Khmer
English
Chinese
Frence
Vietnamese
Thai
ជនរងគ្រោះចោទប្រកាន់មេគ២ អ៊ុក ដារ៉ាន់ ប្លន់ជំរិតទារប្រាក់លើពួកគាត់រកស៊ីលក់ធ្យូង
ដោយ ៖ សុខ ខេមរា ថ្ងៃទី 07 កញ្ញា 2012ម៉ោង 16:16:38
ខេត្ដបន្ទាយមានជ័យ ៖ លោក វៀន វុទ្ធី អាយុ៣១ឆ្នាំ និងប្រពន្ធឈ្មោះ អ៊ុន តុងហឿង អាយុ២៧ឆ្នាំ រស់នៅភូមិបឹង តាស្រី ឃុំគោករមៀត ស្រុកថ្មពួក ខេត្ដបន្ទាយមានជ័យ បានដាក់ពាក្យបណ្ដឹង រួចទៅហើយទៅអយ្យការនៃសាលាដំបូង ខេត្ដបន្ទាយមានជ័យ ចោទប្រកាន់ទៅ លើលោក អ៊ុក ដារ៉ាន់ មេគ២ សឹករង ស្រុកថ្មពួកតំបន់ប្រតិបត្ដិការសឹករង ខេត្ដបន្ទាយមានជ័យ ពីបទប្លន់ និងជំរិតទារប្រាក់ ។
ជនរងគ្រោះបានឱ្យនគរវត្ដដឹងថា កាលពីវេលាម៉ោង៨និង៣០នាទីយប់ ថ្ងៃទី១៥ខែសីហាឆ្នាំ២០១២ ខ្លួននិងភរិយា ព្រមទាំងកម្មករចំនួន៥នាក់ទៀតបាន ធ្វើដំណើរដោយរថយន្ដកែច្នៃ១គ្រឿងមក ពីដឹកធ្យូងលក់ លុះមកដល់ចំណុចត្រញំង ចង្អើប្រើស ភូមិប្រាសាទតាបែង ឃុំ បន្ទាយឆ្មារ ស្រុកថ្មពួក ស្រាប់តែមាន កម្លាំងប្រដាប់អាវុធដែលជាមន្ដ្រីយោធា ចំនួន៦នាក់ បានយកកាំភ្លើងមកភ្ជង់រូប គាត់ និងប្រពន្ធដែលចោទប្រកាន់ថា ពួក គាត់រកស៊ីបទល្មើសម៉ូតូគេចពន្ធ រួចហើយ បង្ខំឱ្យបង់ប្រាក់ចំនួន៣ម៉ឺនបាត បើពុំបាន បង់ប្រាក់ទេនោះ គេនឹងបញ្ជូនរថយន្ដ កែច្នៃនេះយកទៅរក្សាទុកនៅអង្គភាព ។
វៀន វុទ្ធី បានបន្ដថា ក្រោមការបញ្ជា ពីលោក អ៊ុក ដារ៉ាន់ មេគ២ មន្ដ្រី យោធាទាំង៦នាក់នោះបានគំរាមកំហែង និងភ្ជង់កាំភ្លើងមកលើពួកគាត់ ហើយ ពេលដែលមិនបានបង់បាក់ចំនួន៣ម៉ឺន បាតនោះ លោក អ៊ុក ដារ៉ា់ន់ ក៏បានយក រថយន្ដកែច្នៃទៅ តែមិនដឹងយកទៅទុក នៅកន្លែងណា និងមិនមានលិខិតស្នាមដក ហូតត្រឹមត្រូវនោះឡើយ ។
បន្ទាប់ពីលោក អ៊ុក ដារ៉ាន់ រំលោភបំពាននិងប្រើប្រាស់កម្លាំងប្រដាប់អាវុធ មកភ្ជង់គំរាមទារប្រាក់នេះ នៅថ្ងៃទី១៩ ខែសីហាឆ្នាំ២០១២ លោកក៏បានដាក់ ពាក្យបណ្ដឹងផងដែរទៅកាន់អយ្យការអម សាលាដំបូងខេត្ដបន្ទាយមានជ័យ ទៅលើលោក អ៊ុក ដារ៉ាន់ ពីបទប្លន់និងជំរិតទារ ប្រាក់ ។
