Khmer
English
Chinese
Frence
Vietnamese
Thaiសត្វផ្សោតជាប្រភេទសត្វកម្រមានការកើនឡើងក្រោមការអភិរក្សរបស់ក្រុមការងារអភិវឌ្ឍន៏តំបន់អេកូទេសចរណ៏នៅខេត្តស្ទឹងត្រែង
ដោយ ៖ ឡុង សំបូរ|ថ្ងៃទី 24 សីហា 2012 ម៉ោង 08:40:48
ខេត្តស្ទឹងត្រែង ៖ ប្រជាពលរដ្ឋរស់នៅជាប់តំបន់អេកូទេសចរណ៏ទាំងអស់ ក្នុងខេត្តស្ទឹងត្រែង បានសម្តែងនូវទឹកមុខរំភើបយ៉ាងក្រៃលែង ពីការកើនឡើងនៃចំនួនសត្វផ្សោតជាប្រភេទសត្វដ៏កម្រពីមួយឆ្នាំទៅមួយឆ្នាំ ក្រោមការអភិរក្សពីសំណាក់ក្រុមការងារអភិវឌ្ឍន៏តំបន់អេកូទេសចរណ៏ នៅខេត្ត ស្ទឹងត្រែង ហើយពួកគាត់នឹងសង្ឃឹមថា ឆ្នាំក្រោយៗសត្វផ្សោត នឹងមានកើនឡើងជាងឆ្នាំនេះមួយ កម្រិតទៀត ក្នុងនោះក៏មានការព្រួយបារម្ភផងដែរខ្លាចវិនាសផុតពូជ ពីក្រុមជនខិលខូចមួយចំនួនលួច បំផ្លាញតាមរយះការចាប់មច្ឆារជាតិតាមគ្រប់រូបភាព ។
លោកយ៉ាន់ យុទ្ធី ប្រធានសាខាអភិរក្សសត្វផ្សោតទន្លេមេគង្គខេត្តស្ទឹងត្រែង បានថ្លែងឲ្យដឹងថា សត្វផ្សោតដែលរស់នៅក្នុងទន្លេមេគង្គមានចំនួនប្រហែល៨០ក្បាល បើចាប់គិតពីឆ្នាំ២០០៦មកទល់ នឹងឆ្នាំ២០១២នេះ ។ ហើយសត្វផ្សោតទាំងនោះរស់នៅតាមអន្លង់ជ្រៅៗទាំង៤ក្នុងទន្លេមេគង្គមានដូច ជា៖ អន្លង់កោះសំពាយ(កោះកូនសត្វ) អន្លង់ត្បូងខ្លា កោះជ្រឹម ស្ថិតក្នុងស្រុកសៀមបូក ព្រំប្រទល់ខេត្ត ស្ទឹងត្រែង ជាប់ស្រុកសម្បូរ ខេត្តក្រចេះ និងអន្លង់ឈើទាល (អន្លង់ស្វាយ) ស្ថិតក្នុងឃុំព្រះរំកិល ស្រុក ថាឡាបរិវ៉ាត់ ខេត្តស្ទឹងត្រែង ជាប់ព្រំប្រទល់ប្រទេសឡាវ ។
លោកប្រធានសាខាអភិរក្សសត្វផ្សោតទន្លេមេគង្គ បានថ្លែងបន្តទៀតថា នៅក្នុងឆ្នាំ២០១២នេះ សត្វផ្សោតមានការកើនឡើងជាងឆ្នាំមុន(២០១១) ដោយវាកើតកូនបានចំនួន០៤ក្បាលបន្ថែមទៀត ។ អ្វីដែលនាំឲ្យសត្វផ្សោតមានការកើនឡើងនូវបរិមាណបែបនេះ ដោយសារមានការអភិរក្ស និងធ្វើការ ហាមឃាត់មិនឲ្យប្រជានេសាទ ចូលទៅដាក់មង ឬ ប្រើប្រាស់ឧបករណ៏នេសាទខុសច្បាប់នានា នៅ កន្លែងដែលវារស់នៅនោះឡើយ ហើយការប្រើប្រាស់ឧបករណ៏ស្បៃមង គឺ ធ្វើឲ្យសត្វផ្សោតងាយរង គ្រោះថ្នាក់ដល់ជីវិត និងអ្វីដែលសំខាន់នោះគឺមិនអាចធ្វើវាបន្តពូជបាន ។
