Khmer
English
Chinese
Frence
Vietnamese
Thai
ជិះម៉ូតូកាត់ភូមិជនជាតិភាគតិចកំពុងសែនព្រេនត្រូវផាកជ្រូក១ក្បាល ស្រា១ពាង លុយ១,២លានរៀល
ដោយ ៖ សូរិយា ថ្ងៃទី 12 មករា 2012ម៉ោង 09:09:54
ខេត្ដរតនគិរី ៖ គេធ្លាប់តែឮការនិទាន តៗគ្នាអំពីទំនៀមទម្លាប់របស់ជនជាតិ ភាគតិចនៅបណ្ដាភាគឦសានរឿងផាក ពិន័យប្រសិនបើសមាជិកក្នុងភូមិ ឬអ្នក ចំណូលថ្មីប្រព្រឹត្ដខុសឆ្គងដោយប្រការ ណាមួយ ។ រហូតមកដល់ពេលនេះ ទំនៀមទម្លាប់នោះនៅតែរក្សាបានរហូត ធ្វើឱ្យមានជនរងគ្រោះត្រូវបង់ខាតជ្រូក ១ក្បាល, ស្រា១ពាង និងលុយ១,២លាន រៀលដោយសារតែជិះម៉ូតូឆ្លងកាត់ភូមិ ជនជាតិភាគតិចកំពុងសែនព្រេនប្រចាំ ឆ្នាំ បើទោះបីជាមានអន្ដរាគមន៍ពីអាជ្ញាធរ ក៏មិនមានប្រសិទ្ធភាពដែរ ។
អ្នកភូមិតឺន ឃុំតឺន ស្រុកកូនមុំ ខេត្ដ រតនគិរីដែលភាគច្រើនជាជនជាតិគ្រឹង បានរៀបចំពិធីសែនព្រេនប្រចាំឆ្នាំរបស់ ខ្លួនរយៈពេល៣ថ្ងៃចាប់ពីថ្ងៃទី១០ ដល់ថ្ងៃ ទី១២ ខែមករា ឆ្នាំ២០១២ ដែលពិធីនេះ មានការសែនព្រេនផឹកស៊ីរាំលេងកម្សាន្ដ ដូចដែលពួកគេបានធ្វើនាឆ្នាំមុនៗតាម ទំនៀមទម្លាប់ដូនតា ។ ពិធីនេះមិន អនុញ្ញាតឱ្យសមាជិកក្នុងភូមិចាកចេញ ពីភូមិនោះឡើយ រីឯអ្នកនៅក្រៅភូមិ មិនអនុញ្ញាតឱ្យចូលក្នុងភូមិនោះទេ ។ នៅច្រកចេញចូលភូមិតាមផ្លូវលំត្រូវ បានដាក់បារ៉ាស់កាត់ទទឹងផ្លូវ ។ ទាំងអ្នក នៅក្នុងភូមិ ឬអ្នកក្រៅភូមិដែលលើក បារ៉ាស់នោះឆ្លងចេញ ចូល ត្រូវរងនូវ ការផាកពិន័យតាមទម្លាប់ ។
ក្នុងពេលដែលអ្នកភូមិតឺនកំពុងរៀប ចំពិធីសែនព្រេនផឹកស៊ីរាំច្រៀងកម្សាន្ដ សប្បាយនោះ អ្នកស្រីណែត និងមិត្ដភក្ដិ ២នាក់ទៀតដែលមិនដឹងថាភូមិនោះ មានពិធីសែនព្រេន ក៏ធ្វើដំណើរឆ្លងកាត់ ភូមិនោះបំណងទៅចំការដំឡូង ។ ក៏ប៉ុន្ដែ គ្រាន់តែលើកបារ៉ាស់បណ្ដើរម៉ូតូបាន៣-៤ម៉ែត្រ ក៏ត្រូវអ្នកភូមិជនជាតិគ្រឹងព័ទ្ធ ផាកពិន័យទារប្រាក់ និងគ្រឿងសំណែន ផ្សេងៗទៀត ។
