Khmer
English
Chinese
Frence
Vietnamese
Thai
តម្លៃប្រេងឥន្ធនៈនៅកម្ពុជាបន្ដឡើងថ្លៃរហូតដល់១លីត្រ៥៨០០រៀល
ដោយ ៖ មរតក ថ្ងៃទី 24 កុម្ភះ 2012ម៉ោង 09:05:41
ភ្នំពេញ ៖ តម្លៃប្រេងនៅប្រទេសកម្ពុជាបានឡើងថ្លៃជាបន្ដបន្ទាប់ដែលរហូតមកដល់ថ្ងៃនេះតម្លៃប្រេងនៅតាមស្ថានីយលក់រាយដូចជាក្រុមហ៊ុនកាល់តិច, ក្រុមហ៊ុនតូតាល់, ក្រុមហ៊ុនតេលា និងក្រុមហ៊ុនសូគីម៉ិច គឺតម្លៃប្រេងសាំងស៊ុបពែរ១លីត្រថ្លៃ៥៨០០រៀល, ប្រេងសាំងធម្មតា១លីត្រតម្លៃ៥៥០០រៀល និងប្រេងម៉ាស៊ូត១លីត្រតម្លៃ៥២០០រៀល ។
ការឡើងថ្លៃប្រេងសាំងជាបន្ដបន្ទាប់រហូតដល់១លីត្រជិត៦ពាន់រៀលនេះត្រូវបានមន្ដ្រីរាជរដ្ឋាភិបាលអះអាងថា បណ្ដាលមកពីមានវិបត្ដិប្រេងនៅក្នុងពិភពលោក ដែលវិបត្ដិនេះមិនមែនប៉ះតែប្រទេសកម្ពុជាមួយប៉ុណ្ណោះទេគឺកើតមានទូទាំងពិភពលោកហើយប្រជាពលរដ្ឋខ្មែរគ្រប់រូបក៏ទទួលឥទ្ធិពលនេះដែរ ។
មកដល់ថ្ងៃទី២៣ ខែកុម្ភៈ ឆ្នាំ២០១២ តម្លៃប្រេងនៅលើទីផ្សារអន្ដរជាតិ១បារ៉ែលថ្លៃ១០៦ដុល្លារ។ ការកើនឡើងនៃតម្លៃប្រេងទីផ្សារអន្ដរជាតិ គឺបានធ្វើឱ្យតម្លៃប្រេងនៅក្នុងប្រទេសកម្ពុជាកើនឡើងភ្លាមៗផងដែរ។ ការកើនឡើងនេះបានធ្វើឱ្យប៉ះពាល់ដល់ជីវភាពរបស់ប្រជាពលរដ្ឋខ្មែរ ជាពិសេសប្រជាកសិករ កម្មករ និងមន្ដ្រីរាជការដែលមានប្រាក់បៀវត្សរ៍តិចតួច ។
លោកទិត សុធា អនុប្រធានអង្គភាពព័ត៌មាននិងប្រតិកម្មរហ័សនៃទីស្ដីការគណៈរដ្ឋមន្ដ្រីមានប្រសាសន៍ថា ដោយសារតែមានឥទ្ធិពលនៃតម្លៃទីផ្សារក្នុងពិភពលោក ដូច្នេះក្រុមហ៊ុនដែលមកវិនិយោគក្នុងប្រទេសកម្ពុជាក៏ទទួលរងឥទ្ធិពលនៃតម្លៃទីផ្សារប្រេងពិភពលោកគឺវាឡើងខ្ពស់អ៊ីចឹងហើយ។ និយាយរួមអ្នកទាំងអស់គ្នាសុទ្ធតែទទួលផលប៉ះពាល់ដូចគ្នា។ ដូច្នេះគួរគប្បីមើលស្ថានភាព ជាក់ស្ដែងចៀសវាងការតវ៉ាដែលជាការបង្ខិតបង្ខំឱ្យរាជរដ្ឋាភិបាលធ្វើអ្វីមួយហួសពីការងាររបស់ខ្លួន ។
លោកនុច អ្នករត់ឡានឈ្នួលពីតាប៉ាវ ស្រុកក្រូចឆ្មារ ខេត្ដកំពង់ចាម មកភ្នំពេញ មានប្រសាសន៍ថា សព្វថ្ងៃលោកជួបការលំបាកយ៉ាងខ្លាំងនៅពេលដែលតម្លៃប្រេងបានឡើងខ្ពស់បែបនេះអ្នកដំណើរនៅតែឱ្យតម្លៃដដែល។ នៅពេលដែលយើងសុំថ្លៃគាត់បន្ថែម ពួកគាត់នាំគ្នាតវ៉ា អ្នកខ្លះមិនជិះតែម្ដង ប៉ុន្ដែក៏មានអ្នកខ្លះគេយល់ដឹងគេក៏យល់ព្រមឱ្យ ។
លោកបន្ដថា របររត់ឡានឈ្នួលសព្វថ្ងៃពិបាករកប្រាក់ចំណេញណាស់ នៅថ្ងៃខ្លះខាតក៏មាន ដោយសារតែតម្លៃប្រេងបានឡើងជាបន្ដបន្ទាប់។ ដូច្នេះសូមរាជរដ្ឋាភិបាលជួយធ្វើយ៉ាងណា សម្រួលបញ្ចុះតម្លៃទំនិញ ពិសេសតម្លៃប្រេងឱ្យចុះថ្លៃជាងនេះ ។
អ្នកស្រីស៊ីណិត រស់នៅខណ្ឌឫស្សីកែវ រាជធានីភ្នំពេញ មានប្រសាសន៍ថា ថ្លៃទំនិញសព្វសារពើបានឡើងថ្លៃ ពិសេសត្រីសាច់បន្លែជាដើម ការឡើងថ្លៃនេះអ្នកស្រីសន្និដ្ឋានថា អាចបណ្ដាលមកពីប្រេងសាំងដែលកំពុងបន្ដឡើងថ្លៃជាបន្ដបន្ទាប់។ អ្នកស្រីបន្ដថា ក្នុង១ថ្ងៃៗប្ដីអ្នកស្រី រកចំណូលស្ទើរតែមិនបាន២ម៉ឺនរៀលផង ប៉ុន្ដែការចំណាយនៅថ្ងៃខ្លះលើស២ម៉ឺនរៀលទៅទៀត។ អ្នកស្រីសំណូមពរឱ្យរាជរដ្ឋាភិបាលចាត់វិធានការយ៉ាងណា សម្រួលបញ្ចុះតម្លៃទំនិញ ពិសេសតម្លៃប្រេងសាំងដែលកំពុងឡើងថ្លៃយ៉ាងខ្ពស់នេះ ៕
.jpg)
