Khmer
English
Chinese
Frence
Vietnamese
Thai
ស្ថានភាពអគ្គិសនីនៅកម្ពុជាបច្ចុប្បន្ននិងអនាគត
ដោយ ៖ នគរវត្ត ថ្ងៃទី 25 កុម្ភះ 2012ម៉ោង 16:06:45
មន្ដ្រីក្រសួងឧស្សាហកម្មរ៉ែនិងថាមពលបានប្រាប់កាសែតក្នុងស្រុកឱ្យដឹងថា ការប្រើប្រាស់ថាមពលអគ្គិសនីនៅតាមគេហដ្ឋានមានបរិមាណច្រើនជាង បើធៀបនឹងស្ថាប័នឬកន្លែងផ្សេងទៀត ។ លោក តូច សុវណ្ណា ប្រធាននាយកដ្ឋានបច្ចេកទេសថាមពលនៃក្រសួងឧស្សាហកម្មរ៉ែនិងថាមពលបានឱ្យដឹងថា បច្ចុប្បន្នកម្ពុជាមានថាមពលអគ្គិសនីសរុបប្រមាណ៥០០មេហ្គាវ៉ាត់ ដែលរួមទាំងបណ្ដាញរបស់រដ្ឋ បណ្ដាញឯកជន និងការប្រើប្រាស់ជាប្រតិបត្ដិឯកជន ។ លោកបន្ដថា ការប្រើប្រាស់ថាមពលអគ្គិសនីនៅតាមគេហដ្ឋានមានរហូតដល់៤១ភាគរយនៃថាមពលសរុប ។ ក្រៅពីនោះ ២២ភាគរយប្រើប្រាស់ក្នុងវិស័យឧស្សាហកម្ម ជាង៣០ភាគរយប្រើប្រាស់នៅលើវិស័យផ្សេងៗ និងប្រមាណ៨ភាគរយប្រើប្រាស់នៅតាមការិយាល័យរដ្ឋបាលរបស់រដ្ឋ ។ លោកក៏បានថ្លែងថា នៅក្នុងចំណោមថាមពលខាងលើ ប្រទេសកម្ពុជាបានទិញថាមពលអគ្គិសនី៤២ភាគរយពីប្រទេសជិតខាង ពោលគឺវៀតណាម ឡាវ និងថៃ ដើម្បីផ្គត់ផ្គង់តម្រូវការខ្ពស់នៅក្ន្នុងប្រទេស ចំណែកនៅសល់គឺកម្ពុជាផលិតដោយខ្លួនឯង ។ កម្ពុជាបានបើកដំណើរការទំនប់វារីអគ្គិសនីកំចាយដែលជាការវិនិយោគរបស់ក្រុមហ៊ុនចិនឈ្មោះ Sinohydro រយៈពេល៤០ឆ្នាំ មុននឹងប្រគល់ឱ្យកម្ពុជាគ្រប់គ្រង ។ ទំនប់វារីអគ្គិសនីនេះអាចផលិតថាមពលអគ្គិសនីរហូតដល់ចំនួន១៩៤មេហ្កាវ៉ាត់ ក្រោមទឹកប្រាក់វិនិយោគ២៨០លានដុល្លារ ។ អភិបាលខេត្ដកំពត លោក ខូយ ឃុនហួរ បាននិយាយថា ក្នុងចំណោមកម្លាំងថាមពលអគ្គិសនី១៩៣មេហ្កាវ៉ាត់ របស់ភ្នំកំចាយ មាន១៨០មេហា្កវ៉ាត នឹងផ្គត់ផ្គង់មកខេត្ដតាកែវ និងភ្នំពេញ ហើយជាង១០មេហ្កាវ៉ាត់នឹងផ្គត់ផ្គង់នៅខេត្ដកំពត និងខេត្ដព្រះសីហនុ ។ ដូច្នេះកម្ពុជានឹងមានថាមពលអគ្គិសនីបន្ថែមពីលើថាមពលដែលមានស្រាប់ចំនួន៥០០មេហ្កាវ៉ាត់នាពេលបច្ចុប្បន្ននេះ ។ តាមលោក តូច សុវណ្ណា និយាយថា នៅក្នុងចន្លោះឆ្នាំ២០២០ ដល់២០២៥ កម្ពុជាត្រូវការថាមពលអគ្គិសនីរហូតដល់៣០០០មេហ្កាវ៉ាត់ ។
