Khmer
English
Chinese
Frence
Vietnamese
Thai
ចិនគ្រោងសាងសង់រោងចក្រផលិតប្រេងអេតាណុលធំមួយនៅក្នុងខេត្តជាយដែនខ្មែរថៃ
ដោយ ៖ កាំង សុធា ថ្ងៃទី 25 កុម្ភះ 2012ម៉ោង 15:48:31
បើមិនមានការប្រែប្រួលទេរោងចក្រផលិតប្រេងអេតាណុលនឹងប្រាកដឡើងនៅចំពោះមុខអ្នកបន្ទាយមានជ័យក្នុងឆ្នាំ២០១២ ។ នេះយោងសេចក្ដីសម្អាងរបស់លោកអភិបាលខេត្ដដែលបាននិយាយប្រាប់ក្រុមអ្នកព័ត៌មានពេលកន្លងនេះថា អ្នកវិនិយោគមកពីប្រទេសចិនរួមជាមួយអ្នកវិនិយោគក្នុងស្រុក មានគម្រោងសាងសង់រោងចក្រផលិតប្រេងអេតាណុលមួយនៅខេត្ដខាងលើ ដោយវត្ថុធាតុដើមរបស់វាគឺជាមើមដំឡូង។
លោកអភិបាលខេត្ដបានបង្ហើបថា រោងចក្រនេះនឹងអាចអូសទាញកម្លាំងពលកម្មមនុស្សចំនួនប្រមាណជាង២ពាន់នាក់ និងអាចជួយលើកស្ទួយដល់តម្លៃកសិផលក្នុងប្រទេសកម្ពុជាមួយកម្រិតថែមទៀត ។ លោក អ៊ុង អឿន អភិបាលខេត្ដបន្ទាយមានជ័យបានមានប្រសាសន៍ថា រោងចក្រផលិតប្រេងអេតាណុលរបស់ក្រុមហ៊ុនចិននេះនឹងចាប់ដំណើរការសាងសង់នៅក្នុងឆ្នាំ២០១២ ។ រោងចក្រនេះត្រូវបោះទីតាំងនៅស្រុកថ្មពួកដែលជាស្រុកមួយមានសក្ដានុពលខាងវិស័យកសិកម្មរបស់ខេត្ដបន្ទាយមានជ័យ ជាពិសេសលើដំណាំដំឡូងមីដែលមានប្រជាពលរដ្ឋច្រើននាក់នាំគ្នាដាំច្រើនជារៀងរាល់ឆ្នាំ ។
លោក អ៊ុង អឿន បានមានប្រសាសន៍ដូច្នេះថាៈ “កន្លងមកពេលដាំហើយឱ្យតម្លៃស្រេចតែចិត្ដឈ្មួញ ជាពិសេសលក់ឱ្យស្រុកថៃ បិទបើកៗអ៊ីចឹងទៅមានការពិបាក ។ ដូច្នេះរាជរដ្ឋាភិបាល និងអាជ្ញាធរខេត្ដមានសេចក្ដីសោមនស្សចំពោះការបង្កើតរោងចក្រអេតាណុលរបស់ក្រុមហ៊ុនចិននៅក្នុងស្រុកថ្មពួក ខេត្ដបន្ទាយមានជ័យ” ។
លោកអភិបាលខេត្ដបន្ដថា នៅពេលរោងចក្រនេះចាប់ផ្ដើមដំណើរការ ប្រជាកសិករខ្មែរអាចនាំកសិផលរបស់ខ្លួនទៅលក់ឱ្យក្រុម ហ៊ុនផ្ទាល់ ដោយពុំចាំបាច់ដឹកយកទៅលក់នៅស្រុកថៃដូចមុនទៀតទេ ។ រោងចក្រក្រុមហ៊ុនចិននេះត្រូវការដំឡូងមីរាប់ម៉ឺនតោនក្នុងមួយឆ្នាំៗ ។ ក្រុមហ៊ុនចិននេះបានទទួលដីសម្បទានសេដ្ឋកិច្ចពីរាជរដ្ឋាភិបាលទំហំ៦ពាន់ហិកតាររួចរាល់ហើយ ។
ជំហានដំបូងក្រុមហ៊ុននេះត្រូវការដីទំហំ២ពាន់ហិកតា ដើម្បីដាំដំឡូងមីសម្រាប់ផ្គត់ផ្គង់តម្រូវការរបស់រោងចក្រ ។
