Khmer
English
Chinese
Frence
Vietnamese
Thai
ព្រះអង្គដងកើនៅតែជាទីគោរពបូជានិងបន់ស្រន់ដ៏ស័ក្តិសិទ្ធ
ដោយ ៖ កាំង សុធា ថ្ងៃទី 27 កុម្ភះ 2012ម៉ោង 16:00:11
ទោះបីជឿឬមិនជឿ ពលរដ្ឋខ្មែរស្ទើរគ្រប់រូបនៅតែត្រូវការឱ្យព្រះអង្គជួយ ។ ការចង់ឱ្យជួយនេះបានធ្វើឱ្យមនុស្សគ្រប់ស្រទាប់តែងមានវត្ដមាននៅពីមុខអសនរបស់ព្រះអង្គមិនដែលអាក់ខានឡើយ ។
ព្រះអង្គដងកើ ដែលមានទីតាំងទល់មុខព្រះបរមរាជវាំង តែងតែញាំងមនុស្សគ្រប់វណ្ណៈក្នុងសង្គមទៅពឹងពរកព្រះអង្គ ដូចយ៉ាងកាលពេលថ្មីៗនេះមានមនុស្សទាំងក្រុមទៅរកព្រះអង្គ ។
លោក វន ពៅ ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធបានថ្លែងថា ក្រុមលោកមកទីនេះគឺដើម្បីបួងសួងដល់វត្ថុស័ក្កិសិទ្ធិនៃព្រះអង្គដងកើ ដើម្បីឱ្យជួយជំរុញដល់ថ្នាក់ដឹកនាំគ្រប់ស្ថាប័នទាំងអស់ឱ្យជួយទប់ស្កាត់ដល់បណ្ដាក្រុមហ៊ុនជាច្រើន ដែលបាននឹងកំពុងធ្វើសកម្មភាពឈួសឆាយយ៉ាងពេញទំហឹង ដីសហគមព្រៃឡង់ដែលហ៊ុមព័ទ្ធដោយខេត្ដបួននៃប្រទេសកម្ពុជានោះ ។ ពួកគេគិតថា ព្រៃឡង់គឺជាព្រៃដែលសំបូរណ៍និងពោរពេញទៅដោយរុក្ខជាតិដែលជួយផ្គត់ផ្គង់ដល់បរិស្ថានខ្មែរយ៉ាងសំខាន់មិនអាចកាត់ផ្ដាច់បានឡើយ ។ មិនតែប៉ុណ្ណោះ ព្រៃឡង់នេះមានអាយុកាលរាប់រយឆ្នាំមកហើយជាព្រៃដែលធំជាងគេលំដាប់ទីពីរនៅអាស៊ីទៀតផង ។ ប្រសិនបើកាប់បំផ្លាញវាជាបន្ដទៀតនោះ វានឹងធ្វើឱ្យប្រទេសកម្ពុជាទទួលហានីភ័យយ៉ាងខ្លាំងពីការប្រែប្រួលនៃអាកាសធាតុ ។
លោកបានបន់ស្រន់ចំពោះព្រះអង្គថា សូមឱ្យបារមីព្រះអង្គដងកើ ជូយថែរក្សាព្រៃឡង់ជាព្រៃមរតកខ្មែរឱ្យបានគង់វង្សជាយូរអង្វែង សូមព្រះអង្គជួយដល់ព្រៃឡង់ ពីព្រោះព្រៃនេះសម្រាប់កម្ពុជាជាព្រៃដែលមានសារសំខាន់ជួយការពារបរិស្ថានធម្មជាតិ ។
ជាមួយគ្នានេះដែរ អ្នកភូមិបឹងកក់ក៏បានបន់ព្រះអង្គដងកើឱ្យជួយការពារផ្ទះសម្បែងរបស់គាត់ដែរ ក្នុងខណៈពួកអ្នកភូមិគ្មានជម្រើសណាផ្សេងទៀតនោះ ។