រដ្ឋលេខាធិការក្រសួងឧស្សាហកម្មរ៉ែនិងថាមពល លោក សាត សាមី បាននិយាយថា នៅពេលបច្ចុប្បន្នអគ្គិសនីរបស់រដ្ឋផ្គត់ផ្គង់បានជិត៣០ភាគរយនៅទីក្រុង ហើយការបញ្ជូននៅជនបទបានជិត៥០ភាគរយ ។ រហូតដល់ឆ្នាំ២០២០ បណ្ដាញភ្លើងអគ្គិសនីរបស់រដ្ឋអាចផ្គត់ផ្គង់យ៉ាងហោចណាស់ក៏បាន៧០ភាគរយតាមផ្ទះនៅទូទាំងប្រទេសដែរ ។ លោកបន្ដថា “ដំបូងបំផុត យើងផលិតវារីអគ្គិសនីគឺយើងផ្គត់ផ្គង់នៅទីប្រជុំជន ។ កន្លែងណាភ្លើងរដ្ឋទៅដល់ កន្លែងនោះមានតម្លៃថោកជាងភ្លើងឯកជន”។ បច្ចុប្បន្នតម្លៃអគ្គិសនីនៅកម្ពុជាគឺជាឧបសគ្គ ជាពិសេសសម្រាប់វិស័យផលិត ដែលធ្វើឱ្យទំនិញកម្ពុជាមិនទាន់មានភាពប្រកួតប្រជែង ។ សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាបានថ្លែងនៅក្នុងវេទិការដ្ឋាភិបាលនិងវិស័យឯកជនកាលពីចុងខែវិច្ឆកាថា រាជរដ្ឋាភិបាលបានរៀបចំផ្ដល់ថវិកា៨០លានដុល្លារ ជាឥណទានឥតការប្រាក់ដល់អគ្គិសនីកម្ពុជាយកទៅវិនិយោគលើការស្ថាបនាបណ្ដាញបញ្ជូនរងដើម្បីពង្រឹងវិសាលភាពនៃការផ្គត់ផ្គង់ថាមពលអគ្គិសនីជូនប្រជាជនបានប្រើប្រាស់កាន់តែច្រើនផង ។ បើទោះបីយ៉ាងនេះក្ដី លោក សាត សាមី ឱ្យដឹងថា កម្ពុជាត្រូវការប្រាក់រាប់រយលានដុល្លារបន្ថែមទៀត ដើម្បីពង្រីកបណ្ដាញ ដោយលោកបញ្ជាក់ថា បច្ចុប្បន្នក្រសួងកំពុងពិភាក្សាជាមួយដៃគូអភិវឌ្ឍន៍ផ្សេងៗដូចជា ជប៉ុន កូរ៉េ បារាំង ។ រដ្ឋលេខាធិការរូបនេះបានបន្ដទៀតថា “ប្រទេសគេមួយចំនួន ភ្លើងមានដល់ជនបទ ដូចនេះវាជួយច្រើន” ។
តាមប្រភពព័ត៌មានពីក្រសួងឧស្សាហកម្មរ៉ែនិងថាមពល បានឱ្យដឹងថា ប្រទេសកម្ពុជាមកដល់ពេលនេះបានកសាងនិងមានគម្រោងផលិតអគ្គិសនីឱ្យបាន២,០០០មេហ្កាវ៉ាត់ដែលក្នុងនោះមានទី១ វារីអគ្គិសនីគិរីរម្យ១ មានអនុភាព១២មេហ្កាវ៉ាត់ បានដាក់ឱ្យដំណើរការនៅឆ្នាំ២០០២ ។ ទី២ វារីអគ្គិសនីកំចាយ មានអនុភាព១៩៣.២មេហ្កាវ៉ាត់ ។ ទី៣ វារីអគ្គិសនីគិរីរម្យ៣ មានអានុភាព១៨មេហ្កាវ៉ាត់ គ្រោងដាក់ដំណើរការនៅខែមេសា ឆ្នាំ២០១២ ។ ទី៤ វារីអគ្គិសនីស្ទឹងអាតៃ អានុភាព១២០មេហ្កាវ៉ាត់ គ្រោងដាក់ដំណើរការចុងឆ្នាំ២០១៣ ។ ទី៥ វារីអគ្គិសនីស្ទឹងតាតៃ អានុភាព២៤៦មេហ្កាវ៉ាត់ គ្រោងដាក់ដំណើរការនៅឆ្នាំ២០១៤ ។ ទី៦ វារីអគ្គិសនីឬស្សីជ្រុំក្រោម អានុភាព៣៣៨មេហ្កាវ៉ាត់ គ្រោងដាក់ឱ្យដំណើរការនៅឆ្នាំ២០១៥ ។ ទី៧ រោងចក្រអគ្គិសនីប្រើធ្យូងថ្មទី១ ដំណាក់កាលទី១ អានុភាព១០០មេហ្កាវ៉ាត់ គ្រោងដាក់ដំណើរការចុងឆ្នាំ២០១៣ និងដំណាក់កាលទី២ អានុភាព១៣៥មេហ្កាវ៉ាត់ គ្រោងដាក់ដំណើរការនៅឆ្នាំ២០១៦ និងទី៨ រោងចក្រអគ្គិសនីប្រើធ្យូងថ្មទី២ ដំណាក់កាលទី១ អានុភាព២៧០មេហ្កាវ៉ាត់ គ្រោងដាក់ដំណើរការនៅឆ្នាំ២០១៤ និងមានគម្រោងផលិតកម្មអគ្គិសនីជាច្រើនទៀតកំពុងសិក្សានិងពិភាក្សាដើម្បីឈានទៅអភិវឌ្ឍន៍ជាបន្ដបន្ទាប់ ៕
