Khmer
English
Chinese
Frence
Vietnamese
Thai
សាំងយ៉ុងបុកអ្នកជិះម៉ូតូស្លាប់១របួសស្រាល១ បើករត់បាត់
ដោយ ៖ ស្ឥាងជ័យ ថ្ងៃទី 18 សីហា 2012ម៉ោង 11:09:56
ខេត្តកណ្តាល ៖ យ៉ាងហោចបុរសម្នាក់បានស្លាប់ភ្លាមៗនៅនឹងកន្លែងកើតហេតុយ៉ាងអណោចអធ័ម និងបុរសម្នាក់ទៀតរងរបួសស្រាល ត្រូវបានបញ្ជូនទៅសង្គ្រោះនៅមន្ទីរពេទ្យ បន្ទាប់ពីបុរសរងគ្រោះទាំង២នាក់ខាងលើជិះម៉ូតូ១គ្រឿងតាមដងផ្លូវជាតិលេខ៨ ត្រូវរថយន្តសាំងយ៉ុង១គ្រឿង បើកស្របទិសគ្នា បោះពួយយ៉ាងលឿនបុកពីក្រោយពេញទំហឹងបណ្តាលឲ្យដួលបោកទៅលើផ្លូវជាតិ ។ ហេតុការណ៍គ្រោះថ្នាក់ចរាចរនេះបានកើតឡើងនៅម៉ោង៦យប់ ថ្ងៃទី១៧ ខែសីហា ឆ្នាំ២០១២ លើកំណាត់ផ្លូវជាតិលេខ៨ ស្ថិតក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។
លោកអធិការរងស្រុកខ្សាច់កណ្តាលលោក នៅ សុខន បានឲ្យដឹងថា ករណីរថយន្តបុកម៉ូតូបណ្តាលឲ្យមានមនុស្សស្លាប់និងរបួសនេះ បង្កឡើងដោយរថយន្ត១គ្រឿង ម៉ាកសាំងយ៉ុង ពណ៌ស មិនស្គាល់ស្លាកលេខ ។ បន្ទាប់ពីហេតុការណ៍កើតឡើងអ្នកបើកបររថយន្តបានបន្ថែមល្បឿនគេចខ្លួនបាត់ ។ លោកបានបន្តថា ជនរងគ្រោះដែលត្រូវរថយន្តបុកស្លាប់មានឈ្មោះ រិន ទៀវ ភេទប្រុស អាយុ៣៨ឆ្នាំ មុខរបរជាកសិករ (ជាអ្នករួមដំណើរ) និងបុរសម្នាក់ទៀតជាអ្នកបើកបរម៉ូតូរងរបួសស្រាល ឈ្មោះ ឈូក សាន្ត អាយុ៤០ឆ្នាំ មុខរបរជាកសិករ ។ អ្នកទាំង២មានទីលំនៅក្នុងភូមិរការទី១ ឃុំរការជន្លឹង ស្រុកខ្សាច់កណ្តាល ជិះម៉ូតូ១គ្រឿងម៉ាកសេ១០០កូរ៉េ ពណ៌ក្រហម ពាក់ស្លាកលេខ ជ១៤៤៦ ភព១។
លោក នៅ សុខន បានបញ្ជាក់ថា នៅមុនពេលកើតហេតុ សាក្សីបានឃើញបុរស២នាក់ជិះម៉ូតូ១គ្រឿង តាមបណ្តោយផ្លូវជាតិលេខ៨ ក្នុងល្បឿងមធ្យមពីត្បូងទៅជើង ។ លុះមកដល់ចំណុចកើតហេតុ ក៍ស្រាប់តែរថយន្តបើកបរយ៉ាងលឿនក្នុងទិសដៅស្របគ្នា មកបុកម៉ូតូពីក្រោយពេញទំហឹង បណ្តាលឲ្យដួលបោកទៅលើផ្លូវជាតិបែកផ្កាភ្លើង ។ ភ្លាមៗនោះគេឃើញអ្នករួមដំណើរជិះពីក្រោយប៉ើងខ្ទាតចេញពីកន្លែងពីម៉ូតូជាច្រើនម៉ែត្រ បណ្តាលឲ្យបាក់ក បែកក្បាលស្លាប់ភ្លាមៗមួយរំពេក ។ រីឯអ្នកបើកមិនបានប៉ើងខ្ទាតទេ ហើយបានដួលទៅជាមួយម៉ូតូរងរបួសស្រាល ។
លោកអធិការរងបានបន្តទៀតថា បន្ទាប់ពីបុកម៉ូតូបណ្តាលឲ្យមានមនុស្សស្លាប់និងរបួសរួចមក អ្នកបើកបរបានបន្ថែមល្បឿរថយន្តគេចខ្លួនបាត់តែម្តង ។ ក្រោយកើតហេតុកម្លាំងនគរបាលមូលដ្ឋាន និងជំនាញស្រុកបានចុះទៅដល់កន្លែងកើតហេតុ ជួយនាំអ្នករងរបួសយកទៅសង្គ្រោះនៅមន្ទីរពេទ្យ រួចនាំយកម៉ូតូមករក្សាទុកនៅអធិការដ្ឋាននគរបាលស្រុកខ្សាច់កណ្តាលជាបណ្តោះអាសន្ន ។ ចំណែកសពត្រូវក្រុមគ្រួសារនាំយកទៅធ្វើបុណ្យតាមប្រពៃណី ៕
.jpg)
.jpg)
.jpg)
