Khmer
English
Chinese
Frence
Vietnamese
Thaiវិចារណកថា៖ កុំយកទិវាពលកម្មអន្តរជាតិ ១ ឧសភា បំផ្លាញបរិយាកាសវិនិយោគនៅកម្ពុជា
ដោយ ៖ រួម រក្សា|ថ្ងៃទី 28 មេសា 2012 ម៉ោង 13:01:51
១ ឧសភា គឺជាទិវាពលកម្មអន្តរជាតិ ជាថៃ្ងប្រវត្តិសាស្ត្ររំលឹកឡើងវិញនូវព្រឹត្តការណ៍នៃចលនាពលករនៅ លើពិភពលោកដែលបានទាមទារនូវសិទ្ឋិសេរីភាព និងលក្ខខណ្ឌការងារសមរម្យ។ ប្រជាពលករនៅពិភពលោកត្រូវបានទទួលនូវសិទ្ឋិឈប់សំរាកពីការងារដោយមាន ប្រាក់ឈ្នួល ដើម្បីចូលរួមអបអរសាទរទិវាពលកម្មអន្តរជាតិនេះ ដោយបង្កើតនូវកម្មវិធីសប្បាយផ្សេងៗ។ ទិវានេះក៏ជាព្រឹត្តិការណ៍មួយដ៏សំខាន់ផងដែរ ដែលយើងទាំងអស់ត្រូវឧទ្ទិសចំពោះគោលបំណងរួមរបស់យើង ក្នុងការខិតខំបង្កើននូវជំនាញវិជ្ជាជីវៈ បង្កើនផលិតភាពការងារទាំងបរិមាណ និងគុណភាព ដើម្បីចូលរួមថែរក្សាឲ្យបាននូវសន្តិសុខ សុវត្ថិភាពការងារ និងការប្រកួតប្រជែង ។ ស្ថានភាពសេដ្ឋកិច្ចកម្ពុជាកំពុងតែមានការរីកចម្រើនគ្រប់វិស័យ ក្នុងនោះវិស័យឧស្សាហកម្មកាត់ដេរសំលៀកបំពាក់ និងស្បែកជើងកំពុងតែឈរនៅក្នុងលំដាប់ថ្នាក់ទីមួយ។
ដោយសារតែប្រទេសកម្ពុជាក្លាយទៅជាប្រទេសមានកេរ្តិ៍ឈ្មោះល្អជាងគេនៅ ក្នុងតំបន់ ក្នុងការអនុវត្តលក្ខខណ្ឌការងារល្អប្រសើរ បានផ្តល់ការទាក់ទាញពីអ្នកបញ្ជាទិញ និងអ្នកវិនិយោគទុនអន្តរជាតិមកបណ្តាក់ទុន ធ្វើឲ្យរោងចក្រកាត់ដេរសំលៀកបំពាក់ និងស្បែកជើងនៅបច្ចុប្បន្ននេះមានកំណើនរហូតដល់ជាង ៦០០រោងចក្រ ។ ការនាំចេញដែលមានតម្លៃប្រមាណ៤៣០០លានដុល្លារ នៅក្នុងឆ្នាំ២០១១ ។ បានស្រូបយកកម្លាំងពលកម្មប្រមាណ៤៥ម៉ឺននាក់ ដោយទទួលបានប្រាក់ខែជាមធ្យមរបស់កម្មករនិយោជិតចំនួនប្រមាណ៣០លាន ដុល្លារអាមេរិកក្នុងមួយខែៗ ព្រមទាំងបានជួយបង្កើន សេដ្ឋកិច្ចគ្រួសារដល់ប្រជាពលរដ្ឋជាងពីរលាននាក់ថែមទៀតតាមរយៈ មធ្យោបាយដឹកជញ្ជូន ជួលផ្ទះ លក់ម្ហូបអាហារ។ ទន្ទឹមនឹងនេះសិទ្ឋិសេរីភាពប្រជាពលរដ្ឋ សិទ្ឋិសេរីភាពការបង្កើតសមាគម និង សហជីពត្រូវបានអនុវត្តយ៉ាងទូលំទូលាយ ។
