Khmer
English
Chinese
Frence
Vietnamese
Thaiជីវិតស្រីអភ័ព្វក្រោមចង្កូមប្តីអគតិ
ដោយ ៖ សុផល|ថ្ងៃទី 27 កុម្ភះ 2012 ម៉ោង 14:07:28
ញាតិមិត្ដក្នុងភូមិផងរបងជាមួយអង្គុយជុំគ្នាជាវង់តូចធំក្នុងថ្ងៃបុណ្យសពអ្នកស្រី ហុត សាម៉េត ដំណាលរឿងរ៉ាវដ៏គួរឱ្យខោ្លចចិត្ដនៃជីវិតដ៏សែនអភ័ព្វរបស់គាត់ ។ មុនពេលផុតដង្ហើមអ្នកស្រីត្រូវប្ដីវាយធ្វើបាប ចុះទៅមានស្រីហើយរសាត់អណ្ដែតគ្រប់ច្រកល្ហក ត្រូវប្ដីបោះបង់ចោល និងបោកប្រាស់យកប្លង់ដី-ផ្ទះដែលជាជម្រកចុងក្រោយរបស់ប្រពន្ធកូនយកទៅបញ្ចាំ និងលក់គ្មានសល់ ហើយបោះបង់ប្រពន្ធកូនឱ្យកំព្រីកំព្រារងារក្នុងចិត្ដរហូតអ្នកស្រីដាច់ចិត្ដយកកូនទៅអ្នកផ្សេងជួយចិញ្ចឹមហើយធ្វើដំណើរផ្សងព្រេងតាមប្ដីរហូតព្រំដែនថៃខ្មែរ ។ ចុងក្រោយអ្នកស្រីបានវិលមកស្លាប់ដោយសារលង់ទឹកក្រោយពេលតាមរកប្ដីតែរកមិនឃើញ ។ ពេលស្លាប់អ្នកស្រីបន្សល់ទុកលុយតែ ២៤០០រៀល ប៉ុណ្ណោះទុកឱ្យកូនធ្វើបុណ្យ ។
អ្នកស្រី ហុត ពត ដែលត្រូវជាប្អូនស្រីបង្កើតរបស់សពអ្នកស្រី ហុត សាម៉េត បានរៀបរាប់ប្រាប់នគវត្ដថា បងស្រីរបស់ខ្ញុំតាំងពីពេលបានប្ដីឈ្មោះ ផូ សុផល នៅឆ្នាំ១៩៨៣មកជីវិតរបស់គាត់សែនល្វីងជូរចត់ ។ ប្ដីរបស់គាត់ចូលចិត្ដដើរលេងផឹកស៊ីស្រីញីអូនបង មិនគិតដល់ទុក្ខលំបាកប្រពន្ធកូនឡើយ ថែមទាំងមកដល់ផ្ទះរករឿងវាយដំច្រំធាក់ប្រពន្ធឥតត្រាប្រណី មិនថាពេលប្រពន្ធមានទម្ងន់ ឬប្រពន្ធកូនខ្ចីអ្វីនោះឡើយ ។ ក្រោយមកទៀត ប្ដីរបស់គាត់ទៅមានស្រីថ្មីចុះចោលអ្នកស្រីបាត់ខណៈដែលបងស្រី សាម៉េត មានកូនប្រុសពីរនាក់ ។
បងស្រី សាម៉េត ត្រូវរត់មករស់នៅជាមួយម្ដាយបង្កើតឈ្មោះលោកយាយ សុំ ម៉ិច ហើយបន្ដិចក្រោយមកទៀតលោកយាយជាម្ដាយ ក៏ទទួលមរណភាពចោលបងស្រី និងចៅឱ្យរស់នៅយ៉ាងកណ្ដោចកណ្ដែងតែបីនាក់ម្ដាយនិងកូន ។ ទោះមានការលំបាកយ៉ាងណាក្ដី បងស្រី សាម៉េត ខំប្រឹងតស៊ូចិញ្ចឹមកូនបានយ៉ាងលំបាកលំបិនបំផុត ។
ពីរឆ្នាំក្រោយពីមរណភាពយាយជាម្ដាយ ស្រាប់តែលេចមុខ សុផល ជាប្ដីមកដល់ផ្ទះហើយរត់ទៅអោបប្រពន្ធកូនទ្រហោយំនិយាយរៀបរាប់សារភាពទោសកំហុសដែលខ្លួនបានវង្វេងធ្វើមកលើប្រពន្ធកូនហើយបានសន្យាថាលែងធ្វើបាបប្រពន្ធកូនដូចមុនទៀតហើយគេនឹងខំរកស៊ីចិញ្ចឹមប្រពន្ធកូនឱ្យបានល្អប្រសើរដូចគេឯង សុំឱ្យតែប្រពន្ធអភ័យទោសឱ្យគេម្ដងចុះ និងសុំមូលគ្នាវិញ ។ ដោយឃើញកាយវិការស្លូតដូចពស់ប្រលិតដ៏គួរឱ្យអាណិត គួបផ្សំនឹងចិត្ដទន់ជ្រាយផងបងស្រីជាប្រពន្ធក៏យល់ព្រមមូលគ្នាវិញ តែសូមឱ្យដាច់ស្រេចជាមួយប្រពន្ធចុងជាមុនសិន ហើយប្ដីក៏យល់ព្រមធ្វើឱ្យដាច់ស្រេចជាមួយប្រពន្ធចុងមែន ។
