Khmer
English
Chinese
Frence
Vietnamese
Thaiភាពយន្តរឿងនាងណាតជា3Dចាក់បញ្ចាំងនៅរោងភាពយន្តThe Cineplex
ដោយ ៖ វឌ្ឍនា|ថ្ងៃទី 03 មីនា 2012 ម៉ោង 08:21:21
ភ្នំពេញ៖ បន្ទាប់ពីទទួលបានជោគជ័យលើការចាក់បញ្ចាំងខ្សែភាពយន្តខ្មែរ និងភាពយន្តហូលីវូដជាបន្តបន្ទាប់នោះ រោងភាពយន្ត The Cineplex នៅផ្សារទំនើបសូរិយាជាន់ទី៥បានសម្រេចចិត្តជ្រើសរើសយកខ្សែភាពយន្តរឿងនាងណាតខ្នាតធំប្រភេទ3Dមកចាក់បញ្ចាំងចាប់តាំងពីថ្ងៃទីនេះតទៅ។ “នាងណាត” គឺជាខ្សែភាពយន្តរៀបរាប់អំពីជីវិតរបស់ស្ត្រីម្នាក់ដែលបានស្លាប់ទាំងកូននៅក្នុងផ្ទៃអំឡុងពេលដែលប្តីរបស់នាងបានចេញទៅធ្វើការនៅទីក្រុង។ ពេលដែលប្តីនាងត្រឡប់មកវិញ គាត់បានរស់នៅជាមួយនាងទាំងមិនបានដឹងថានាងបានស្លាប់បាត់ទៅហើយនោះទេ។
លោក Arunsak Ongla Or ទីប្រឹក្សាក្រុមហ៊ុន CABNET ASEANS CO.,LTDប្រាប់ថារឿងនិទាននេះបាននិយាយតគ្នាពីមាត់មួយទៅមាត់មួយ ពីជំនាន់មួយទៅជំនាន់មួយរហូតដល់មានការថតជាខ្សែភាពយន្តជាច្រើនលើកច្រើនសារ ប៉ុន្តែម្តងនេះរឿងនាងណាតបានយកមកថតសារជាថ្មីម្តងទៀត និងជាលើកចុងក្រោយបង្អស់ ដោយមានការកែលម្អ មានភាពឥតខ្ចោះទាំងសាច់រឿង ការសម្តែង សំឡេងជាលក្ខណៈ Surround Sound រត់ពីឆ្វេងទៅស្តាំ និងពីមុខទៅក្រោយ។ លោកបន្តទៀតថាការសម្រេចចិត្តយកខ្សែភាពយន្តរឿងនាងណាតយកមកដាក់បញ្ចាំ្ងងនៅកម្ពុជាគឺដំណាលគ្នានឹងការដាក់បញ្ចាំងនៅបណ្តាប្រទេសក្នុងតំបន់អាស៊ានមួយចំនួនដែរដូចជាប្រទេស ថៃ និងសិង្ហបុរី។
ក្រៅពីនេះខ្សែភាពយន្តប្រភេទ3Dចុងក្រោយបង្អស់នេះក៏បាននឹងកំពុងដាក់បញ្ចាំងនៅរោងភាពយន្តជាច្រើននៅប្រទេស ឥណ្ឌូនេស៊ី ម៉ាឡេស៊ី ឥណ្ឌា ឡាវ វៀតណាម តៃវ៉ាន់ ហុងកុងជាដើម។ លោកប្រាបដែរថាខ្សែភាពយន្តរឿងនាងណាតនេះផលិតដោយផលិតកម្ម Bangkok Inter Group ដោយមានការចូលរួមសម្តែងដោយតារាសម្តែងថៃល្បីៗប្រមាណ១០នាក់ ចំណាយពេលវេលាថតរយៈពេល១ឆ្នាំហើយចំណាយទុនផលិតប្រមាណ១លានដុល្លារសហរដ្ឋអាមេរិក។ លោករំពឹងថាកាដាក់បញ្ចាំខ្សែភាពយន្តនេះនឹងទទួលបានជោគជ័យខ្ពស់។
លោកជា វណ្ណៈប្រធានផ្នែកទីផ្សារនៃរោងភាពយន្ត The Cineplex បានឲ្យដឹងដែរថា ការសម្រេចចិត្តជ្រើសរើសយកខ្សែភាពយន្តខ្មោចលើកដំបូងមកដាក់បញ្ចាំងនៅរោងភាពយន្តនេះព្រោះកន្លងមករោងភាពយន្តទទួលបានជោគជ័យក្នុងការដាក់បញ្ចាំងខ្សែភាពយន្តខ្មែរ៣រឿងរូមមកហើយដូចជារឿង “ឃ្លាតទៅសែនឆ្ងាយ” “កុមារីអាយុ២៥ឆ្នាំ” និងរឿង “ស្នេហ៍គ្រាដំបូង” រួមទាំងខ្សែភាពយន្តហូលីវូដជាច្រើនទៀត។ អ្វីដែលជាចំណុចពិសេសដែរនោះគឺដោយសារខ្សែភាពយន្តនេះផលិតនៅតំបន់អាស៊ី ផលិតជាប្រភេទ 3D បញ្ចួលសំឡេងជាភាសាខ្មែរ មានគុណភាពខ្ពស់ និងងាយយល់សម្រាប់អ្នកទស្សនាគ្រប់វ័យ។
លោក Arunsak Ongla Or ប្រាប់ដែរថាលោកក៏មានបំណងនាំយកខ្សែភាពយន្តខ្មែររឿង”ឃ្លាតទៅសែនឆ្ងាយ” របស់ផលិតកម្មដើមត្នោតទៅចាក់បញ្ចាំងនៅរោងភាពយន្តនានានៅប្រទេសថៃផងដែរ។ លោកប្រាប់ថាវាគឺជាការសហប្រតិបត្តិការផ្លាស់ប្តូគ្នាទៅវិញទៅមក ហើយបើគម្រោងនេះទទួលបានជោគជ័យខ្សែភាពយន្តនេះនឹងដាក់បញ្ចាំងនៅរោងកុនរាប់រយរោងនៅទីក្រុមបាងកក និងរោងភាពយន្តជាច្រើនទៀតនៅប្រទេសថៃដែលវាក៏នឹងផ្តល់ទាំងបទពិសោធន៍ និងប្រាក់ចំណូលជាច្រើនដល់ផលិតករ៕
