​អាជ្ញាធរ​ខេត្តមណ្ឌលគិរី​ដឹកនាំ​មន្ត្រីរាជការ​កងកម្លាំង​សិស្សា​នុ​សិស្ស​រួម​គ្នា​សំអាត​ទីធ្លា​សាធារណៈ​

ដោយ​ ៖ ​ ឦ​សាន្ត​|ថ្ងៃទី 15 ធ្នូ 2011 ម៉ោង 13:27:41

ខេត្តមណ្ឌលគិរីៈ ​​នៅ​ព្រឹក​ថ្ងៃ​ទី​១៥​ ខែធ្នូ​ ឆ្នាំ២០១១​នេះ ​លោក​ចាន់​ យឿ​ន​ អភិបាល​នៃ​គណ​អភិបាលខេត្ត​មណ្ឌលគិរី​បាន​ដឹកនាំ​ និង​ចលនា​រួម​គ្នា​ក្នុង​ការ​សម្អាត​បរិស្ថាន​ក្នុង​ក្រុង​សែន​មនោ​រម្យ​ ដើម្បី​ទីក្រុង​ស្អាត​រម​នី​យរ​ដ្ឋា​ន​ស្អាត​ សេវាកម្ម​ល្អ​ ស្រប​តាម​អនុ​សាស​ន៍ដ៏​ខ្ពង់ខ្ពស់​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ និងឆ្លើយ​តប​ទៅ​នឹង​កំណើនភ្ងៀវ​ទេសចរ​ណ៍នា​ពេលបច្ចុប្បន្ន​ ដែល​កំពុង​កើនឡើង​នៅក្នុងប្រទេស​កម្ពុជា​យើង​។​

នា​ឱកាស​នោះ​ ក៏​មានការ​ចូលរួម​ពី​លោក​អភិបាលរង​ខេត្ត​ ស្នងការ​ ស្នងការ​រង​ ប្រធាន​មន្ទីរ​បរិស្ថាន​ខេត្ត​ ប្រធាន​មន្ទីរ​កសិកម្ម​ខេត្ត​ កងកម្លាំង​ លោកគ្រូ​ អ្នកគ្រូ​ សិក្សា​នុ​សិស្ស​ រួម​និង​ប្រជាពលរដ្ឋ​សរុបជិត​មួយ​ពាន់​នាក់​ ​។​

​លោក​ ឈិ​ត​ សុផល​ ប្រធាន​មន្ទីរ​បរិស្ថាន​ខេត្ត​បាន​ឲ្យ​ដឹង​ថា​ ការ​រួម​គ្នា្ជ​ជួយ​សម្អាត​ទីក្រុង​ឲ្យ​បរិស្ថាន​ល្អ​ គឺ​មាន​អត្ថ​ប្រ​យោ​ជ​ន៍ជា​ច្រើន​ដូចជាសុខ​មា​ភាពល្អ​ សោភ័ណ​ភាព​ស្អាត​ ទីក្រុង​ស្អាត​ រម​នី​យរ​ដ្ឋា​ន​ស្អាត​ សេវាកម្ម​ល្អ​ ទាំង​អស់នេះ​ រាជរដ្ឋាភិបាល​បាន​យកចិត្តទុកដាក់​ និង​ជំរុញ​ផ្សព្វផ្សាយ​ គ្រប់​ស្ថាប័ន​ និង​ប្រជាពលរដ្ឋ​ឲ្យរួម​គ្នា​សម្អាត​បរិស្ថាន​។ ​លោក​បាន​បន្ត​ទៀត​ថា បើ​ទោះបី​ នៅ​តាម​ទីក្រុង​ រម​នី​យរ​ដ្ឋា​នមាន​សេវា​ប្រមូល​សម្រាម​យ៉ាងណា​ក៏​ដោយ​ ក៏​មិន​បាន​ស្អាត​មួយ​រយ​ភាគរយ​នោះ​ដែរ​ ទល់​តែ​យើង​ទាំងអស់​គ្នា​រួម​គ្នា​ជួយ​សម្អាត​ ថែទាំ​ ទើប​បរិស្ថាន​ជុំវិញ​ខ្លួន​យើង​បរិ​សុ​ទ្ឋ​ និង​មាន​សោភ័ណ​ភាពល្អ​ ដែល​មិន​អាច​កាត់ថ្លៃ​បាន​សម្រាប់​មនុស្សជាតិ​។​

​លោក​ឧត្តម​សេនី​យ៍ត្រី​ ញ៉ែ​ម​ វ៉ា​ន់​នី​ ស្នងការ​នៃ​ស្នងការដ្ឋាន​នគរ​ខេត្ត​ ក៏​បាន​ឲ្យ​ដឹង​ដែរ​ថា​ ថ្ងៃនេះ​ស្នងការដ្ឋាន​នគរបាល​ខេត្ត​ បាន​ដឹកនាំ​កម្លាំង​ចូលរួម​ជិត​មួយ​រយ​នាក់​ផង​ដែរ​ ក្នុងយុ​ទ្ឋ​នា​ការ​សម្អាត​បរិស្ថាន​នៅថ្ងៃនេះ​។ ​លោក​បាន​បន្ត​ទៀត​ថា​ កងកម្លាំង​ប្រដាប់​មិនត្រឹម​តែ​មាន​តួនាទី​ការពារ​សន្តិសុខ​សណ្តាប់ធ្នាប់​ និង​ការពារ​ប្រទេស​ជាតិ​ប៉ុណ្ណោះ​ទេ​ ប៉ុន្តែ​មាន​ភារកិច្ច​ក្នុង​ការ​ចូលរួម​សម្អាត​បរិស្ថាន​គ្រប់​ទីកន្លែង​ទាំងអស់​គ្នា​ផងដែរ។​

យុវ​សិស្ស​ឈ្មោះ​ ហេង​ តារា​ សិស្ស​វិទ្យា​យ​ហ៊ុន​សែន​មណ្ឌលគិរី​ មាន​ចំណាប់​អាម្ម​ណ៍ដែរ​ថា​ សិស្ស​ទាំងអស់​គ្នា​មក​ចូលរួម​នា​ពេល​នេះ​មាន​ភាព​សប្បាយ​រីករាយ​ ដោយ​បាន​ចូលរួម​សម្អាត​បរិស្ថាន​ជាមួយ​ថ្នាក់ដឹកនាំ​ មន្ត្រីរាជការ​ កងកម្លាំង​ លោកគ្រូ​ អ្នកគ្រូ​ នៅ​ក្នុង​ក្រុង​សែន​មនោ​រម្យ​ នា​ព្រឹក​នេះ​ បើ​ទោះបី​មិន​មាន​កម្មវិធី​រួម​គ្នា​ថ្ងៃនេះ​ ក៏​សិក្សា​នុ​សិស្ស​ លោកគ្រូ​ អ្នកគ្រូ​ នៅ​គ្រប់​សាលារៀន​ទូ​ទាំងប្រទេស បាន​ធ្វើ​ពលកម្ម​ក្នុង​សាលារៀន​ដែរ​ ព្រោះ​ក្នុង​មួ​យស​ប្តា​ហ៍សិស្ស​ទាំងអស់​គ្នា​ត្រូវ​យក​ថ្ងៃ​ព្រហស្បតិ៍ជា​ថ្ងៃ​ពលកម្ម​ដើម្បី​សម្អាត​ទីធ្លារក្នុង​សាលារៀន​ឲ្យ​ មាន​សោភ័ណ​ភាព​ស្អាត​ និង​បរិស្ថាន​ល្អ​ ៕