លោក ភីវ មឿងឃុន មេឃុំព្រះរំកិល និងលោក ណង ដេត ប្រធានប៉ុស្តិ៍ឆ្នាំទន្លេអន្លង់ឈើទាល (អន្លង់ស្វាយ) បានធ្វើការអះអាងស្រដៀងគ្នាថា បច្ចុប្បន្ននេះសត្វផ្សោតដែលរស់នៅតាមអន្លង់ទាំង០៤ ក្នុងដែនអភិរក្ស នៃតំបន់អេកូទេសចរណ៏ក្នុងខេត្ត ពិតជាមានការកើនឡើង នៃចំនួន០៤ក្បាលយ៉ាងពិតប្រាកដ នេះបើតាមការពិនិត្យរាប់ជាក់ស្តែងជារៀងរាល់ថ្ងៃ ខែ ។ ហើយសូមធ្វើការបដិសេធនូវការ ចុះផ្សាយរបស់កាសែតក្នុងស្រុកមួយ កាលពីពេលថ្មីៗនេះថា ចំនួនសត្វផ្សោតក្នុងដែនអភិរក្សមានការ ថយចុះនោះ ព្រោះដ្បិតថា អ្នកផ្តល់ព័ត៌មានឲ្យកាសែតនោះចុះផ្សាយ មិនមែនជាអ្នកជំនាញក្នុងការរាប់ ចំនួនសត្វផ្សោតរស់នៅក្នុងទឹកនោះទេ ។ ចំណែកបទល្មើសដែលគេថា មានកើតឡើងក្បែរអន្លង់ ផ្សោតដូចជា៖ ឆក់ត្រី បោកគ្រាប់បែក ឬ ប្រើប្រាស់ឧបករណ៏នេសាទល្មើសច្បាប់ផ្សេងៗទៀតនោះ គឺ គ្មានទាល់តែសោះ ព្រោះថា នៅអន្លង់កោះឈើទាលស្ថិតក្នុងឃុំព្រះរំកិលនេះ មានកម្លាំងសមត្ថកិច្ចការ ពារច្រើនណាស់ដូចជា៖កម្លាំងនគរបាលវរៈការពារព្រំដែន៧០១ កម្លាំងយោធាវរៈការពារព្រំដែនលេខ ១០១ ជាពិសេសនោះសហគមន៏អភិរក្សសត្វផ្សោតទន្លេមេគង្គ ដូច្នេះបទល្មើសទាំងនោះមិនអាចកើត មាននៅទីនេះឡើយ ។
ជុំវិញករណីខាងលើនេះត្រូវបានលោក ម៉ៅ ធនិន អភិបាលរងខេត្ត និងជាប្រធានក្រុមការងារអភិរក្ស និងអភិវឌ្ឍន៏តំបន់អេកូទេសចរណ៏សត្វផ្សោតទន្លេមេគង្គស្ទឹងត្រែង បានថ្លែងបញ្ជាក់ថា សត្វផ្សោតពិតជាមានការកើនឡើងយ៉ាងពិតប្រាកដ ដោយសារអាជ្ញាធរបានបង្កើននូវការទប់ស្កាត់ នូវរាល់ បទល្មើសនេសាទដែលកើតមានឡើង ។ ម្យ៉ាងទៀតត្រីនៅក្នុងឆ្នាំ២០១២នេះ មានការកើនឡើងនូវបរិ មាណ ហើយត្រីគឺជាប្រភពចំណីរបស់សត្វផ្សោតទាំងនោះ ដែលជួយឲ្យវាធ្វើការបន្តពូជទៀតបាន ។