អ្នកស្រី ហុត ពត ជាប្អូនស្រីបង្កើតបន្ថែមថា ក្រោយពីជួបជុំគ្នា ប្ដីគាត់កែចរិតច្រើនមែន គេធ្វើល្អជាមួយបងស្រីខ្លាំងណាស់មិនដែលចេញទៅស៊ីផឹកផ្ដេសផ្ដាសដូចមុនទេហើយដូចជាស្រឡាញ់បងស្រីខ្លាំងណាស់ ឯសម្ដីក៏សុភាពរាបសាគួរឱ្យជឿទុកចិត្ដដែរ ។ តែចរិតលក្ខណៈខាងលើនេះគឺជាល្បិចបំភ័ន្ដភ្នែកបែបកន្ទុយខ្វៀនដើម្បីបោកគាត់តែប៉ុណ្ណោះ ។ ពេលបងស្រីមានទម្ងន់កូនស្រីពៅ (ផូ សុភី) បាន៥ខែ ស្របពេលដែលឪពុកក្មេកមានជំងឺ ប្ដីបងស្រី ឈ្មោះ ផូ សុផល បានបបួលគាត់ទៅមើលនិងរកគ្រូពេទ្យជួយព្យាបាល ។
ពេលនោះប្ដីក៏សុំយកប្លង់ដីទៅបញ្ចាំដើម្បីយកលុយទៅសងថ្លៃព្យាបាលជំងឺ ហើយគាត់ក៏ព្រមប្រគល់ប្លង់ដីឱ្យប្ដី ។ បង់ការប្រាក់បានតែបីខែ ប្ដីគាត់ក៏សុំបងស្រីទៅរកការងារធ្វើនៅព្រំដែនកម្ពុជាថៃដើម្បីរកលុយបំរុងទុកសំរាលកូន និងលស់ប្លង់ដីយកមកវិញ ។
បងស្រីក៏បានអនុញ្ញាតិឱ្យប្ដីទៅ ដើម្បីដោះស្រាយគ្រួសារដែលកំពុងតែជួបនូវផលវិបាក ។ លោកប្ដីក៏បានយកកូនប្រុសច្បងម្នាក់ទៅជាមួយផងដែរ ។ តាំងពីពេលនោះមកក៏បាត់ដំណឹងប្ដីនិងកូនសូន្យឈឹង ។ ក្រោយសំរាលកូនបានមួយខែទើបបងស្រីដឹងថាប្ដីបងស្រីលួចលក់ដីអស់ ហើយរត់ចោលបងស្រីបាត់ទៅហើយ ដោយសារតែម្ចាស់អ្នកទិញដីយកឯកសារលក់ដីមកបង្ហាញបងស្រី ថែមទាំងឱ្យអ្នកស្រីរុះរើផ្ទះនិងប្រគល់ដីឱ្យគេ ។
គ្មានមធ្យោបាយអ្វីក្រៅពីនេះ បងស្រីក៏សំរេចចិត្ដលក់ផ្ទះយកលុយដើម្បីតាមរកប្ដីនិងកូន ។ មុនពេលមុនចេញដំណើរ បងស្រីបានឱ្យកូនប្រុសទី២ទៅគ្រួសារមួយនៅឃុំពន្លៃ ស្រុកបរិបូរណ៍ ខេត្ដកំពង់ឆ្នាំង សល់តែកូនស្រីពៅអាយុមួយខែកន្លះប៉ុណ្ណោះដែលត្រូវធ្វើដំណើរទៅជាមួយម្ដាយ ។ ដើរស៊ើបដំណឹងពីប្ដីបណ្ដើររកស៊ីលក់ដូរកំប៉ិចកំប៉ុកផង អស់រយៈពេលបួនឆ្នាំ គ្មានបានទទួលដំណឹងអ្វីបន្ដិចសោះឡើយ ។ ក្រោយមកបងស្រីក៏ធ្វើដំណើរទៅផ្ទះប្អូនស្រីបង្កើតនៅភូមិជ័យឧត្ដម ឃុំសំរោងធំ ស្រុកកៀនស្វាយ ។
