Khmer
English
Chinese
Frence
Vietnamese
Thai
ឥណ្ឌា-អាមេរិក ខាតបង់យ៉ាងធ្ងន់ធ្ងរដោយសារតែធ្លាក់ព្រិល
ដោយ ៖ ម៉ែវ សាធី ថ្ងៃទី 10 មករា 2012ម៉ោង 14:43:01
រយៈពេលប៉ុន្មានថ្ងៃកន្លងមកព្រិលធ្លាក់យ៉ាងខ្លាំងបានធ្វើឱ្យជីវភាពរស់នៅរបស់ពលរដ្ឋនៅភាគខាងជើងប្រទេសឥណ្ឌាជួបផលលំបាកយ៉ាងខ្លាំង ។
នៅរដ្ឋកាស្មៀរ សកម្មភាពរបស់មនុស្សនៅទីនោះត្រូវរាំងស្ទះស្ទើរតែទាំងស្រុង ។ ទន្លេដាល ដែលជារមណីដ្ឋានធម្មជាតិដ៏ល្បីល្បាញរបស់ឥណ្ឌានៅទីក្រុងស្រ៊ីណាហ្គា បណ្ដាលឱ្យទឹកទន្លេកកមួយចំនួនធំ បង្កផលប៉ះពាល់ និងខាតបង់យ៉ាងធ្ងន់ធ្ងរដល់វិស័យទេសចរណ៍ និងនេសាទដែលជាប្រភពចំណូលដ៏សំខាន់របស់ពលរដ្ឋក្នុងតំបន់ ។ តាមការព្យាករណ៍ទឹកនៅដងទន្លេទាំងមូលត្រូវបានកក ហើយពលរដ្ឋត្រូវសម្រាកពីការងារយ៉ាងតិច១ខែ ។ មន្ដ្រីនៅក្ន្នុងក្រុងបានរៀបចំឱ្យមានកម្មវិធីដុតអុសនៅកណ្ដាលទីក្រុងជាច្រើនកន្លែង ដើម្បីកាត់បន្ថយការខាតបង់ដល់អាយុជីវិតដោយអាកាសធាតុត្រជាក់ ។
ចំណែកនៅរដ្ឋអាឡាស្កា អាមេរិក ពលរដ្ឋក្នុងតំបន់កូដាវ៉ា ត្រូវបានព្រិលមានកម្រាស់រហូតដល់៥,៤ម៉ែត្រគ្របដណ្ដប់ ជាកម្រិតក្រាស់បំផុតមិនធ្លាប់មានពីមុនមក ។
ផ្ទះប្រជាពលរដ្ឋជាច្រើនត្រូវគ្របដណ្ដប់ទាំងស្រុងមិនអាចបើកទ្វារចេញចូលបាន ធ្វើឱ្យពលរដ្ឋត្រូវជាប់គាំងនៅក្នុងផ្ទះ ។ ពលរដ្ឋបានស្នើឱ្យរដ្ឋាភិបាលជួយឈូសឆាយព្រិលជួយដល់ពួកគាត់អាចចេញចូលក្នុងផ្ទះបាន ។
មន្ដ្រីក្នុងតំបន់បានប្រកាសអាសន្នតាំងពីថ្ងៃទី៦ មករា ក្រោយពេលព្រិលធ្លាក់៣សប្ដាហ៍ជាប់គ្នាមិនដាច់ ។ យ៉ាងហោចណាស់ក៏មានផ្ទះ៣ខ្នងបាក់ស្រុត ដោយមិនអាចទ្រនឹងកម្រិតព្រិលយ៉ាងក្រាស់ ។ មកទល់ពេលនេះមិនទាន់មានរបាយការណ៍ស្ដីពីការស្លាប់នៅឡើយ ។
កាលពីថ្ងៃទី៩ មករា មានភ្លៀងធ្លាក់ធ្វើឱ្យផ្លូវចរាចររអិលយ៉ាងខ្លាំងមិនអាចបើកបរបាន ហើយដើម្បីចូលទៅកាន់តំបន់នោះពលរដ្ឋ មន្ដ្រីរដ្ឋាភិបាលត្រូវធ្វើដំណើរតាមឧទ្ធម្ភាគចក្រ ៕
.jpg)
