតីត​នាយក រដ្ឋមន្ដ្រី  ថាក់ស៊ីន ខ្លួន​គាត់​ផ្ទាល់​មិន​ស្រេកឃ្លាន នឹង​បង្ហោះប្រ​វត្ដិ​រូប​ប្អូនស្រី​នៅ​ក្នុង​បក្ស​ឡើយ ហើយ​គាត់​ព្យាយាម​រក​ផ្លូវ​ជួយ​ខ្លួនឯង និង​ជួយ​គណបក្ស​គាត់​ក្នុងនយោបាយ ដោយ​ខ្លួន របស់គាត់​។  ”​ទោះជា​យ៉ាងណា​ក៏ដោយ​នៅ​ក្នុង​សំបុត្រ​ផ្សព្វផ្សាយ​ថ្ងៃទី​២៥ ខែវិច្ឆិកា ឆ្នាំ​២០០៩ លោក ​ឯកអគ្គរដ្ឋទូត អាមេរិក​បានកត់ ត្រា​នៅ ក្នុង​ការជួប​ប្រជុំ​ជាមួយ​លោកស្រី​យី​ង​ឡា​ក់ថា អ្នកស្រី​បាន​និយាយ​ប្រកបដោយ​សុទិដ្ឋិនិយម​អំពីបេសកកម្ម យុទ្ធវិធី និង​គោល បំណង​នៃ​គណបក្ស​ភឿ​ថៃ ដែល​មើល​ទៅ​ដូច​ជា​បាន ប្រុងប្រៀប​ខ្ពស់​រួចជាស្រេច​ជាង កាលពីពេល ជួប​គ្នា​លើក​មុន​។​
​យុទ្ធនាការ​បោះឆ្នោត​និង​ការសន្យា ចំពោះ​មុខ​ប្រជាជន​
 នៅ​ថ្ងៃ​ទី​១៦ ឧសភា ២០១១ គណបក្ស ភឿ​ថៃ បាន​បោះឆ្នោត​ជ្រើសតាំង​លោក​ស្រី​យី​ង​ឡាក់ ឱ្យ​ឈរ​ជាបេ​ក្ខ​នារី​លំដាប់​លេខ​១ (​ដែល ​តាម​ធម្មតា​ជា​ឈ្មោះ​បម្រុង​សម្រាប់​នាយករដ្ឋមន្ដ្រី​ពេល​ឈ្នះឆ្នោត​) សម្រាប់​បញ្ជី​ឈ្មោះ តំណាងរាស្ដ្រ​ក្នុង​ការបោះឆ្នោត​ថ្ងៃទី​៣ ខែ    កក្កដា​ ។     ​ថ្វី​បើ​លោក​ស្រី​មិនមែន​ជា​មេដឹកនាំ គណបក្ស ឬ​ក៏​មិន​ចូលទៅក្នុង គណ​ប្រតិ​ប​ត្ដិ​របស់​គណបក្ស​ក៏​ដោយ​។ ការសម្រេចចិត្ដ​នេះ​គេ​ប៉ាន់ស្មាន​ថា គឺ​ជា​ការសម្រេចចិត្ដ​របស់ លោក ថាក់ស៊ីន តែ​លោក ថាក់ស៊ីន បាន ច្រាន​ចោល​ការចោទប្រកាន់ មួយ​នេះ​។​
​អ្វី​ដែល​ជា​ការព្រួយបារម្ភ​របស់​គណបក្ស ក៏ដូចជា​លោក ថាក់ស៊ីន គឺ​ការសន្យា​របស់លោកស្រី​នៅ​ក្នុង​យុទ្ធនាការ ដណ្ដើម​សន្លឹកឆ្នោត ។ លោកស្រី​បាន​សន្យាថា នឹង​សម្រុះ សម្រួល​ទំនាស់​នៃ​ការបែកបាក់​ជាតិ​ដែល​ខ្ទេចខ្ទាំ ក្នុង​ចន្លោះ​ឆ្នាំ​២០០៨ ដល់​២០១០ ជាពិសេស ការប៉ះទង្គិច​ធំ ដែល​នាំ​ឱ្យ​មនុស្ស​ស្លាប់​ជាង​៩០​នាក់​និង​របួស​ជិត ២​ពាន់​នាក់​។ ដោយ​លោកស្រី​សន្យាថា នឹង​បង្កើត​គណៈកម្មា​ធិកា​រ ឯករាជ្យ​ស្វែងរក​ការពិត​សម្រុះសម្រួ​ល​ជាតិ​មួយ​។ លោកស្រី​ក៏​បាន​សន្យាថា ផ្ដល់​ការលើកលែងទោស​ជាទូទៅ​មួយ​ចំពោះ អ្នក​ដែល ជាប់​ពាក់ព័ន្ធ​នឹង​អ្នកនយោបាយ​រាប់ ចាប់តាំងពី​រដ្ឋប្រហារ​ឆ្នាំ​២០០៦​មក ដែល​ក្នុង នោះ​មាន​ទាំង​បងប្រុស​លោកស្រី​ផងដែរ​។​ លោកស្រី យី​ង​ឡាក់ បាន​សន្យាថា នៅ ឆ្នាំ​២០២០ រដ្ឋាភិបាល​លោកស្រី​នឹង​លុបបំបាត់ ភាពក្រីក្រ ហើយ​សន្យា​បន្ថយពន្ធ​អាករពី​៣០ ទៅ​២០​ភាគរយ ហើយ​នៅ​ឆ្នាំ​២០១៣ បន្ថយ​ត្រឹម​២០​ភាគរយ​។ ចំពោះ​ផ្នែក​កសិកម្ម​វិញ លោកស្រី​សន្យា​នឹង​ដំឡើង​ថ្លៃ​កសិករ​ឱ្យបាន​ខ្ពស់ជាង​សព្វថ្ងៃ​។ ការសន្យា​នេះ​វា​បាន​លើក​ទឹកចិត្ដ​ឱ្យ​កសិករ​ខិតខំ​ផលិត​តែ​វា​ងាប់​ចំពោះ អ្នក​នាំ​អង្ករ​ចេញ ដែល​តម្លៃ​វា​ស្ទើរតែ​ស្មើនឹង តម្លៃ​ផ្សារ​អន្ដរជាតិ​។ ក្រុម​អ្នកប្រឆាំង​កំពុង តែង​សម្លឹង​ដោយ ប្រុងប្រយ័ត្ន ចំពោះ​ពាក្យឃោសនា​របស់ លោកស្រី ហើយ​កំពុងតែ​គិត ថា វា​គ្រាន់តែ​ជា​ល្បិចកល​យកឈ្នះ​សន្លឹក​ឆ្នោត​តែ​ប៉ុណ្ណោះ ពួក​បក្សប្រឆាំង​កំពុងតែ​សំ​លៀងមាត់​ចំពោះ​បញ្ហា​នេះ​។
អ្វី​ដែល​អន្ដរជាតិ​ជា ពិសេស​ប្រទេស​កម្ពុជា​ទាញ​យក​ការយកចិត្ដទុកដាក់​នោះ​គឺ​លោកស្រី​សន្យាថា នឹង​ស្ដារឡើងវិញ​នូវ​ទំនាក់ទំនង​ល្អ​ជាមួយ​អន្ដរជាតិ ជា​ពិសេស​ប្រទេស​កម្ពុជា ដែល​ទំនាក់ទំនង​នេះ កន្លង​ទៅ​ត្រូវបាន ខូចខាត​យ៉ាង​ធ្ងន់ធ្ងរ​បំផុត​។  ទោះជា​យ៉ាងណា​ក៏ ដោយ​គេ​សង្ឃឹមថា លោក ស្រី យី​ង​ឡាក់ អាច​ធ្វើបាន​តាម​ការសន្យា​របស់​ខ្លួន​ភាគច្រើន ព្រោះ​លោក​ស្រី​មាន   ជំនាញ​ខាង​ផ្នែក សេដ្ឋកិច្ច​តាំង​ពី​តា​ដល់​ឪពុក​និង​ដល់​កូន​។   ហើយ​អ្វី​ដែល​សំខាន់​សម្រាប់ កម្ពុជា​នោះ គឺ​ក្រុមអ្នកតាមដាន​នយោបាយ​ជុំវិញ​ទំនាស់ កម្ពុជា និង​ថៃ និទស្សន៍​ថា វា​អាច នឹង​ធ្វើឱ្យ​ស្ថានការណ៍​ព្រំដែន​ដែល​ធ្លាប់តែ​ពុះកញ្ជ្រោល​នោះ ឱ្យ​ត្រឡប់​ជា​ស្ងប់ស្ងាត់ ហើយ​ជា បន្ដបន្ទាប់​នឹង​ត្រូវ​បាន​ក្លាយ​ទៅ ជា​ព្រំដែន សន្ដិភាព​ជា​ព្រំដែន​នៃ​កិច្ចសហប្រតិបត្ដិការ​សេដ្ឋកិច្ច​វប្បធម៌​របស់​ប្រទេស​ទាំង​២​វិញ​៕​