ពាក់ព័ន្ធនឹងករណីចោទប្រកាន់នេះ កាលពីរសៀលថ្ងៃទី៧ខែកញ្ញាឆ្នាំ២០១២ លោក អ៊ុក ដារ៉ាន់ បានឱ្យនគរវត្ដដឹង តាមទូរស័ព្ទថា តាមពិតរថយន្ដកែច្នៃ នោះជាមធ្យោបាយដឹកជញ្ជូនបទល្មើស ព្រៃឈើ ដែលមានឈើគ្រញូងចំនួន១៤ កំណាត់ ហើយលោកក៏បានធើឯកសារ បញ្ជូនទៅខាងជំនាញរដ្ឋបាលព្រៃឈើ ប្រគល់ឱ្យទាំងឡាននិងឈើតាំងពីថ្ងៃកើត ហេតុនោះម្ល៉េះ ។
លោក អ៊ុក ដារ៉ាន់ បន្ដថា បើទោះជាមានពាក្យបណ្ដឹងក៏ដោយ លោកចាត់ទុកថា រឿងនេះជាការចោទប្រកាន់មិនពិត ។ បើទោះជាមេគ២ដែលប្រើប្រាស់កម្លាំងយោធាភ្ជង់ប្លន់គំរាមជំរិត ទារប្រាក់លើក្រុមគ្រួសាររងគ្រោះមកពីលក់ធ្យូងនេះក៏ដោយ ប្រធានអង្គភាព លោក ភ្លន់ តារា មេបញ្ជាការតំបន់ ប្រតិបត្ដិការសឹករងខេត្ដបន្ទាយមានជ័យ ហាក់ដូចជាមិនបានចាប់អារម្មណ៍ ដោយ តាមទូរស័ព្ទលោកគ្រាន់តែបញ្ជាក់ថា អត់ស្គាល់ឈ្មោះមេគ២ និងអត់ដឹងថា មានរឿងអ្វីនោះដែរ ។
ជនរងគ្រោះ វៀន វុទ្ធី បានលើក អំណះអំណាងផងដែរថា ខណៈដែលលោក អ៊ុក ដារ៉ាន់ ឱ្យមន្ដ្រីយោធាភ្ជង់មកលើ គាត់និងប្រពន្ធ រួមទាំងកម្មករ៥នាក់ទៀត មកពីលក់ធ្យូង ហើយចោទប្រកាន់ថា រកស៊ីម៉ូតូគេចពន្ធ ប៉ុន្ដែមិនមានភស្ដុតាង និងបង្ខំឱ្យបង់ប្រាក់ចំនួន៣ម៉ឺនបាត ពេល ដែលចាប់យករថយន្ដកែច្នៃនេះទៅរក្សា ទុក បែរជាព្យាយាមយកឈើគ្រញូងចំនួន ៤-៥ដុំដាក់ក្នុងរថយន្ដកែច្នៃរបស់គាត់ ដើម្បីធ្វើជាវត្ថុតាងដាក់បន្ទុកថា គាត់ជាប់ពាក់ព័ន្ធសង្ស័យជួញដូរឈើគ្រញូង ដែលរឿងនេះ គឺជាអំពើរំលោភបំពាន ទាំងស្រុងមកលើរូបគាត់ជាជនរងគ្រោះ។
វៀន វុទ្ធី បញ្ជាក់ទៀតថា ករណីលោក អ៊ុក ដារ៉ាន់ រឹបអូសយករថយន្ដកែច្នៃ នាយប់ថ្ងៃទី១៥ខែសីហាឆ្នាំ២០១២នោះ ក៏ធ្វើឱ្យបាត់បង់នូវប្រាក់ចំនួន១៥ម៉ឺនបាត ដែលគាត់បានមកពីការលក់ធ្យូង ក្នុងនោះមានវិក្កយបត្រទៀតផង ។
ពាក់ព័ន្ធនឹងជនរងគ្រោះដាក់ពាក្យ បណ្ដឹងលោក ផាន់ វណ្ណរ័ត្ន ព្រះរាជអាជ្ញា អមសាលាដំបូងខេត្ដបន្ទាយមានជ័យ បានឱ្យដឹងថា រឿងនេះលោកពុំទាន់បាន ដឹងនៅឡើយទេ ដោយសារតែមាន ភារកិច្ចទៅក្រៅប្រទេស ហើយទើបនឹង មកដល់ស្រុកខ្មែរកាលពីល្ងាចថ្ងៃទី៦ ខែកញ្ញាឆ្នាំ២០១២ ដែលលោកព្រះរាជ អាជ្ញាតម្រូវឱ្យទៅសួរនាំពីលោក ឡុង ជៀប ព្រះរាជអាជ្ញារង ។
