ឆ្កែ​សត្វ​ចិញ្ចឹម​និង​ជា​អាហារ​ជប់លៀងៈ​ តម្រូវការ​សាច់​ឆ្កែ​នៅ​វៀតណាម​កំពុង​កើនឡើង​

ដោយ​ ៖ កាំង​ សុធា ថ្ងៃទី 02 មករា 2012ម៉ោង 09:57:10

“​បញ្ហា​គឺថា​ ឆ្កែ​មិន​ទាន់​មាន​ចំនួន​គ្រប់គ្រាន់​ដើម្បី​ផ្គត់ផ្គង់​ដល់​ការ​ធ្វើ​ជំនួញ​នោះ​ទេ​ ជា​ពិសេស​ក្នុងអំឡុងពេល​ចូល​ឆ្នាំ​ថ្មី​វៀតណាម​ដែល​មាន​ន័យ​ថា​ ឆ្កែ​នឹង​ត្រូវ​នាំ​ចូល​មក​ពី​ប្រទេស​ថៃ​។​ តាម​ការ​ប៉ាន់​ស្មានថា​ មាន​ឆ្កែ​ចំនួន​២​ម៉ឺន​៥​ពាន់​ ក្បាល​ក្នុង​មួយ​ខែៗ​ ឬ​លើស​ពី​នេះ​ត្រូវ​នាំ​មក​ពី​ប្រទេស​ថៃ​”​។​

​ខណៈ​ដែល​សេដ្ឋកិច្ច​របស់​ប្រទេស​វៀតណាម​រីក​លូតលាស់​ ហើយ​ប្រជាពលរដ្ឋ​កាន់តែ​មាន​ទ្រព្យធន​ច្រើន​ឡើង​ ជំនួញ​សត្វ​ឆ្កែ​ទាំង​ស្លាប់​និង​នៅ​រស់​កំពុង​កើនឡើង​ដែរ​។​

ឥឡូវនេះ​មនុស្ស​កាន់តែ​ច្រើន​កំពុង​ទិញ​ពូជ​សត្វ​ក្នុង​តម្លៃ​ខ្ពស់​ដើម្បី​ចិញ្ចឹម​ជា​សត្វ​ក្នុងផ្ទះ​ ហើយ​និន្នាការ​បែប​នេះ​មិន​ធ្វើ​ឱ្យ​ការ​ធ្វើ​ជំ​នួញ​​សត្វ​ឆ្កែ​របស់​ប្រទេស​នេះ​ថយ​ចុះ​ឡើយ​។​ ទោះជា​សាច់​ឆ្កែ​ត្រូវ​បាន​ដាក់​នៅ​លើ​ចាន​ជាមួយ​ទឹកជ្រលក់​បង្គា​ឬ​សត្វ​ឆ្កែ​ត្រូវ​បី​នៅ​លើ​ដៃ​របស់​ស្ដ្រី​អ្នកមាន​ទ្រព្យធន​ម្នាក់​ក៏​ដោយ​ក៏​សត្វ​ឆ្កែ​ជា​សត្វ​ដែល​មាន​ប្រជាប្រិយភាព​យ៉ាង​ខ្លាំង​នៅ​ វៀតណាម​។​ លោក​ ង្វៀ​ន​ ជុង​ ថា​ញ់់​ (Nguyen​ Trung​ Thanh)​ វ័យ​៤១​ឆ្នាំ​ កំពុង​ពិសា​អាហារ​ពេល​ល្ងាច​នៅ​ឯ​ភោជនីយដ្ឋាន​មួយ​ដែល​លក់​សាច់​ឆ្កែ​នៅ​ទីក្រុង​ហាណូយ​។​ លោក​និយាយ​ថា​ លោក​ជា​អតិថិជន​ប្រចាំ​។​ លោក​ថា​ញ់​និយាយ​ថា​ លោក​និង​មិត្ត​ភ័ក្ដិ​របស់​លោក​មក​ទី​នេះ​នៅ​ពេល​ណា​ដែល​ពួក​គាត់​ចង់​បរិភោគ​សាច់​ឆ្កែ​។​

សាច់​ឆ្កែ​មាន​រសជាតិ​ពិសេស​ដែ​លេលា​ក​ចូល​ចិត្ត​។​ លោក​បានឱ្យ​ដឹង​ថា​ សាច់​នេះ​មាន​ផល​ល្អ​សម្រាប់​សុខភាព​របស់​លោក​ ដោយសារ​វា​មាន​សារជាតិ​ចិញ្ចឹម​និង​ធ្វើ​ឱ្យ​លោក​កាន់តែ​រឹង​មាំ​ជាង​មុន​។​ បើ​ទោះជា​ការ​បរិភោគ​សាច់​ឆ្កែ​ជា​អំពើ​ខុសច្បាប់​នៅ​តាម​កន្លែង​ជា​ច្រើន​នៅ​ទ្វីបអាស៊ី​ក៏​ដោយ​វា​ជា​ការ​ធ្វើ​ជំនួញ​យ៉ាង​ធំ​មួយ​នៅ​វៀតណាម​។​ លោក​ ទួន​ បិ​ន​ឌី​សេន​ (Tuan​ Bendixsen)​ នាយក​ការិយាល័យ​ប្រចាំ​នៅ​វៀតណាម​នៃ​អង្គការ​សត្វ​អាស៊ី​ (Animals​ Asia’s​ Vietnam​ office)​ ថ្លែង​ថា​ ខណៈ​ដែល​សេដ្ឋកិច្ច​របស់​វៀតណាម​បាន​រីក​លូតលាស់​ មនុស្ស​កាន់តែ​ច្រើន​បាន​ ផ្លាស់​ទៅ​រស់នៅ​ក្នុង​ទីក្រុង​ ដោយ​បន្សល់​ទុក​សមាជិកគ្រួសារ​តិចតួច​នៅ​ឯ​ទី​ជនបទ​ដើម្បី​ចិញ្ចឹម​ឆ្កែ​លក់​។​

ស្រប​ពេល​ជាមួយ​គ្នា​នេះ​ដែរ​លោក​ ទួន​ មាន​ប្រសាសន៍​ថា​ មនុស្ស​កាន់តែ​ច្រើន​អាច​មាន​លទ្ធភាព​ពិសា​សាច់​ឆ្កែ​ ដូច្នេះ​ការ​បរិភោគ​ក៏​កំពុង​កើនឡើង​ផង​ដែរ​។​ កាលពី​ខែ​មុន​ក្រុម​ប៉ូលិស​ថៃ​បាន​ចាប់​បុរស​បី​នាក់​ដែល​ព្យាយាម​រត់ពន្ធ​ឆ្កែ​ចំនួន​ជាង​១​ពាន់​ក្បាល​ចូល​ទៅ​វៀតណាម​ឆ្លងកាត់​តាម​ប្រទេស​លាវ​។​ “​ប្រសិនបើ​អ្នក​ធ្វើ​ដំណើរ​ទៅ​កាន់​ប្រទេស​វៀតណាម​ភាគ​កណ្ដាល​នៅ​ក្បែរ​ព្រំដែន​លាវ​ជា​រឿយៗ​​អ្នក​នឹង​ឃើញ​ឡាន​ធំៗ​ ឆ្លងកាត់​ជា​ឡាន​ដែល​ផ្ទុក​ទៅ​ដោយ​សត្វ​ឆ្កែ​យ៉ាង​ហោច​ណាស់​ក៏​២០០​ ទៅ​៣០០​ក្បាល​ដែល​បាន​ដាក់​នៅ​ក្នុង​ទ្រុង​ដូច​សត្វ​មាន់​ដែរ​។​ ទ្រុង​នីមួយៗ​មាន​ឆ្កែ​ប្រហែល​១០​ក្បាល​។​ ទ្រុង​ទាំងនោះ​មាន​ទំហំ​តូចៗ​ ឆ្កែ​ទាំងនោះ​ត្រូវ​ផ្គត់ផ្គង់​ទៅ​ឱ្យ​ឧស្សាហកម្ម​សាច់​ឆ្កែ​នៅ​វៀតណាម​”​។​ លោក​ទួន​ និយាយ​ថា​ ក្រុម​អ្នក​ចូល​ចិត្ដ​សាច់​ឆ្កែ​ភាគច្រើន​បំផុត​គឺជា​មនុស្ស​វ័យ​កណ្ដាល​។​ លោក​ឱ្យ​ដឹង​ទៀត​ថា​ ក្រុម​យុវជន​ទំនងជា​ចង់​យក​សត្វ​ទាំងនោះ​ធ្វើ​ជា​សត្វ​ចិញ្ចឹម​ជាង​ ដោយសារ​ពួក​គេ​ធ្វើ​តាម​អ្វី​ដែល​មនុស្ស​ ទាំងឡាយ​បាន​ធ្វើ​នៅ​ក្នុង​សង្គម​លោក​ខាងលិច​។​