លោកអភិបាលរងបានបញ្ជាក់ទៀតថា គោលដៅចំពោះមុខ អាជ្ញាធរនឹងខិតខំថែរក្សា ការពារ និងបង្កើតតំបន់អភិរក្សនោះ ឲ្យក្លាយទៅជាតំបន់ដែលទាក់ទាញភ្ញៀវទេសចរណ៏ ដោយផ្តោតលើការ ចាប់អារម្មណ៏ និងចូលមកទស្សនាកាន់តែច្រើនថែមទៀត ។ កាលណាមានភ្ញៀវចូលមកទស្សនាច្រើន ធ្វើឲ្យជីវភាពប្រជាពលរដ្ឋរស់នៅក្នុងសហគមន៏ មានការប្តូរផ្លាស់មុខមាត់ថ្មី ក្រោមចំណូលពីភ្ញៀវ ទេសចរណ៏ជាតិ និងអន្តរជាតិ ។
បើទោះបីជាមានអំណាស់អំណាងពីគ្រប់ស្រទាប់អ្នកដឹកនាំអភិរក្ស សហគមន៏អេកូទេសចរណ៏ ទន្លេមេគង្គថាសត្វផ្សោតមានការកើនឡើងយ៉ាងណាក្តី ក៏ប្រជាពលរដ្ឋទូទៅ ក៏ដូចជាប្រជាសហគមន៏ រស់ក្នុងរង្វង់តំបន់ទេសចរណ៏បានសម្តែងនូវការព្រួយបារម្ភ ខ្លាចសត្វផ្សោតជាសត្វត្រូវបានគេចាត់ទុក ថា ជាសត្វដ៏កម្រនោះ មានការថយចុះ ឬបាត់បង់នៅថ្ងៃក្រោយ ។ ឯការព្រួយបារម្ភដ៏ធំនោះគឺការសាង សង់ទំបន់សាយ៉ាបូរីពីទន្លេមេគង្គលើ របស់ប្រទេសឡាវ ហូរនាំល្បាប់មកចាក់ក្នុងទន្លេមេគង្គក្រោម ទន្លេខេត្តស្ទឹងត្រែង ប្រទេសកម្ពុជា ធ្វើឲ្យរងផលប៉ះពាល់ដល់ជីវចម្រុះដល់អ្នករស់នៅតំបន់ទន្លេមេគង្គ ក្រោម កុំថាឡើយមនុស្សសូម្បីតែសត្វផ្សោតជាប្រភេទសត្វដ៏កម្រនោះ ក៏ទទួលរងនូវផលប៉ះពាល់ផងដែរ ។
លោកយ៉ាន់ យុទ្ធី អធិការរងស្រុកសៀមបូក និងជាប្រធានសាខាអភិរក្សសត្វផ្សោតទន្លេមេគង្គ ស្ទឹងត្រែងបានបញ្ជាក់ជាចុងក្រោយថា ដើម្បីអភិរក្សសត្វផ្សោតដែលគេចាត់ទុក ក្នុងលំដាប់សត្វដ៏កម្រ លើលោកនោះបាន ទាល់តែមានការចូលរួមទប់ស្កាត់លើគ្រប់ករណីប្រព្រឹត្តបទល្មើសនេសាទ ពីសំ ណាក់ប្រជាពលរដ្ឋទូទៅ រួមទាំងកម្លាំងប្រតិបត្តិការណ៏ប្រចាំថ្ងៃ ជាពិសេសនោះគឺកម្លាំងឆ្មាំទន្លេ ។ ហើយបច្ចុប្បន្នយើងបានបង្កើតប៉ុស្តិ៍ឆ្មាំទន្លេ (ប៉ុស្តិ៍អភិរក្សសត្វផ្សោត) ចំនួន៥កន្លែងតាមដងទន្លេមេគង្គក្នុងខេត្តស្ទឹងត្រែង ដើម្បីចុះយាមល្បាត និងធ្វើការទប់ស្កាត់នូវរាល់បទល្មើសដែលកើតមានឡើង ក្នុងដែនអភិរក្សសត្វផ្សោត ៕
