Khmer
English
Chinese
Frence
Vietnamese
Thai
គយសៀមរាបចាប់ឡានស៊េរីទំនើប១គ្រឿងសង្ស័យអត់បង់ពន្ធនាំចូល
ដោយ ៖ ជា ស្រស់ ថ្ងៃទី 18 កក្កដា 2012ម៉ោង 14:26:40
ខេត្តសៀមរាប៖ រថយន្តតូយ៉ូតាកាមរីស៊េរីទំនើប១គ្រឿង ក្រោយពីពិនិត្យឃើញមានភាពមិនប្រក្រតី មន្ត្រីគយសាខាខេត្តសៀមរាបបាន ចាប់យកទៅរក្សាទុកនៅទីស្នាក់ការដើម្បីទុកឲ្យម្ចាស់ចូលខ្លួនទៅដោះស្រាយតាមនីតិវិធីច្បាប់។
ករណីចាប់រថយន្តនេះប្រព្រឹត្តទៅកាលពីវេលាម៉ោង៥ល្ងាចរសៀលថ្ងៃទី១៧ ខែកក្កដា ឆ្នាំ២០១២ នៅមុខស្នាក់ការក្រុមហ៊ុនលឹមសុធី ហេងហុង តាមបណ្តោយផ្លូវជាតិលេខ៦ ក្នុងភូមិវត្តបូព៌ សង្កាត់សាលាកំរើក ក្រុងសៀមរាប។
ប្រធានសាខាគយ និងរដ្ឋាករ ខេត្តសៀមរាប លោកភុំ សមឫទ្ធី មិនបានអត្ថាធិប្បាយច្រើននោះទេ លោកគ្រាន់តែនិយាយថា ដោយពិនិត្យឃើញថារថយន្តនេះមានភាពមិនប្រក្រតី សមត្ថកិច្ចរបស់លោកសម្រេចអូសយកទៅ រក្សាទុកនៅស្នាក់ការដើម្បីឲ្យម្ចាស់ចូលខ្លួនទៅដោះស្រាយតាមច្បាប់។ ប៉ុន្តែបើទោះជាយ៉ាងនេះក្តី លោកប្រធានគយរូបនេះ មិនបានបង្ហាញថា ម្ចាស់យានយន្តជានរណានោះទេ ដោយលោកគ្រាន់តែនិយាយថា អាចជារបស់ក្រុមហ៊ុនលឹមសុធីហេងហុង។រថយន្តដែលត្រូវគយចាប់នោះ ម៉ាកតូយ៉ូតា កាមរី ហាយប្រ៊ីដ ពណ៌ទឹកប្រាក់ ពាក់ស្លាកលេខភ្នំពេញ 2K 8388 ។
តាមប្រភពព័ត៌មានពីកន្លែងកើតហេតុបានឲ្យដឹងថា រថយន្តទំនើបនេះ ទំនងជារថយន្តដែល គេនាំចូលមកដោយគេចពន្ធ ហើយធ្វើសន្លឹកពន្ធក្លែងក្លាយ រួចបន្តរត់ការធ្វើស្លាកលេខសម្គាល់យានយន្តដើម្បីបន្លំភ្នែកសមត្ថកិច្ចក្នុងពេលដែលចរាចរនៅលើដងផ្លូវ។
ប្រភពបន្តថា ប្រសិន បើរកឃើញថា រថយន្តខាងលើពុំបានបង់ពន្ធនាំចូល ហើយបែរជាមានស្លាកលេខត្រឹមត្រូវមែននោះ ក្រុមសមត្ថកិច្ចត្រូវតែរកឲ្យឃើញចំពោះជនដែលឃុបឃិតដើម្បីយកមកផ្តន្ទាទោសតាមច្បាប់ បើមិនដូច្នោះទេ ប្រាកដជាមានអំពើបែបនេះកើតឡើងជាបន្តបន្ទាប់ទៀតជាមិនខាន៕
.jpg)