រាជរដ្ឋាភិបាលកម្ពុជាបានបង្កើតយន្តការជាច្រើន ដើម្បីត្រួតពិនិត្យការអនុវត្តន៍លក្ខខណ្ឌការងារ ឲ្យបានល្អប្រសើរដូចជា ក្រុមការងារទំនាក់ទំនងវិជ្ជាជីវៈ គណៈកម្មការប្រឹក្សាការងារ គណៈកម្មការ ដោះស្រាយកូដកម្មបាតុកម្មគ្រប់មុខសញ្ញា អន្តរគណៈកម្មការដោះស្រាយនិងទប់ស្កាត់កម្មករសន្លប់ ។ល។ មិនតែប៉ុណ្ណោះ រាជរដ្ឋាភិបាលបានសហការជាមួយអង្គការពលកម្មអន្តរជាតិ (ILO) បង្កើតនូវ យន្តការឯករាជ្យចំនួនពីរបន្ថែមទៀតគឺ ក្រុមប្រឹក្សាអាជ្ញាកណ្តាល (AC) និងគំរោងរោងចក្រកាន់តែល្អប្រសើរ (ILO-BFC) ដើម្បីធ្វើឲ្យវិស័យឧស្សាហកម្មកាត់ដេរនេះ មានកេរ្តិ៍ឈ្មោះកាន់តែល្អប្រសើរ តម្លាភាព និងទទួលបាននូវការគាំទ្រពីអ្នកបញ្ជាទិញ ។
ជាមួយនឹងការពង្រឹងនូវយន្តការអនុវត្តលក្ខខណ្ឌការងារនេះ រាជរដ្ឋាភិបាលកម្ពុជាបានយកចិត្តទុកដាក់ជាអទិភាពទៅលើជីវភាពរស់នៅ របស់កម្មករនិយោជិត និងបានផ្តួចផ្តើមតម្លើងនូវប្រាក់ឈ្នួល គោលនិងផលប្រយោជន៍ផ្សេងៗរបស់កម្មករនិយោជិតជាបន្តបន្ទាប់គឺៈ លើកទី១ តម្លើងពី៤០ទៅ៤៥ដុល្លារ លើកទី២ តម្លើងពី៤៥ទៅ៥០ដុល្លារ លើកទី៣ ផ្តល់ប្រាក់ទ្រទ្រង់ជីវភាពចំនួន៦ដុល្លារក្នុងមួយខែ លើកទី៤ តម្លើងពី៥៦ទី៦១ដុល្លារ លើកទី៥ ផ្តល់ប្រាក់ ឧបត្ថម្ភថែទាំសុខភាពចំនួន៥ដុល្លារ ព្រមទាំងមានប្រាក់បន្ទាប់បន្សំផ្សេងៗទៀតដូចជា ប្រាក់រង្វាន់ធ្វើការទៀងទាត់ចំនួន៧ដុល្លារ ប្រាក់អតីតភាពការងារ ចាប់ពី២ដុល្លារដល់១១ដុល្លារ ប្រាក់ថៃ្លបាយធ្វើការបន្ថែមពីរម៉ោងចំនួន២០០០រៀល។ បើយើង គណនាបូកបញ្ចូលគ្នារវាងប្រាក់ឈ្នួលគោល ប្រាក់បន្ទាប់បន្សំផ្សេងៗ និងធ្វើការបនែ្ថមម៉ោងរបស់កម្មករនិយោជិតជាមធ្យមក្នុងមួយខែចំនួន ពី៩៥ដុល្លារទៅ១៥០ដុល្លារអាមេរិក ។
យោងតាមកាសែត fibre2fashion បានផ្សាយឲ្យដឹងថា អ្នកវិនិយោគនៅប្រទេសប៉ាគីស្ថានបាន នឹងកំពុងតែរៀបចំផែនការផ្លាស់ប្តូរទីតាំងឧស្សាហកម្មកាត់ដេររបស់ ខ្លួនដោយសារពួកគេគិតថាបរិយាកាសវិនិយោគនៅទីនោះមិនមានអំណោយផលល្អ ហើយអ្នកវិនិយោគទាំងនោះបានជ្រើសរើសយកប្រទេសកម្ពុជាធ្វើជាគោលដៅ សំរាប់ផ្លាស់ប្តូរ ដោយសារពួកគេសម្លឹងឃើញប្រទេសកម្ពុជា ជាប្រទេសមានសក្តានុពល និងការទាក់ទាញសំរាប់ការវិនិយោគរបស់ពួកគេ។លោក ljaz khokhar