Khmer
English
Chinese
Frence
Vietnamese
Thaiមហោស្រពតន្ត្រីចម្រៀងសម័យថ្នាក់ជាតិឆ្នាំ២០១១ ទទួលបានបទភ្លេងនិងទំនុកច្រៀងថ្មី១១២បទ
ដោយ ៖ សាគុណ|ថ្ងៃទី 07 មីនា 2012 ម៉ោង 17:09:31
ភ្នំពេញ៖ លោក ខៀវ កញារីទ្ធ រដ្ឋមន្ត្រីក្រសួងព័ត៌មាន បានថ្លែងថា មហោស្រពតន្ត្រីចម្រៀង សម័យថ្នាក់ជាតិឆ្នាំ២០១១ បានប្រព្រឹត្តទៅដោយរលូននិងបានបញ្ចប់ទៅដោយជោគជ័យ ក្នុងនោះយើងក៏ទទួលបាននូវបទភ្លេងនិងទំនុកច្រៀងថ្មី ដែលជាស្នាដៃពិតពីសិល្បករ តន្ត្រី ករ កវីនិពន្ធរបស់យើង សរុបទាំងអស់ចំនួន១១២បទ ហើយយើងក៏រកឃើញនូវ ក្រុមតន្ត្រី អ្នកនិពន្ធបទភ្លេង ទំនុកច្រៀង ដែលមានទេពកោសល្យ ទទួលបានចំណាត់ថ្នាក់ជាតន្ត្រី ឆ្នើមឆ្នាំ២០១១នេះផងដែរ ។
លោករដ្ឋមន្ត្រីបានថ្លែងយ៉ាងនេះ នៅក្នុងពិធីបិទមហោស្រពតន្ត្រីចម្រៀងសម័យ ថ្នាក់ជាតិប្រចាំឆ្នាំ២០១១ និងប្រគល់ពានរង្វាន់ជ័យលាភីដល់ក្រុមតន្ត្រីជាប់ចំណាត់ថ្នាក់ ដែលប្រារព្ធធ្វើនៅព្រឹកថ្ងៃទី០៧ មីនា ២០១២ នៅសាលសន្និសីទចតុមុខ ក្រោមអធិបតីភាព លោកស្រីឧបនាយករដ្ឋមន្ត្រីប្រចាំការ ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធ សភា និងអធិការកិច្ច ។
លោករដ្ឋមន្ត្រី ខៀវ កាញារីទ្ធ បានថ្លៃងបន្តទៀតថា មហោស្រពតន្ត្រីចម្រៀងសម័យ ថ្នាក់ជាតិនេះ ត្រូវបានផ្សព្វផ្សាយជាសាធារណៈ តាមរយៈការធ្វើសន្និសីទសារព័ត៌មាន ប្រ កាសបើក មហោស្រពចម្រៀងសម័យថ្នាក់ជាតិប្រចាំឆ្នាំ២០១១នៅថ្ងៃទី២៤ ខែមិថុនា ឆ្នាំ ២០១១ នៅទីស្តីការក្រសួងព័ត៌មាន ដោយមានការចាប់អារម្មណ៍ និងចូលរួមពីសំណាក់អ្នក សារព័ត៌មាន ព្រមទាំងបណ្តាប្រព័ន្ធផ្សេព្វផ្សាយជាច្រើនរូបទៀត ។ នៅថ្ងៃទី០៧ ខែកញ្ញា ឆ្នាំ២០១១ យើងក៏បានប្រារព្ធពិធីបើកមហោស្រពនេះឡើង នៅសាលសន្និសីទចតុមុខ ដោយមានវត្តមានថ្នាក់ដឹកនាំ មន្ត្រីរាជការ សិល្បករ សិល្បការិនី កវីនិពន្ធ សិស្ស និស្សិត ព្រមទាំងភ្ញៀវជាតិ អន្តរជាតិ ចូលរួមយ៉ាងច្រើនកុះករ ហើយក្នុងនោះយើងក៏បានបង្ហាញ សមាសភាពក្រុមតន្ត្រី អ្នកនិពន្ធ បទភ្លេងដែលមកពីបណ្តាលខេត្ត-ក្រុង និងរាជធានី សរុប ចំនួន២៨ក្រុមផងដែរ ។ ជាមួយគ្នានោះដែរ យើងក៏បានទទួលនូវសារគាំទ្រដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចូលរួមអបអរសាទរពិធីបើកមហោស្រព តន្ត្រីចម្រៀងសម័យថ្នាក់ជាតិនេះផងដែរ ។
