Khmer
English
Chinese
Frence
Vietnamese
Thai
វិចារណកថា ៖ ខួបឆ្នាំទី៨នៃការគ្រងរាជ្យរបស់ព្រះមហាក្សត្រ
ដោយ ៖ នួន នរិន្ទ្រ ថ្ងៃទី 30 តុលា 2012ម៉ោង 09:17:22
ប្រជាពលរដ្ឋកម្ពុជា, រាជរដ្ឋាភិបាលកម្ពុជា, រដ្ឋសភា និងព្រឹទ្ធសភា បានប្រារឰ ទិវាខួបឆ្នាំទី៨ នៃការឡើងគ្រងរាជ្យសម្បត្ដិរបស់សម្ដេចព្រះ បរមនាថ នរោត្ដម សីហមុនី កាលពីថ្ងៃទី២៩ ខែតុលា ក្នុងភាពមិនអធិកអធម។ ខួបឆ្នាំនេះ ប្រព្រឹត្ដ ទៅចំពេលដែលប្រទេសកម្ពុជាទាំងមូលកំពុងគោរពព្រះវិញ្ញាណក្ខន្ធព្រះរាជបរម សព សម្ដេចឪ ព្រះនរោត្ដម សីហនុ ។ ការផ្ទេររាជ្យសម្បត្ដិឱ្យទៅព្រះរាជបុត្រ កាលពី៨ឆ្នាំមុន ត្រូវបានសម្ដេចតេជោនាយករដ្ឋមន្ដ្រីហ៊ុន សែន ចាត់ទុកជា សមិទ្ធផលដ៏ធំធេងមួយទៀតរបស់អង្គសម្ដេចឪក្នុងការបញ្ចៀសវិបត្ដិរាជ្យបល្ល័ង្ក ក្រោយពេលព្រះអង្គចូលទិវង្គត។
រៀងរាល់ថ្ងៃទី២៩ ខែតុលា ចាប់ពីឆ្នាំ២០០៥មក ប្រទេសកម្ពុជាតែងតែប្រារឰ ខួបនៃការឡើងគ្រងរាជ្យសម្បត្ដិរបស់ព្រះមហាក្សត្រសម្ដេចព្រះបរមនាថ នរោត្ដម សីហមុនី។ អតីតជាអ្នករាំរបាំបាឡេ និងជាព្រះរាជបុត្រដាក់ព្រះកាយមួយអង្គនេះ គ្មាននរណានឹកស្មានឡើយថា សម្ដេចព្រះបរមនាថ ត្រូវបានក្រុមប្រឹក្សារាជ សម្បត្ដិជ្រើសតាំងជាព្រះមហាក្សត្រដើម្បីបន្ដវេនពីព្រះរាជបិតាព្រះអង្គនោះឡើយ។ ព្រះអង្គត្រូវបានក្រុមប្រឹក្សារាជសម្បត្ដិជ្រើសរើសឱ្យឡើងគ្រងរាជ្យជាព្រះមហា ក្សត្រនៃប្រទេសកម្ពុជា កាលពីថ្ងៃទី២៩ ខែតុលា ឆ្នាំ២០០៤ បន្ទាប់ពីព្រះករុណា សម្ដេចព្រះ នរោត្ដម សីហនុ បានដាក់រាជ្យនៅដើមខែតុលា ឆ្នាំដដែលនោះ។
ខួបឆ្នាំទី៨ នៃការឡើងគ្រងរាជ្យសម្បត្ដិរបស់សម្ដេចព្រះបរមនាថ នរោត្ដម សីហមុនី បានប្រព្រឹត្ដទៅចំពេលដែលប្រទេសកម្ពុជាទាំងមូលកំពុងប្រារឰពិធី គោរពព្រះវិញ្ញាណក្ខន្ធនៃព្រះបរមសពអង្គសម្ដេចឪ ។ សម្ដេចនាយករដ្ឋមន្ដ្រី ហ៊ុន សែន បានរំឭកអំពីសមិទ្ធផលដ៏ធំមួយទៀតរបស់អតីតព្រះមហាក្សត្រ នោះគឺការ ដែលព្រះអង្គផ្ទេររាជ្យសម្បត្ដិកាលពីចុងឆ្នាំ២០០៤ ដើម្បីបញ្ចៀសវិបត្ដិរាជ្យបល្ល័ង្ក នាពេលនេះ។ ប្រសិនបើមិនយ៉ាងដូច្នោះទេ វិបត្ដិរាជ្យបល្ល័ង្កនឹងកើតឡើងធំ ពិបាក ដោះស្រាយនាពេលនេះជាមិនខាន ពីព្រោះរដ្ឋធម្មនុញ្ញនៃប្រទេសកម្ពុជាតម្រូវឱ្យ ជ្រើសរើសព្រះមហាក្សត្ររយៈពេលតែ៧ថ្ងៃតែប៉ុណ្ណោះ បន្ទាប់ពីព្រះមហាក្សត្រ ចាស់សោយទិវង្គត។