"សូមព្រះអង្គជួយ សូមឱ្យអ្នកពាក់ព័ន្ធនឹងអំពើអាក្រក់ កេងប្រវ័ញ្ចសូមឱ្យតែរលាយៗ ហើយសូមឱ្យកូនចៅមានសេចក្ដីសុខ។ ប្រសិនព្រះអង្គជាវត្ថុស័ក្ដិសិទ្ធិពិតមែនសូមឱ្យអ្នកមានពាក់ព័ន្ធនឹងគំនិតអាក្រក់ទាំងប៉ុន្មានសូមឱ្យរលាយ" ។
បារមីព្រះអង្គដងកើ បានជះឥទ្ធិពលលើប្រជាជនដែលរស់នៅក្នុងប្រទេសកម្ពុជា ជាពិសេសអ្នកមានជំនឿលើព្រះពុទ្ធសាសនា ។ ការបន់ស្រន់សូមសេចក្ដីសុខបំបាត់នូវទុក្ខកង្វល់ បានធ្វើឱ្យទីសំណាក់របស់ព្រះអង្គដែលមានទីតាំងស្ថិតនៅមហាវិថីព្រះស៊ីសុវត្ថិ ខាងកើតព្រះបរមរាជវាំង ដែលតែងតែពោរពេញទៅដោយផ្សែងធូប និងភាពអ៊ូរអរនៅរសៀលថ្ងៃសីលក៏ដូចជាថ្ងៃធម្មតាដែរ។
លោក សុខ សឿន អ្នកថែទាំព្រះអង្គដងកើបានមានប្រសាសន៍ថា ប្រទេសខ្មែរយើងជាទឹកដីមួយដែលបង្កប់នូវរឿងអាថ៌កំបាំងយ៉ាងច្រើន ហើយតាមមតិរបស់លោកយល់ថាជាអង្គម្ចាស់ទឹកដីនគរគោកធ្លក ហើយព្រះអង្គមកគង់នៅទីនេះដើម្បីសម្លឹងមើលព្រះពុទ្ធមួយអង្គដែលអណ្ដែតពីនគរលង្កាបូរី មកលិចនៅទីនេះ ព្រមជាមួយនឹងក្រពើសមួយគូផង ។ ដូច្នេះបានជានៅពេលប្រណាំងទូកម្ដងៗ ពេលដែលទូកអុំពីលើព្រះអង្គត្រូវបារមីក្រពើធ្វើឱ្យលិចទូកស្លាប់ជារៀងរាល់ឆ្នាំ ។
លោក សុខ សឿន បន្ដទៀតថា ចំពោះដីដុះមុខវាំងពីរកន្លែងនោះ គឺជាសំពៅរបស់ស្ដេចមួយអង្គធ្វើដំណើរទៅអង្គរបូរីត្រូវលិចនៅទីនេះ ។ ដីទាំងពីរកន្លែងនេះ មិនមែនធ្វើឱ្យស្ទះផ្លូវទឹកនោះទេ កាលណាបើផុសចេញមកលើដូចជាកោះ ហើយគឺជាប្រផ្នូលថា នគរគោកធ្លកជិតនឹងដល់ទីបព្ចាប់ ។ ហើយនគរនឹងកើតហេតុការណ៍គ្រប់យ៉ាង ។ នៅប៉ុន្មានឆ្នាំកន្លងមក មានការកសាងជាប្រាសាទមួយដើម្បីឧទ្ទិសបន់ស្រន់នៅលើដីដែលផុសឡើង តែត្រូវគេកម្ទេចចោល ។ ដូច្នេះរឿងរ៉ាវកាន់តែពិបាកឡើងៗក្នុងនគរយើងនេះ ។ ក្រោយមកមានជាទឹកគួចទៅលើទីនោះដែលជាប្រផ្នូលឱ្យខ្មែរយើងដឹង ។ ហើយបើគិតថាដីដែលផុសមកកកស្ទះផ្លូវទឹក បើចង់បូមយកកោះនោះចេញសាកមើលទៅដឹងហើយ ។
