Khmer
English
Chinese
Frence
Vietnamese
Thai
សេចក្តីប្រកាសព័ត៌មានស្តីពីលទ្ធផលប្រជុំនៃសម័យប្រជុំពេញអង្គគណៈរដ្ឋមន្ត្រី ថ្ងៃទី០២ ខែវិច្ឆិកា ឆ្នាំ ២០១២
ដោយ ៖ ថ្ងៃទី 02 វិច្ឆកា 2012ម៉ោង 15:57:49
ថ្ងៃទី០២ ខែវិច្ឆិកា ឆ្នាំ២០១២ វេលាម៉ោង៨និង៣០នាទី នៅវិមានសន្តិភាព មានបើក អង្គប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី ៤ ដើម្បីឆ្លង ៖
១-គម្រោងអភិវឌ្ឍន៍វារីអគ្គិសនីសេសានក្រោម២ និងការវិនិយោគគម្រោងនេះ
២-បញ្ហាផ្សេងៗ
ក្រោយពីបានស្តាប់របាយការណ៍ និងមតិពិភាក្សាផ្លាស់ប្តូរយោបល់រួចមក កិច្ចប្រជុំពេញអង្គ គណៈរដ្ឋមន្ត្រីបានសម្រេចអនុម័តនូវ ៖
១-គម្រោងអភិវឌ្ឍន៍វារីអគ្គិសនីសេសានក្រោម២ និងការវិនិយោគគម្រោងនេះ ៖ គម្រោងវិនិយោគសាងសង់ស្ថានីយ៍វារីអគ្គិសនីសេសានក្រោម២ អនុភាព ៤០០មេហ្គាវ៉ាត់ ស្ថិតនៅស្រុកសេសាន ខេត្តស្ទឹងត្រែង និងអនុស្ថានីយ៍ព្រមទាំងបណ្តាញបញ្ជូនអគ្គិសនីពាក់ព័ន្ធ ត្រូវបានអនុវត្តដោយក្រុមហ៊ុន HYDRO POWER LOWER SESAN 2 Co., Ltd ដែលជាក្រុមហ៊ុនចំរុះ កើតឡើងដោយកិច្ចសហការរវាងក្រុមហ៊ុនក្នុងស្រុកជាមួយក្រុមហ៊ុនមកពីប្រទេសវៀតណាម និង ក្រុមហ៊ុនអគ្គិសនីដ៏ធំមកពីប្រទេសចិន ក្នុងទំហំទឹកប្រាក់វិនិយោគសរុប ៧៨១.៥២ លានដុល្លារ អាមេរិក ។ គម្រោងវិនិយោគសាងសង់ស្ថានីយ៍វារីអគ្គិសនីសេសានក្រោម២ ត្រូវបានសិក្សាតាំង ពីឆ្នាំ ២០០៤ មកម្ល៉េះ លើផលចំណេញផង និងផលប៉ះពាល់ខាងបរិស្ថានរូបសាស្ត្រ បរិស្ថាន ជីវសាស្ត្រ បរិស្ថានសង្គម និងបានដាក់ចេញនូវដំណោះស្រាយ ដោយធានាឲ្យបាននូវសុខដុមនីយកម្ម រវាងជីវភាពរស់នៅរបស់ប្រជាពលរដ្ឋដែលរងផលប៉ះពាល់ក៏ដូចជាការវិនិយោគសាងសង់ស្ថានីយ៍វារីអគ្គិសនីសេសានក្រោម២ ឲ្យដំណើរការបាន ដោយរលូនសម្រាប់បំពេញតម្រូវការអគ្គិសនីដែល កើនឡើងជាបន្តបន្ទាប់ក្នុងស្ថានភាពដែលព្រះរាជាណាចក្រកម្ពុជា ក្រោមការដឹកនាំរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាន់តែមាន ស្ថេរភាពខាងនយោបាយ និងសេដ្ឋកិច្ច ។ ក្នុងការវិនិយោគតាមរូបភាព BOT (សាងសង់ ដំណើរការ ផ្ទេរ) រយៈពេល ៤៥ឆ្នាំ ដែលក្នុងនោះរយៈពេល ៥ឆ្នាំសម្រាប់ធ្វើការសាងសង់ និងរយៈពេល ៤០ឆ្នាំ ធ្វើអាជីវកម្ម ផលប្រយោជន៍ដែលព្រះរាជាណាចក្រកម្ពុជាទទួលបានរួមមាន ៖