លោករដ្ឋមន្ត្រី ខៀវ កាញារីទ្ធ បានបញ្ជាក់ថា មហោស្រពតន្ត្រីចម្រៀងសម័យនេះ បានរៀបចំឡើងក្រោមការផ្តួចផ្តើមរបស់ក្រសួងព័ត៌មាន សហការរវាងក្រសួងវប្បធម៌ និងវិ ចិត្រសិល្បៈ និងក្រសួងទេសចរណ៍ ចាប់ពីថ្ងៃទី២៤ ខែមិថុនា រហូតដល់ថ្ងៃទី៣១ ខែធ្នូ ឆ្នាំ ២០១១ ហើយរាល់ការចំណាយទាំងអស់សម្រាប់ដំណើរការមហោស្រពនេះ យើងពុំបាន ប្រើប្រាស់ថវិកាជាតិឡើយ ។ លោករដ្ឋមន្ត្រីបានបញ្ជាក់ទៀតថា រាល់ការចំណាយទាំងអស់ គឺបានពីការជួយឧបត្ថម្ភ របស់សប្បុរសជន និងថវិកាផ្ទាល់ខ្លូនដ៏ស្តួចស្តើងរបស់លោករដ្ឋ មន្ត្រីនិងភរិយា មួយចំណែក ព្រមទាំងថវិកាបន្តិចបន្តួចដែលបានមកពីការផ្សាយពាណិជ្ជ កម្មផងដែរ ។
នៅក្នុងឱកាសនោះលោកស្រីឧបនាយករដ្ឋមន្ត្រីប្រចាំការ ម៉ែន សំអន បានលើក ឡើងនូវបញ្ហាប្រឈមគួរឲ្យបារម្ភដែលយើងគ្រប់គ្នាត្រូវរួមគ្នាដោះស្រាយ ហើយក៏ពុំគួរភ្លេច ខ្លួនបណ្តោយឲ្យ វិស័យសិល្បៈតន្ត្រីចម្រៀងសម័យនេះ ធ្លាក់ចុះរហូតដល់កែមិនរួចឡើយ។
លោកស្រីឧបនាយករដ្ឋមន្ត្រីបានបញ្ជាក់ថា បញ្ហាប្រឈមទាំងអស់នោះរួមមានៈ កង្វះការ បង្កើតថ្មី និងកង្វះការច្នៃប្រឌិត (គ្មានការបង្កើតស្នាដៃថ្មីៗ និងភាពច្នៃប្រឌិតរស់រវើកនៃបទ ចម្រៀង ឬមេឡូឌី និងទំនុកច្រៀង), ការភ្លេចខ្លួនមិនបានគិតដល់ចំណាប់ចុងជួន និងខ្លឹម សារនៃចម្រៀង, ការលួចចម្លងរចនាបទ សាច់ភ្លេង និងខ្លឹមសារទាំងស្រុងពីបរទេស, កង្វះ ការគាំទ្រពីទស្សនិកជន ឬអ្នកស្តាប់ និងភាពទន់ខ្សោយក្នុងការអនុវត្តច្បាប់ស្តីពីកម្មសិទ្ធិ បញ្ញាជាដើម ។ ដើម្បីពញ្ញាក់ស្មារតី និងជម្រុញលើកទឹកចិត្តដល់ កវីនិពន្ធ តន្ត្រីករ សិល្បករ សិល្បការិនី ឲ្យខិតខំបន្តនូវវប្បធម៌ អរិយធម៌ និងអត្តសញ្ញាណជាតិយើងបានថ្កុំថ្កើងរុងរឿង បន្ថែមទៀតនោះ លោកស្រីឧបនាយករដ្ឋមន្ត្រី បានផ្តល់អនុសាសន៍មួយចំនួន រួមមានៈ សូមឲ្យក្រសួងវប្បធម៌និងវិចិត្រសិល្បៈ ដែលជាមជ្ឈមណ្ឌលបណ្តុះបណ្តាលធនធានមនុ ស្សក្នុងវិស័យវប្បធម៌ សហការជាមួយស្ថាប័នពាក់ព័ន្ធនានា បន្តជម្រុញការងារផលិត និង បង្កើតនូវគំនិតថ្មីៗក្នុងវិស័យសិល្បៈ វប្បធម៌បន្ថែមទៀត, សូមឲ្យវិស័យឯកជនចូលរួមសហ ការបង្កើតសាលាតូរ្យតន្ត្រី ឬក្រុមតន្ត្រី ដើម្បីបង្កលក្ខណៈដល់ក្មេងៗជំនាន់ក្រោយ, សូមឲ្យ ក្រសួងព័ត៌មាន ដែលមានប្រព័ន្ធផ្សព្វផ្សាយជាឧបករណ៍ដ៏មានប្រសិទ្ធភាព និងជាអាវុធដ៏ មុតស្រួច បង្កើនការផលិតនូវកម្មវិធីថ្មីៗ ល្អៗ ដើម្បីជាការទាក់ទាញ និងលើកកម្ពស់ការ យល់ដឹងរបស់ប្រជាពលរដ្ឋយើង, ក្រសួង ស្ថាប័នមានសមត្ថកិច្ចពាក់ព័ន្ធទាំងអស់ ត្រូវបន្ត ពង្រឹងការអនុវត្តច្បាប់ និងបទបញ្ញតិជាធរមាន ជាពិសេសការអនុវត្តច្បាប់កម្មសិទ្ធិបញ្ញា, សូមឲ្យក្រុមហ៊ុន សហគ្រាសឯកជនទាំងអស់ ដែលកំពុងធ្វើធុរៈកិច្ចលើវិស័យ វប្បធម៌ តូរ្យ តន្ត្រី ត្រូវចូលរួមទាំងអស់គ្នា ក្នុងភាពជាដៃគូរជាមួយរាជរដ្ឋាភិបាល ដើម្បីជម្រុញការអនុវត្ត ច្បាប់ និងកាត់បន្ថយជាបណ្តើរៗក្នុងការចម្លងបទភ្លេងទាំងស្រុងពីបរទេសដោយខុសច្បាប់ នោះ, អ្នកកវីនិពន្ធ តន្ត្រីករ អ្នកចម្រៀង ត្រូវខិតខំប្រឹងប្រែង ដុសខាត់សមត្ថភាពរបស់ខ្លួន ប្រកបដោយសីលធម៌ វិជ្ជាជីវៈ និងមនសិការជាតិខ្ពស់ ដើម្បីចូលរួមកសាង សេដ្ឋកិច្ច សង្គម វប្បធម៌ជាតិយើងទាំងមូល ។
លោកស្រីឧបនាយករដ្ឋមន្ត្រីក៏បានសម្តែងនូវការគាំទ្រយ៉ាងពេញទំហឹង ចំពោះលទ្ធ ផលនៃមហោស្រពតន្ត្រីចម្រៀងសម័យថ្នាក់ជាតិ ដ៏គួរឲ្យមានមោទនភាពនេះ ដើម្បីបន្ត ពង្រឹងកេរ្តិ៍ដំណែលពីបុរាណដែលកាត់ថ្លៃពុំបាននៃវិស័យវប្បធម៌ និងអារ្យធម៌ ជាពិសេស វិស័យសិល្បៈតូរ្យតន្ត្រីរបស់ខ្មែរឲ្យកាន់តែសម្បូណ៍បែបថែមទៀត ។
ចំពោះលទ្ធផលមហោស្រពតន្ត្រីចម្រៀងសម័យថ្នាក់ជាតិប្រចាំឆ្នាំ២០១១នេះ ចំណាត់ថ្នាក់លេខ១ បានទៅលើក្រុមTragon មកពីខេត្តកំពត ទទួលបានពានរង្វាន់ជ័យ លាភីលេខ១ ប្រាក់ចំនួន៣ពាន់ដុល្លារអាមេរិក និងឧបករណ៍បំពងសម្លេង១គ្រឿង ចំណាត់ ថ្នាក់លេខ២ បានទៅលើក្រុមតន្ត្រី ស្នាមញញឹម មកពីរាជធានីភ្នំពេញ ទទួលបានពានរង្វាន់ ជ័យលាភីលេខ២ ប្រាក់ចំនួន២ពាន់ដុល្លារអាមេរិក និងឧបករណ៍បំពងសម្លេង១គ្រឿង និងចំណាត់ថ្នាក់លេខ៣ស្ទួន ដែលមានពីរក្រុមនោះគឺ ក្រុមតន្ត្រី CT មកពីខេត្តព្រះសីហនុ និង ក្រុមតន្ត្រីប៉ៃតង មកពីរាជធានីភ្នំពេញ ទទួលបានពានរង្វាន់ជ័យលាភីលេខ៣ ប្រាក់ចំនួន ១ពាន់ដុលា្លរអាមេរិក និងឧបករណ៍បំពងសម្លេង១គ្រឿង ក្នុង១ក្រុមៗ ៕