លោក អ៊ុង អឿន បន្ថែម “ឥឡូវពួកគេកំពុងគូរប្លង់នៅស្រុកចិន ហើយយកមកឆ្លងក្រសួងឧស្សាហកម្មយ៉ាងតិចក៏មាន២ពាន់ហិកតាដើម្បីបម្រើសេចក្ដីត្រូវការពីមួយឆ្នាំទៅមួយឆ្នាំរបស់រោងចក្រគាត់ ។ ក្រៅពីនោះគឺការប្រមូលទិញពីប្រជាជនប៉ុន្មានក៏បានដែរឱ្យតែប្រជាជនលក់ឱ្យគាត់ព្រោះគាត់ត្រូវការច្រើន” ។
ប្រភពបានបន្ដថា ក្រុមហ៊ុនចិននេះបានផ្ទេរមូលធនសម្រាប់សាងសង់រោងចក្រផលិតប្រេងអេតាណុលចូលមកធនាគារស្រុកខ្មែររួចរាល់ ។ ក្រុមហ៊ុននេះនឹងចាប់ផ្ដើមសាងសង់រោងចក្រនៅក្នុងអំឡុងខែមីនា ឆ្នាំ២០១២ ដែលអាចរួចរាល់ជាស្ថាពរនៅចុងខែធ្នូ ឆ្នាំ២០១២ ។ គម្រោងសាងសង់រោងចក្ររបស់វិនិយោគិនចិននេះត្រូវបានគេមានជំនឿថាអាចជួយទប់ស្កាត់លំហូរចំណាកស្រុករបស់ប្រជាពលរដ្ឋឆ្លងដែនខុសច្បាប់ចូលទៅរកការងារធ្វើនៅក្នុងប្រទេសថៃបានមួយផ្នែកធំ ។
អាជ្ញាធរខេត្ដបន្ទាយមានជ័យបានអះអាងថា ដីចំការដំឡូងមីក្នុង១ហិកតា ក្រុមហ៊ុនត្រូវការប្រើកម្លាំងកម្មករថែទាំចំនួន២នាក់ ដែលផ្ទៃដីដាំដំឡូងមីរបស់ក្រុមហ៊ុនមានជិត៦ពាន់ហិកតា ហើយអាចត្រូវការកម្មករសរុបប្រមាណ១.២០០នាក់ ។ ចំនួនកម្មករនេះគឺសម្រាប់មើលថែទាំចំការដំឡូងមីដោយផ្ទាល់ ចំណែកឯកម្មករធ្វើការក្នុងរោងចក្រអាចមានចំនួនកើនឡើងរហូតពី១.៥០០ ទៅ ២.០០០នាក់ ។
កាលពីឆ្នាំ២០១០កន្លងទៅ ខេត្ដបន្ទាយមានជ័យបានដាំដំឡូងមីលើផ្ទៃចំនួន២៥០០០ហិកតា ហើយនៅឆ្នាំ២០១១នេះអាជ្ញាធរខេត្ដឱ្យដឹងថា ប្រជាកសិករនាំគ្នាដាំដំឡូងរហូតទៅ៤ម៉ឺន២ពាន់ហិកតា ។ ទំហំផ្ទៃដីនេះអាចធ្វើឱ្យគេប្រមូលផលដំឡូងមីបានយ៉ាងតិចចំនួន ១លានតោនក្នុងមួយឆ្នាំៗ ។
កសិផលដំឡូងមីនៅក្នុងប្រទេសកម្ពុជានារយៈពេលប៉ុន្មានឆ្នាំចុងក្រោយនេះត្រូវបានប្រជាកសិករនាំគ្នាដឹកយកទៅលក់ឱ្យឈ្មួញនៅក្នុងប្រទេសថៃ ។ ឈ្មួញនៅក្នុងប្រទេសថៃបានទម្លាក់តម្លៃដំឡូងមីរបស់ខ្មែររាល់រដូវប្រមូលផលម្ដងៗ ។ ការដែលឈ្មួញនៅក្នុងប្រទេសថៃទម្លាក់តម្លៃកសិផលខ្មែរដូចនេះដោយសារតែនៅក្នុងប្រទេសកម្ពុជានៅពុំទាន់មានរោងចក្រកែច្នៃ ។
ប្រទេសកម្ពុជាមានរោងចក្រផលិតប្រេងអេតាណុលមួយនៅខេត្ដកណ្ដាល ជាយរាជធានីភ្នំពេញ ។ ក្រៅពីនេះនៅតាមខេត្ដមួយ ចំនួនដូចជា ខេត្ដប៉ៃលិន ខេត្ដបាត់ដំបង មានតែរោងចក្រសម្ងួតសម្រាប់នាំចេញទៅលក់នៅប្រទេសក្រៅ ។ រោងចក្រផលិតប្រេង អេតាណុលនៅក្នុងខេត្ដបន្ទាយមានជ័យនេះ អាចទាញផលដំឡូងមីនៅក្នុងខេត្ដបាត់ដំបង និងខេត្ដប៉ៃលិន ផងដែរ ៕