គួររំលឹកថា ព្រះអង្គដងកើនេះ ត្រូវបានបំផ្លាញម្ដងរួចមកហើយក្នុងជំនាន់ប៉ុលពត ពីឆ្នាំ ១៩៧៨-១៩៧៩ ។ តែដោយសារបុព្វហេតុនៃជំនឿរបស់ប្រជាជន គណៈកម្មការកសាងមួយក៏ត្រូវបានបង្កើតឡើង ហើយចាប់ដំណើរការសាងសង់ពីថ្ងៃទី១៥ ខែមីនា ឆ្នាំ១៩៩១ ហើយកសាងស្រេចជាស្ថាពរ និងប្រារឰពិធីសម្ពោធបើកឱ្យប្រើប្រាស់ជាផ្លូវការនៅថ្ងៃទី២០ ខែវិច្ឆិកា ឆ្នាំ ១៩៩១។
លោកអ៊ំ ហាក់ ស៊ុន អ្នកទៅបន់ស្រន់ម្នាក់បានមានប្រសាសន៍ថា ថ្ងៃសីលមានប្រជាជនច្រើនណាស់រហូតដល់រាប់ពាន់នាក់មកទីនេះ ពីព្រោះគេមានជំនឿលើស្នាដៃរបស់ព្រះអង្គដែលតែងតែជួយថែរក្សាកូនចៅរហូតមក ។ លោកអ៊ំមានប្រសាសន៍បន្ដថា “ខ្ញុំជឿជាក់លើការបន់ស្រន់ ព្រោះប៉ុន្មានថ្ងៃមុនមានជំងឺស្រីម្នាក់ក្រោយពីការបន់ស្រន់បានប៉ុន្មានថ្ងៃ គាត់ក៏បានយករបស់របរជាសំណែនដូចជា ដូង ផ្កា ទានធូប មកថ្វាយ ហើយបានប្រាប់ថា កូនគាត់បានជាសះស្បើយហើយ” ។
ឯលោក ប្រាក់ និមល សន្ដិសុខប្រចាំអាស្រមបានលើកឡើងថា “ខ្ញុំពិបាកណាស់នៅរៀងរាល់ថ្ងៃសីល ពីព្រោះថ្ងៃសីលខ្លះមានភ្ញៀវទេសចរច្រើន ។ អ្វីដែលគួរឱ្យបារម្ភគឺក្មេងសុំទានដែលតែងបង្កភាពរញ៉េរញ៉ៃ” ។
លោក ហេង សំអាត ជាអ្នកលក់ចាបបានមានប្រសាសន៍ថា ប្រជាជនទិញចាបលែងព្រោះពួកគេយកចាបជានិមិត្ដរូប ពួកគេសូមឱ្យទុក្ខលំបាកទាំងប៉ុន្មានរសាត់បាត់ចេញពីចិត្ដរបស់គេ ដូចចាបដែលហោះចេញពីទ្រុងអឹងចឹងដែរ ។ ខ្លះក៏សូមឱ្យចាបនោះហោះទៅទាំងគូដោយមិនចែកផ្លូវគ្នា ដែលពួកគេតំណាងថា គូជីវិតរបស់ពួកគេមានវាសនាល្អដូចសត្វចាបដែរ ។
លោកអ៊ំ ហាក់ ស៊ុន អ្នកថែរក្សាប្រចាំនៅអាស្រមព្រះអង្គដងកើ បានមានប្រសាសន៍ថា បារមីរបស់ព្រះអង្គបានជួយដឹកនាំចិត្ដប្រជាជនឱ្យនឹកឃើញ និងចង់ធ្វើអ្វីដែលល្អដែលស្របទៅនឹងឃ្លារបស់ព្រះពុទ្ធថា “ធ្វើល្អបានល្អ” យើងប្រព្រឹត្ដអំពើអ្វី យើងនឹងទទួលផលនោះដែរ ៕