លោក​ថា​ញ់​ កុក​ បាវ​ (Thanh​ Quoc​ Bao)​ ជា​អ្នកគ្រប់គ្រង​ជាន់ខ្ពស់​នៅ​សមាគម​ ខេ​ណេ​ល​ វៀតណាម​ (Vietnam​ Kennel​ Association)​និយាយ​ថា​ បើ​ទោះជា​គ្មាន​មនុស្ស​ច្រើន​បង្កាត់​ពូជ​សត្វ​ឆ្កែ​នៅ​វៀតណាម​ដូច​មាននៅ​តាម​បណ្ដា​ប្រទេស​ដទៃ​ទៀត​ក៏​ដោយ​ ចំនួន​នេះ​បាន​កើនឡើង​យ៉ាង​ខ្លាំង​កាលពី​ទសវត្សរ៍​មុន​។​ លោក​បន្ថែម​ទៀត​ថា​ សមាគម​នេះ​បាន​ជួយ​ធ្វើ​ឱ្យ​មាន​ភាព​ជាក់លាក់​ចំពោះ​ការ​បង្កាត់​ពូជ​សម្រាប់​ឆ្កែ​ក្នុងស្រុក​មាន​ដូច​ជា​ ពូជ​សត្វ​ឆ្កែ​ភូ​គួ​ក​ (Phu​ Quoc)​ ជា​ឆ្កែ​ដែល​បាន​ចេញ​សំដែង​នៅ​ក្នុង​ការ​បង្ហាញ​សត្វ​ឆ្កែ​ពិភពលោក​ (World​ Dog​ Show)​ នៅ​ទីក្រុង​បារី​ស​ជា​លើក​ដំបូង​បង្អស់​នៅ​ខែកក្កដា​ក្នុងឆ្នាំនេះ​។​

​បើ​ទោះជា​ពូជ​ឆ្កែ​ខុស​គ្នា​ជា​ច្រើន​ត្រូវ​បាន​នាំ​ចូល​ក្នុង​ប្រទេស​វៀតណាម​ក៏​ដោយ​ ក៏​លោក​បាវ​និយាយ​ថា​ កន្លង​មក​ពូជ​ឆ្កែ​ដ៏​ល្បី​ល្បាញ​​បំផុត​នោះ​គឺ​ពូជ​ឆ្កែ​ធំៗ​របស់​អា​ល្លឺ​ម៉​ង់​ ហៅ​ German​ Shepherd​។​ សត្វ​នេះ​ធំ​ពេញ​រូបរាង​អាច​មាន​តម្លៃ​ជិត​១​ពាន់​ដុល្លារ​ ដែល​ជា​ចំនួន​១០​ដង​នៃ​ប្រាក់បៀវត្ស​ប្រចាំខែ​ជា​មធ្យម​។​ ក្នុង​នាម​ជា​អ្នក​ស្រឡាញ់​ឆ្កែ​ លោក​ បាវ​ទទូច​ឡើង​ថា​ លោក​មិន​បរិភោគ​សាច់​ឆ្កែ​ទេ​ ហើយ​គិត​ថា​ អ្នក​បង្កាត់​ពូជ​ឆ្កែ​ដទៃ​ទៀត​ក៏​មាន​អារម្មណ៍​ដូច​គ្នា​ដែរ​។​ លោក​ ទ្រិ​ញ​ អា​ញ់​ ង៉ុ​ក​ (Trinh​ Anh​ Ngoc)​ មាន​វ័យ​២៧​ឆ្នាំ​ ជា​ឆ្មាំ​សន្ដិសុខ​នៅ​ឯ​ក្រុមហ៊ុន​មួយ​នៅ​ទីក្រុង​ហាណូយ​។​ កាលពី​៩​ខែ​មុន​ លោក​បាន​ចំណាយ​ប្រាក់​អស់​ចំនួន​៥០០​ដុល្លារ​ដែល​ស្មើនឹង​បៀវត្ស​គាត់​បី​ខែ​ដើម្បី​ទិញ​កូន​ឆ្កែ​ពូជ​របស់​អា​ឡឺ​ម៉​ង់​ German​ shepherd​។​

​លោក​ង៉ុ​ក​ ថ្លែង​ថា​ បើ​ទោះជា​លោក​នឹង​ប្រើប្រាស់​សត្វ​នេះ​ជា​ឆ្កែ​យាម​ផ្ទះ​ក៏​ដោយ​ ក៏​លោក​បាន​ចំណាយ​ប្រាក់​ដោយសារ​លោក​ចាប់អារម្មណ៍​លើ​ការ​ហ្វឹកហ្វឺន​ឆ្កែ​និង​ការ​បង្កាត់​ពូជ​ឆ្កែ​។​ លោក​ថ្លែង​ថា​ ឆ្កែ​នេះ​ជា​មិត្ដ​របស់​លោក​ ដូច្នេះ​លោក​នឹង​មិន​បរិភោគ​សាច់​ឆ្កែ​នេះ​ជា​ដាច់ខាត​។​ តែ​ទោះជា​យ៉ាងណា​ លោក​គ្មាន​អារម្មណ៍​ខ្ពើមរអើម​ចំពោះ​ការ​បរិភោគ​សាច់សត្វ​ឆ្កែ​ដទៃ​ទេ​ ៕
​