លោក ឡុង ជៀប ព្រះរាជអាជ្ញារង អមសាលាដំបូងបានឱ្យដឹងថា បើពាក្យបណ្ដឹងដាក់ពីថ្ងៃទី១៩ខែសីហាឆ្នាំ២០១២ នោះ លោកមិនទាន់បានដឹងនៅឡើយទេ តែបើក្នុងមួយសប្ដាហ៍មុន ទើបលោក បានគ្រប់គ្រងក្នុងការដាក់បណ្ដឹងនោះ ។
ករណីលោក អ៊ុក ដារ៉ាន់ មេគ២ ធ្វើការចោទប្រកាន់ទៅលើជនរងគ្រោះ ថា រកស៊ីម៉ូតូគេចពន្ធ និងជំនួញឈើគ្រញូង មិនត្រឹមតែក្រុមគ្រួសារជនរងគ្រោះ ដាក់ពាក្យបណ្ដឹងទៅកាន់អយ្យការអម សាលាដំបូងខេត្ដប៉ុណ្ណោះទេ ថ្មីៗនេះ ប្រជាពលរដ្ឋប្រមាណជាង២០០នាក់ក៏ បានធ្វើការតវ៉ាទៅនឹងការចុះមកអង្កេត របស់គណៈកម្មការរបស់មន្ដ្រីយោធា យោធភូមិភាគទី៥ បន្ទាប់ពីការចុះស៊ើប អង្កេតនេះ បែរជាត្រូវរ៉ូវគ្នាជាមួយលោក អ៊ុក ដារ៉ាន់ ក្នុងផលប្រយោជន៍ បែរជា ទុកឱកាសឱ្យលោក អ៊ុក ដារ៉ាន់ មេគ២ យកឈើគ្រញូង៤ទៅ៥ដុំដាក់នៅក្នុង រថយន្ដកែច្នៃរបស់ជនរងគ្រោះដើម្បីដាក់ បន្ទុកបង្កើតបទល្មើសដែលអំពើនេះ គឺ ជាការរំលោភបំពានទៅលើជនរងគ្រោះ ក៏ដូចផ្លូវច្បាប់ ។
ប្រជាពលរដ្ឋជាច្រើនរយគ្រួសារ សំណូមពរឱ្យតុលាការចាត់ការក្នុងរឿង នេះ ខណៈដែលលោក អ៊ុក ដារ៉ាន់ បាន យកអំណាចនិងតួនាទី តែងតែគំរាម កំហែង និងដាក់កុងត្រូលជជុះជាដើមទារ ប្រាក់ពីប្រជាពលរដ្ឋដឹកជញ្ជូនអុស ធ្យូង ។
បើទោះជាលោក ភ្លន់ តារា អះអាង ថា មិនស្គាល់កូនចៅ អ៊ុក ដារ៉ាន់ និង មិនដឹងថាមានរឿងអីកើតឡើងនោះ ក៏ដោយ ក៏អង្គភាពយោធភូមិភាគទី៥ បានចាត់ការឱ្យគណៈកម្មការចុះស៊ើប អង្កេតក្នុងរឿងនេះ ដើម្បីដាក់ជូនតុលា ការ ប៉ុន្ដែមន្ដ្រីដែលចុះទៅពិនិត្យសាកសួរ ជុំវិញករណីនេះ បានក្លាយទៅជាអ្នកដែល ព្យាយាមស្វែងរកផលប្រយោជន៍ពីលោក អ៊ុក ដារ៉ាន់ ទៅវិញ ទើបប្រជាពលរដ្ឋ រាប់រយគ្រួសារក្នុងភូមិធ្វើការតវ៉ានិង ចោទប្រកាន់ថា ការចុះអង្កេតរបស់ គណៈកម្មការមន្ដ្រីយោធាភូមិភាគ៥សំឡឹង ឃើញតែប្រយោជន៍ មិនបានផ្ដល់ភាព យុត្ដិធម៌ដល់ប្រជាពលរដ្ឋជាជនរងគ្រោះ។
ពាក់ព័ន្ធនឹងការចោទប្រកាន់ពីអ្នកភូមិ រាប់រយគ្រួសារមកលើមន្ដ្រីយោធាភូមិ ភាគ៥ចុះមកអង្កេត ហើយឃុបឃិតគ្នា ជាមួយនឹងលោក អ៊ុក ដារ៉ាន់ នោះ នគរវត្ដមិនអាចទាក់ទងបានទេពីលោក ប៊ុន សេង មេបញ្ជាការយោធភូមិភាគ ទី៥ ដោយទូរស័ព្ទដាក់ប្រព័ន្ធជាប់រវិល ៕
.jpg)