សម្ដេចព្រះបរមនាថ នរោត្ដម សីហមុនី ត្រូវបានជ្រើសតាំងជាព្រះមហា ក្សត្រកាលពី៨ឆ្នាំមុន។ គិតៗទៅមួយភ្លែតសោះ រយៈពេល៨ឆ្នាំដែលព្រះអង្គបាន បំពេញព្រះរាជ្យតួនាទីដើម្បីសន្ដិភាព ការអភិវឌ្ឍ និងភាពរុងរឿងរបស់ប្រទេស កម្ពុជា។ រយៈពេល៨ឆ្នាំនេះ ប្រទេសកម្ពុជាបានធ្វើដំណើរប្រកបដោយភាព ស្វាហាប់ និងមានការរីកចម្រើនផ្នែកសេដ្ឋកិច្ចគួរឱ្យកត់សម្គាល់។ កត់សម្គាល់ ឃើញថា ប្រជាជនកម្ពុជាកាន់តែមានជីវភាពធូរធារជាងមុន ស្របពេលដែល ហេដ្ឋារចនាសម្ព័ន្ធមានដូចជា សាលារៀន, មន្ទីរពេទ្យ, ផ្លូវ, ស្ពាន, ថ្នល់... បាននិង កំពុងរីកដុះដាលជាបន្ដបន្ទាប់។ វាជាការរីកដុះដាលប្រកបដោយមោទនភាព ក្រោមម្លប់ដ៏ត្រជាក់របស់ព្រះមហាក្សត្រ និងការដឹកនាំដ៏ត្រឹមត្រូវរបស់រាជរដ្ឋា ភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខ ដឹកនាំ។
អ្វីដែលគួរឱ្យកត់សម្គាល់ក្នុងរយៈពេល៨ឆ្នាំនៃការគ្រងរាជ្យសម្បត្ដិ ក្រៅពីសមិទ្ធ ផលដ៏ហូរហៀរនោះគឺព្រះអង្គបានបំពេញព្រះរាជតួនាទីមួយគឺការនៅឆ្ងាយពីឆាក នយោបាយដ៏ហែកហួរ ។ ព្រះមហាក្សត្រគ្រងរាជ្យ ប៉ុន្ដែមិនកាន់អំណាចដោយ ផ្ទាល់ គឺទទួលបាននូវការគោរពយ៉ាងទូលំទូលាយបំផុតពីប្រជារាស្ដ្រខ្មែរ។ ការងារ សង្គមកិច្ច ជំរុញឱ្យកាន់តែមានភាពស្និទ្ធស្នាល និងការរួមសុខទុក្ខរវាងប្រជារាស្ដ្រ នឹងព្រះអង្គ។ ការរួមសុខទុក្ខនេះបានបង្ហាញឱ្យឃើញនៅពេលដែលមនុស្សម្នាមក ពីគ្រប់ទិសទីប្រមូលផ្ដុំគ្នាមុខព្រះបរមរាជវាំងកាន់ទុក្ខដ៏សោកសង្រេងបំផុតចំពោះ ការសោយទិវង្គតព្រះបិតាព្រះអង្គ។ ព្រះមហាក្សត្របានបង្ហូរទឹកព្រះនេត្រាព្រមគ្នា ជាមួយប្រជារាស្ដ្របានសម្រក់ទឹកភ្នែកលាយឡំនឹងការលួងលោមព្រះអង្គផង។
ឆ្លើយតបទៅនឹងបញ្ហានេះ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានសន្យាដោយគ្មានងាករេចំពោះការការពាររាជ្យបល្ល័ង្ក និងរបបរាជា និយម។ នៅឯទីក្រុងប៉េកាំង សម្ដេចតេជោដែលហូរទឹកភ្នែកជាមួយការរំជួលចិត្ដ បំផុតនោះ បានសន្យាចំពោះព្រះបរមសពសម្ដេចឪថា នឹងថែរក្សាការពារព្រះ មហាក្សត្រ, សម្ដេចម៉ែ, រាជ្យបល្ល័ង្ក និងរបបរាជានិយម ។ ការសន្យាដ៏មុតមាំ នេះ គឺជាក្ដីសង្ឃឹមសម្រាប់ប្រជាពលរដ្ឋទូទាំងប្រទេស ហើយយល់ថា មានតែរាជ រដ្ឋាភិបាល និងព្រះមហាក្សត្រប៉ុណ្ណោះដែលជាម្លប់របស់ប្រជាជនកម្ពុជាទាំងអស់ ដូចដែលប្រជាជនធ្លាប់ទទួលបានសេចក្ដីសុខអស់រយៈពេល៨ឆ្នាំកន្លងមកនោះ ៕
.jpg)