១-ទទួលបាននូវប្រភពអគ្គិសនីមួយដែលចេញពីធនធានធម្មជាតិក្នុងស្រុក កាត់បន្ថយការប្រើ ប្រាស់ប្រេង និងមានថ្លៃលក់ថេរក្នុងរយៈពេល ៤០ឆ្នាំ ដែលជួយធានានូវសន្តិសុខថាមពលធ្វើឲ្យ ព្រះរាជាណាចក្រកម្ពុជាមានលទ្ធភាពអភិវឌ្ឍន៍សេដ្ឋកិច្ច និងសង្គមកិច្ច បានឆាប់រហ័ស ជាពិសេស អាចផ្គត់ផ្គង់អគ្គិសនីដល់គ្រួសារប្រជាពលរដ្ឋតាមបណ្តោយបណ្តាញបញ្ជូន ភ្នំពេញ-កំពង់ចាម-ក្រចេះ-ស្ទឹងត្រែង
២-គម្រោងនឹងធ្វើការសាងសង់ផ្លូវថ្មីចូលទៅកាន់ទីតាំងគម្រោង ផ្លូវរវាងស្ពាន និងលូរំដោះទឹក នៅផ្នែកខាងកើតនៃទន្លេសេសាន ដើម្បីភ្ជាប់តំបន់តាំងទីលំនៅដ្ឋានថ្មីរបស់ភូមិស្រែគរ និងភូមិខ្សាច់ថ្មី
៣-គម្រោងក៏នឹងធ្វើការសាងសង់ផងដែរ នូវរាល់ហេដ្ឋារចនាសម្ព័ន្ធសាធារណៈរបស់ សហគមន៍ នៅតំបន់តាំងទីលំនៅថ្មី ដោយរាប់បញ្ចូលទាំងសាលារៀន វត្តអារាម ផ្លូវភូមិ អណ្តូងទឹក សហគមន៍ និងការសាងសង់ប្រព័ន្ធធារាសាស្ត្រថ្មីសម្រាប់ការប្រកបរបរកសិកម្មរបស់ប្រជាពលរដ្ឋ
៤-គម្រោងនឹងផ្តល់ការងារជូនពលករកម្ពុជារាប់ពាន់នាក់ ក្នុងកំឡុងពេលសាងសង់
៥-ការកែលំអហេដ្ឋារចនាសម្ព័ន្ធផ្លូវ លូរំដោះទឹក ស្ពាន និងហេដ្ឋារចនាសម្ព័ន្ធផ្សេងៗ ទៀតរបស់គម្រោងនឹងបង្កើតឲ្យមានគុណតម្លៃថែមទៀតដល់អេកូទេសចរណ៍នៅតំបន់នោះ
៦-គម្រោងនឹងបង្កើតប្រាក់ចំណូលដល់ប្រជាជនក្នុងតំបន់មូលដ្ឋាន ក្នុងខេត្ត និងថ្នាក់ជាតិ ដោយការផ្តល់ការងារយ៉ាងច្រើននៅពេលសាងសង់ និងប្រតិបត្តិការ ប្រជាជនមួយចំនួនក៏អាច បង្កើតប្រាក់ចំណូលពីមុខរបរជំនួញផ្ទាល់របស់ពួកគេដែលទាក់ទងនឹងសកម្មភាពគម្រោង ។
៧-លើមូលដ្ឋាននៃច្បាប់ស្តីពីសារពើពន្ធដែលមានជាធរមាន រាជរដ្ឋាភិបាលនឹងទទួលបាន ចំណូលពន្ធសរុបជាមធ្យមប្រមាណ ២៩.៥៩ លានដុល្លារអាមេរិក ក្នុង ១ឆ្នាំ នេះមិនទាន់គិតដល់ ពន្ធដទៃទៀតដែលអគ្គិសនីកម្ពុជា និងអ្នកចែកចាយអគ្គិសនីដទៃទៀតត្រូវបង់ជូនរដ្ឋក្នុងការចែក ចាយលក់បន្តឲ្យអ្នកប្រើប្រាស់ ។
២-បញ្ហាផ្សេងៗ
អង្គប្រជុំពេញអង្គគណៈរដ្ឋមន្ត្រី និងអាជ្ញាធររាជធានី ខេត្ត ព្រមទាំងកងកម្លាំងប្រដាប់អាវុធ ដែល ចូលរួមប្រជុំតាមប្រព័ន្ធវីដេអូខនហ្វឺរឹន (Video Conference) បានធ្វើការស្មឹងស្មាធ ១នាទី គោរព ព្រះវិញ្ញាណក្ខ័ន្ធព្រះបរមសពព្រះមហាវីរក្សត្រ ។