អ្នកស្រីណែតបាននិយាយថា នៅ វេលាម៉ោង៨ព្រឹក ថ្ងៃទី១០ ខែមករា ឆ្នាំ ២០១២ ខ្លួននិងកម្មករចំការដំឡូង២នាក់ ទៀតត្រូវធ្វើដំណើរកាត់ភូមិតឺន លុះមក ដល់ចំណុចបារ៉ាស់ដែលមានដើមឈើ ប៉ុនកំភួនជើងចងកាត់ទទឹងថ្នល់ ពួកគាត់ ក៏លើកឈើនោះដើម្បីឆ្លងកាត់ ក៏ត្រូវ បានអ្នកភូមិមកឃាត់ដំណើរ មិនឱ្យឆ្លង កាត់។ បើទោះបីជាពួកគាត់អង្វរកយ៉ាង ណាក៏ដោយ ក៏អ្នកភូមិតឺនទាំងនោះមិន ស្ដាប់ដែរ ។
អ្នកស្រីណែត រស់នៅភូមិ១ សង្កាត់ ឡាបានសៀក ក្រុងបានលុង បានឱ្យដឹង ថា បើទោះបីជាពួកគាត់អង្វរកយ៉ាងណា ក៏អ្នកភូមិទាំងនោះមិនព្រមអនុញ្ញាតឱ្យ ក្រុមគាត់ធ្វើដំណើរចាកចេញនោះដែរ។ អ្នកភូមិទាមទារយកប្រាក់១,២លាន រៀល, ជ្រូក១ក្បាល និងស្រា១ពាងទើប អនុញ្ញាតឱ្យពួកគាត់បន្ដដំណើរទៅមុខ ។
ដោយសារមិនមានលទ្ធភាពរកប្រាក់ ឱ្យអ្នកភូមិតឺន ទើបអ្នកស្រីណែត និងមិត្ដ ភក្ដិស្វែងរកអន្ដរាគមន៍ពីអាជ្ញាធរ ។ ក្នុង នោះសូម្បីតែសមត្ថកិច្ចកងរាជអាវុធ ហត្ថស្រុកក៏មិនអាចដោះស្រាយបាន ហើយរឿងនេះធ្វើឱ្យភ្ញាក់ផ្អើលដល់លោក អភិបាលខេត្ដទៀតផង ។ លោកអភិបាល ខេត្ដរតនគិរី ប៉ាវ ហមផាន បានបញ្ជាឱ្យ អភិបាលស្រុកកូនមុំជួយអន្ដរាគមន៍ តែ នៅតែមិនបានផល ពោលគឺអ្នកស្រី ណែត និងមិត្ដភក្ដិមិនអាចចាកចេញ ដោយគ្មានសំណងសម្រាប់អ្នកភូមិតឺន នោះបានឡើយ ។
លោកអ៊ុក ស្រេង ប្រធានមន្ទីរវប្បធម៌ និងវិចិត្រសិល្បខេត្ដរតនគិរីបានឱ្យដឹង ថា នេះជាបញ្ហាប្រពៃណី ទំនៀមទម្លាប់ ជនជាតិភាគតិចដែលយើងមិនអាចទៅ ណែនាំ ឬបញ្ឈប់ពួកគាត់បានទេ។ លោក បានបន្ដថា អ្នកធ្វើដំណើរគួរតែយល់ ដោយខ្លួនឯងផង ពេលឃើញគេដាក់ បារ៉ាស់ដូច្នោះ គឺវាសញ្ញាប្រាប់ថាមិន អនុញ្ញាតឱ្យយើងចូលទេ ។
អ្នកខ្លះនិយាយថា វាមិនមែនជាវិធី ដែលត្រូវបន្ដធ្វើនោះទេ ពីព្រោះផ្លូវ គមនាគមន៍ក្នុងសហគមន៍នានាជាផ្លូវ សាធារណៈសម្រាប់ឱ្យសាធារណជនធ្វើ ដំណើរ ។ អ្នកភូមិជនជាតិភាគតិចនៅ តែអាចធ្វើពិធីសែនព្រេនដោយមិន អនុញ្ញាតឱ្យមានអ្នកភូមិផ្សេងឆ្លងកាត់ ពិធីរបស់ខ្លួនដោយគ្រាន់តែជូនដំណឹង សរសេរជាអក្សរដាក់ផ្លូវចូលភូមិក្នុងការ ហាមអ្នកដទៃឆ្លងកាត់មូលដ្ឋានរបស់ខ្លួន គឺក៏អាចជាសញ្ញាខ្លះៗដែរ ៕
.jpg)