ប្រធានសម្របសម្រួលអ្នកផលិតសំលៀកបំពាក់នៅប្រទេសប៉ាគីស្ថាន និង សមាគមអ្នកនាំចេញបានប្រាប់កាសែត fibre2fashion ថាៈ វិបត្តិថាមពល ជាពិសេសកង្វះអគ្គិសនី និងឧស្ម័ននៅប្រទេសប៉ាគីស្ថានគឺកំពុងបង្កឲ្យវិស័យនេះបាត់បង់នូវផលិតផល របស់ពួកគេជាង៥០ភាគរយ ជាហេតុចម្បងសំរាប់អ្នកផលិតក្នុងវិស័យនេះក្នុងការពិចារណាផ្លាស់ប្តូរ ទីតាំងរោងចក្ររបស់គេទៅបណ្តាប្រទេសផ្សេងទៀត ហើយអតិថិជនរបស់យើងរីករាយជាមួយនឹងការមិនយកពន្ឋដែលមានរួចរាល់ហើយ នៅប្រទេសកម្ពុជា ហើយរោងចក្រទាំងនោះនឹងផលិតស្បែកជើង សំលៀកបំពាក់សឹក សំលៀកបំពាក់ពេទ្យ និងសំលៀកបំពាក់កីឡាជាដើម ។ល។
នៅក្នុងស្ថានភាពដែលកម្ពុជាកំពុងមានការចាប់អារម្មណ៍ពីអ្នកវិនិយោគ បែបនេះ ប្រជាពលករកម្ពុជាត្រូវតែខិតខំអភិវឌ្ឍជំនាញរបស់ខ្លួនឲ្យកាន់តែល្អ ប្រសើរ ចូលរួមថែរក្សា ការពារសេ្ថរភាពនយោបាយ និងផ្តល់ជំនឿចិត្តដល់អ្នកវិនិយោគ ដើម្បីបង្កើតការងារបន្ថែមទៀត ។ នៅពេលមានការវិនិយោគច្រើន តម្រូវការពលកម្មខ្ពស់ ពេលនោះកម្មករនឹងទទួលបានប្រាក់ឈ្នួល និងអត្ថប្រយោជន៍ផ្សេងៗខ្ពស់ដោយស្វ័យប្រវត្តិពុំចាំបាច់ធ្វើការទាម ទារឡើយ ។ ប៉ុន្តែផ្ទុយទៅវិញប្រសិនសហជីពកម្មករធ្វើការទាមទារការតម្លើងប្រាក់ ឈ្នួលណាមួយ ដែលមិនស្រមតាមកាលៈទេសៈ វានឹងធ្វើឲ្យប៉ះពាល់ដល់អារម្មណ៍របស់អ្នកវិនិយោគទាំងអ្នកកំពុង តែវិនយោគ និង អ្នកដែលមានគំរោងនឹងមកវិនិយោគ ។
ដូច្នេះនៅក្នុងឱកាសទិវាពលកម្មអន្តរជាតិ ០១ ឧសភា ២០១២ នេះ សូមប្រជាពលករ ក៏ដូចកម្មករ និយោជិត សហជីពទាំងអស់ ចូលរួមគោរព និងអនុវត្តនូវសារាចរណ៍ណែនាំរបស់រាជរដ្ឋាភិបាល កម្ពុជាលេខៈ០៤.សរណន ចុះថៃ្ងទី១៧ ខែមេសា ឆ្នាំ២០១២ អំពាវនាវដល់មន្ត្រីរាជការគ្រប់ជាន់ថ្នាក់ កម្មករនិយោជិតកម្ពុជា ពលករបរទេសទាំងអស់ ចូលរួមប្រារព្ឋ និងអបអរសាទរទិវាពលកម្មអន្តរជាតិ ១ឧសភា ឆ្នាំ២០១២ ក្នុងក្តីសោមនស្សរីករាយ សាមគ្គីភាព និងភាតរភាព ដើម្បីឲ្យស័ក្តិសមជាបុណ្យការងាររបស់ប្រទេសជាតិយើង ។ ចៀសវាងដាច់ខាត នូវការប្រើប្រាស់រូបភាពទិវាពលកម្មអន្តរជាតិនេះ ដើម្បីធ្វើសកម្មភាពទាំងឡាយណា ដែលបណ្តាលឲ្យប៉ះពាល់ដល់សេដ្ឋកិច្ចសង្គម ៕
.jpg)