សម្តេចអគ្គមហាសេនាបតីតេជោ ហ៊ុន សែន ជាមួយនិងការសំដែងការសោកស្តាយ ចំពោះការទទួលមរណៈភាពរបស់យុវជនស្ម័គ្រចិត្តឈ្មោះ ច័ន្ទ មារឌី ដោយសារឧបទ្ទវហេតុខ្យល់ ព្យុះនៅស្រុកឆ្លូង ខេត្តក្រចេះ សម្តេចបានមានប្រសាសន៍តឿនរំលឹកសារជាថ្មីដល់ស្ថាប័នពាក់ព័ន្ធ ពិសេស អាជ្ញាធរដែនដីត្រូវបង្កើនការយកចិត្តទុកដាក់ដល់ជីវភាព សុវត្ថិភាព និងសុខទុក្ខ របស់ ក្រុមយុវជនស្ម័គ្រចិត្តឲ្យបានល្អ ពិសេសហាមឃាត់ដាច់ខាតមិនអនុញ្ញាតឲ្យចូលវាស់វែងដីនៅទី កន្លែងណាដែលសង្ស័យថា មានមីនឡើយ ។
សម្តេចតេជោនាយករដ្ឋមន្ត្រីបានណែនាំឲ្យក្រសួងកសិកម្ម រុក្ខាប្រមាញ់ និងនេសាទ សហការ ជាមួយអាជ្ញាធរខេត្តព្រៃវែងចុះពិនិត្យដោយកៀរគរយុវជននៅមូលដ្ឋានឲ្យចូលរួមក្នុងការកំចាត់ចោល សត្វខ្យងមួយប្រភេទដែលបាន បំផ្លាញសន្ទូងរបស់ប្រជាកសិករ ដោយយកតាមបទពិសោធន៍នា ពេលកន្លងមកដែលសម្តេចបានដាក់ចេញក្នុងការកំចាត់សត្វកណ្តុរ ដើម្បីកុំឲ្យការបំផ្លាញសន្ទូង រាលដាលដល់ស្រុកផ្សេង ឬខេត្តជិតខាង ។
បញ្ជាក់បន្ថែមលើគម្រោងអភិវឌ្ឍន៍ស្ថានីយ៍អគ្គិសនីសេសាន២ អនុភាពតម្លើង ៤០០ មេហ្គាវ៉ាត់ មានទីតាំងស្ថិតនៅឃុំភ្លុក ស្រុកសេសាន ខេត្តស្ទឹងត្រែង គឺក្នុងពេលដែលរាជរដ្ឋាភិបាលកំពុង រៀបចំលិខិតបទដ្ឋាន ដើម្បីផ្តល់ដល់ការវិនិយោគ សម្តេចអគ្គមហាសេនាបតីតេជោ ហ៊ុន សែន បានអនុញ្ញាតឲ្យអាជ្ញាធរខេត្តស្ទឹងត្រែង និងស្ថាប័នពាក់ព័ន្ធរៀបចំកំណត់ទីតាំង និងវាស់វែងដីធ្លី ទុកចែកជូនដល់ប្រជាពលរដ្ឋដែលរងការប៉ះពាល់ដោយក្នុង ១ គ្រួសារទទួលបានដី ៥ហិកតា ដើម្បី ឲ្យក្រុមហ៊ុនអាចជួយធ្វើការឈូសឆាយជូនប្រជាពលរដ្ឋសម្រាប់បង្កបង្កើនផល ។
ក្នុងនាមប្រមុខរាជរដ្ឋាភិបាលសម្តេចតេជោបានណែនាំឲ្យគណៈកម្មការអន្តរក្រសួង និង ក្រុមហ៊ុនត្រូវសង់ផ្ទះជូនប្រជាពលរដ្ឋក្នុងស្តង់ដារតែមួយ គឺស្តង់ដារសម្រាប់មនុស្ស ៨នាក់ រស់នៅ ឲ្យបានស្រេចទើបអនុញ្ញាតឲ្យប្រជាពលរដ្ឋផ្លាស់ប្តូរទីលំនៅ ដោយក្រុមហ៊ុនជាអ្នកចេញសោហ៊ុយ រុះរើ និងដឹកជញ្ជូន ។
សម្តេចតេជោនាយករដ្ឋមន្ត្រីបានណែនាំឲ្យក្រសួងឧស្សាហកម្ម រ៉ែ និងថាមពល ក្រសួង សាធារណការ និងដឹកជញ្ជូន ពិភាក្សាជាមួយក្រុមហ៊ុន ធ្វើការចាក់កៅស៊ូលើផ្លូវចម្ងាយជាង ២០គីឡូម៉ែត្រ ភ្ជាប់ពីផ្លូវជាតិទៅការដ្ឋាន ដើម្បីសម្រួលការដឹកជញ្ជូនរបស់ក្រុមហ៊ុនសម្រាប់ការ សាងសង់វារីអគ្គិសនី ក៏ដូចជាការធ្វើដំណើររបស់ប្រជាពលរដ្ឋផងដែរ ។
អង្គប្រជុំពេញអង្គគណៈរដ្ឋមន្ត្រី បានបិទសម័យប្រជុំនៅវេលាម៉ោង ១២:០០ ។
រាជធានីភ្នំពេញ, ថ្ងៃទី ០២ ខែ វិច្ឆិកា ឆ្នាំ ២០១២
.jpg)