ហុត ពត បញ្ជាក់ថា កាលណោះប្រហែលឆ្នាំ២០០៣ បងនិងក្មួយស្រីអាយុប្រហែល៥ឆ្នាំបានមកដល់ផ្ទះបងស្រី ។ ដោយអស់ទីពឹងផងនោះ បងស្រី ហុត សាម៉េត ក៏បានស្នាក់នៅជាមួយប្អូន ។ ពេលនោះបងស្រីត្រូវរកស៊ីចិញ្ចឹមជីវិតដោយដើរបេះត្រកួន ដកព្រលឹត និងរកត្រីលក់បន្ដិចបន្ដួចសំរាប់ដោះស្រាយបញ្ហាក្រពះ ។ ជីវិតចុងក្រោយបងស្រី ហុត សាម៉េត បានស្លាប់ដោយសារលង់ទឹកព្រែកតាកែវនៅពេលគាត់ចុះទៅងូតទឹកនៅពេលយប់ម៉ោងប្រហែល២០.១៥នាទី ថ្ងៃទី២០.១១.២០១១ ។ បើតាមការសន្និដ្នានរបស់សមត្ថកិច្ចស្រុកថាប្រហែលជាគាត់រអិលជើងហើយគ្មានអ្នកណាបានឃើញ ។
លុះភ្លឺស្រាងៗទើបគេប្រទះឃើញស្បែកជើងនិងអាវ ក្នុងហោប៉ៅមានលុយ២៤០០រៀល នៅកន្លែងកំពង់ទឹក ទើបបងប្អូនដឹងថា បងស្រី សា ម៉េត ហៅ ប៉ុក ពិតជាធ្លាក់ទឹកព្រែក ហើយក៏ទៅផ្ដល់ដំណឹងទៅសមត្ថកិច្ចនគរបាលនិងកងរាជអាវុធហត្ថដែលប្រចាំការនៅឃុំសំរោងធំ ។ បងប្អូនញាតិមិត្ដជិតខាងនាំគ្នាស្រង់សពយកមកខ្ទមរបស់គាត់ដើម្បីធ្វើបុណ្យតាមប្រពៃណី ។ មានកូនស្រីតែម្នាក់គត់ដែលនៅរស់ឈ្មោះ ផូ សុភី អាយុ១៣ឆ្នាំត្រូវបន្ដការតស៊ូយ៉ាងកណ្ដោចកណ្ដែងក្នុងពិភពលោកដ៏អាប់អួរនេះ ដោយគ្មានអ្វីជាទីពឹងពំនាក់ឡើយ ។ កុមារី ផូ សុភី បានយំសោកបោកខ្លួនដោយរៀបរាប់ពីទុក្ខសោកអំពីជីវិតថា មួយជីវិតនេះខ្ញុំមិនដែលស្គាល់ឪពុកសូម្បីតែបន្ដិចក៏គ្មានដែរ រស់នៅតែជាមួយម្ដាយតែម្នាក់គត់ឥឡូវគាត់ស្លាប់ចោលខ្ញុំហើយ តើឱ្យខ្ញុំទីពឹងអ្នកណា? លោកអើយមេត្ដាជួយខ្ញុំផង ជួយធ្វើបុណ្យម្ដាយខ្ញុំផង ។ ក្ដីសោកសង្រេង និងភាពក្រីក្រទាំងអស់នេះ បានធ្វើឱ្យអ្នកបានឃើញហេតុការណ៍ខាងលើសឹងមិនអាចទប់ទឹកភ្នែកបានឡើយ ។ ដោយជ្រាបនូវហេតុការណ៍ខាងលើនេះលោកស្រី ប៊ុត វណ្ណា មេឃុំសំរោងបានឱ្យសហការីរបស់លោកស្រីយកជំនួយឧបត្ថម្ភមកជូនគ្រួសាររងគ្រោះមានអង្ករ២៥គីឡូ មី១កេសប្រាក់៥ម៉ឺនរៀល ។ ចំណែកឯចៅអធិការស្ដីទីវត្ដជ័យឧត្ដម ឧបត្ថម្ភអង្ករ៥០គីឡូ សម្ភារៈមួយចំនួន និងប្រាក់៥ម៉ឺនរៀល និងប្រជាសប្បុរសស្រីប្រុសជាច្រើនបាននាក់ចូលរួមឧបត្ថម្ភបានប្រាក់ជាង១លានរៀល ។
បងស្រី ហុត ពត ត្រូវជាប្អូនបង្កើតរបស់សពអ្នកស្រី ហុត សាម៉េត មានសេចក្ដីរំភើប និងបានថ្លែងអំណរគុណចំពោះអ្នកមានចិត្ដ សប្បុរសធម៌ដែលនៅជុំវិញខ្លួនជាពន្លឹក ៕
.jpg)
.jpg)
.jpg)
(1).jpg)