Khmer
English
Chinese
Frence
Vietnamese
Thai
ស្ថាបនាទទួលបានភាគទុនិកដ៏សំខាន់ថ្មី
ដោយ ៖ ថ្ងៃទី 03 វិច្ឆកា 2012ម៉ោង 09:48:17
ថ្ងៃទី០១ ខែវិច្ឆិកា ឆ្នាំ២០១២ ភ្នំពេញ កម្ពុជា ៖ ស្ថាបនា លីមីតធីត ជាស្ថាប័នមីក្រូហិរញ្ញវត្ថុឈានមុខគេមួយរបស់ប្រទេសកម្ពុជា មានក្ដីសោមនស្សក្នុងការប្រកាសអំពីការលក់ភាគហ៊ុនចំនួន ៩៥,១% អោយទៅ ម៉ារ៉ូហាន់ ធនាគារជប៉ុន ភីអ៊ិលស៊ី។ ការទិញភាគហ៊ុននេះ ធ្វើអោយម៉ារ៉ូហាន់ ធនាគារជប៉ុន ជាធនាគារពាណិជ្ជកម្ពុជាដំបូងគេបង្អស់ដែលធ្វើការវិនិយោគហ៊ុនផ្ទាល់ក្នុងស្ថាប័នមីក្រូហិរញ្ញវត្ថុ ហើយនេះក៏បង្ហាញអោយឃើញនូវជំហានដ៏សំខាន់ឆ្ពោះទៅទំលាយឧបសគ្គដែលខណ្ឌផ្តាច់រវាងធនាគារពាណិជ្ជ និងមីក្រូហិរញ្ញវត្ថុដែលកើតមានជាយូរមកហើយ។
ការសម្រេចចិត្តទិញយកភាគហ៊ុននេះគឺបានឆ្លងកាត់ការសិក្សា និងការវាយតម្លៃប្រកបដោយវិជ្ជាជីវៈហ្មត់ចត់ ទៅលើអាជីវកម្មមីក្រូហិរញ្ញវត្ថុដែលធ្វើដោយ ម៉ារ៉ូហាន់ ធនាគារជប៉ុន បានរកឃើញថា ស្ថាបនា លីមីតធីត ជាស្ថាប័នមីក្រូហិរញ្ញវត្ថុ (MFI) ដែលមានលក្ខណៈសម្បត្តិគ្រប់គ្រាន់ប្រកបដោយវិជា្ជជីវៈ ឆ្លើយតបនឹងតម្រូវការរបស់ក្រុមប្រឹក្សាភិបាល ម៉ារ៉ូហាន់ ធនាគារជប៉ុន ដែលទាមទារនូវស្ថាប័នដែលមានការគ្រប់គ្រងរឹងមាំ មានតម្លាភាពច្បាស់លាស់ កេរ្ដិ៍ឈ្មោះល្អ ប្រកបដោយវិជ្ជមាន និងទទួលបានការទុកចិត្ដពីសាធារណជន។
ការលក់ភាគហ៊ុនរបស់ ស្ថាបនា លីមីតធីត រួមមាន Nederlandse Financierings-Maatschappijvoor Ontwikkelingslanden N.V. (FMO),ធនាគារអភិវឌ្ឍអន្តរជាតិរបស់ប្រទេសហូឡង់, StichtingTriodos-Doen (ធនាគារ Triodos) អ្នកវិនិយោគសកលផ្នែកធនាគារមានមូលដ្ឋាននៅប្រទេសហូឡង់ Developing World Markets (DWM) ក្រុមហ៊ុនវិនិយោគមកពីសហរដ្ឋអាមេរិកឯកទេសខាងមីក្រូហិរញ្ញវត្ថុ និងវិស័យហិរញ្ញវត្ថុក្នុងទីផ្សារកំពុងរីកលូតលាស់, ក្រុមហ៊ុនវិនិយោគបុគ្គលិកស្ថាបនា លីមីតធីត (SEI)។ អង្គការស្ថាបនាសហគមន៍កម្ពុជា (CCB) ជាភាគទុនិក និងជាអ្នកបង្កើតក្រុមហ៊ុននេះ និងបន្តកាន់កាប់ភាគហ៊ុន ៤,៩% នៅក្នុងស្ថាបនា លីមីតធីត។
ហេតុផលចម្បងក្នុងការចាកចេញរបស់ភាគទុននិកបច្ចុប្បន្នគឺដោយសារការរីកចំរើនរបស់គ្រឹះស្ថានតាមរយៈ ការគាំទ្រ និងការវិនិយោគទុនរបស់ពួកគេរយៈពេល៦ឆ្នាំកន្លងមក ស្ថាបនាបានសម្រេចជោគជ័យនូវគោលដៅរបស់ខ្លួនក្នុងការបង្កើនលទ្ធភាពដល់ជនក្រីក្រអាចទទួលបានសេវាកម្មហិរញ្ញវត្ថុយ៉ាងទូលំទូលាយ និងមានប្រសិទ្ធិភាព រហូតដល់សហគមន៍ជនបទនានាក្នុងប្រទេសកម្ពុជា។ ដូចនេះ ក្នុងទស្សនៈជាអ្នកលក់ ឃើញថាស្ថាបនាបានឈានដល់កម្រិតពេញលក្ខណៈ គឺមានភាពរឹងមាំក្នុងការគ្រប់គ្រងអាជីវកម្មរបស់ខ្លួន រួមបញ្ចូលទាំងការដឹកនាំ ការគ្រប់គ្រងហានិភ័យ និងការប្រតិបត្ដិដែលនាំអោយស្ថាប័នហិរញ្ញវត្ថុឯកជននេះអនុវត្តស្របតាមចក្ខុវិស័យ មហិច្ឆិតាក្នុងការធ្វើអោយមានការរីកចម្រើនក្នុងប្រទេសកម្ពុជា និងធនធានហិរញ្ញវត្ថុសំខាន់ៗ ដែលត្រូវការសម្រាប់ការពង្រីកបន្ថែមដើម្បីទាក់ទាញការវិនិយោគធំៗ។
លោក Arno de Vette នាយកវិនិយោគទុនថ្នាក់ខ្ពស់ប្រចាំ FMO មានប្រសាសន៍ថា «អ្នកលក់មានជំនឿមុតមាំថា ម៉ារ៉ូហាន់ ធនាគារជប៉ុន តំណាងអោយជម្រើសអស្ចារ្យបំផុតទាក់ទងនឹងភាពដែលអាចដើរតួនាទីជាភាគទុនិកយុទ្ធសាស្ត្រនៅក្នុងស្ថាបនា ហើយម៉ារ៉ូហាន់មានធនធាន និងសមត្ថភាពធ្វើអោយស្ថាបនារីកចម្រើនយ៉ាងខ្លាំងប្រកបដោយស្ថិរភាព និងការទទួលខុសត្រូវ ខណៈដែលម៉ារ៉ូហាន់នៅតែប្រកាន់ខ្ជាប់នូវទស្សនៈ និងបេសកកម្មរបស់គ្រឹះស្ថាន។ ជាក់ស្តែងអ្នកទិញគឺជាធនាគារពាណិជ្ជដែលមានអាជ្ញាប័ណ្ណពេញលេញ មានវត្តមានក្នុងប្រទេសកម្ពុជាតាំងពីឆ្នាំ២០០៨ គឺជាគុណសម្បត្តិបន្ថែមដែលយើងខ្ញុំយល់ថាវាសំខាន់ក្នុងការជ្រើសរើសជាភាគទុននិកយុទ្ធសាស្ត្ររយៈពេលយូរអង្វែង។ យើងខ្ញុំបានបញ្ជាក់ពីការប្ដេជ្ញាចិត្ដរបស់យើង ក្នុងការបន្តគាំទ្រដល់ស្ថាបនាដោយរក្សាការផ្ដល់ប្រាក់កម្ចីបច្ចុប្បន្នរបស់យើងខ្ញុំដល់ក្រុមហ៊ុន។»
ស្ថាបនា លីមីតធីត និង ម៉ារ៉ូហាន់ ធនាគារជប៉ុន នឹងបន្តមុខងារជាអង្គភាពពីរផ្សេងគ្នា ដោយ ម៉ារ៉ូហាន់ ធនាគារជប៉ុន ផ្ដល់ផលិតផល និងសេវាកម្មធនាគារពាណិជ្ជ និង ស្ថាបនា លីមីតធីត បន្តផ្ដោតទៅលើមីក្រូហិរញ្ញវត្ថុរបស់ខ្លូន ការវិនិយោគទុននេះនឹងធ្វើអោយក្រុមហ៊ុនទាំងពីរ និងអតិថិជនរបស់ពួកគេទទួលបានផលប្រយោជន៍បន្ថែមដែលបានពីការចូលរួមនូវសមត្ថភាពសំខាន់ៗ ជំនាញ និងធនធាន ដែលនឹងនាំមកនូវសេវាកម្មហិរញ្ញវត្ថុកម្រិតស្តង់ដារអន្តរជាតិផ្តល់ជូនប្រជាពលរដ្ឋទូទាំងប្រទេស និងភ្ជាប់ទំនាក់ទំនងប្រទេសកម្ពុជាជាមួយទីផ្សារពិភពលោក។
លោកបណ្ឌិត ហាន់ ចាងវូ (Han Chang Woo) ជាប្រធានក្រុមប្រឹក្សាភិបាល ម៉ារ៉ូហាន់ ធនាគារជប៉ុន និងជាប្រធាននាយកប្រតិបត្តិនៃសាជីវកម្ម ម៉ារ៉ូហាន់ជប៉ុន មានប្រសាសន៍ថា «ម៉ារ៉ូហាន់ ធនាគារជប៉ុន បានបង្កើតឡើងដោយមានគោលបំណងគាំទ្រដល់ការរីកចម្រើន និងការអភិវឌ្ឍរបស់ប្រទេសកម្ពុជា ហើយពួកយើងបានទទួលស្គាល់ជាយូរមកហើយ ថាជាឧស្សាហកម្មហិរញ្ញវត្ថុ និងធនាគារដែលមានតួនាទីសំខាន់ក្នុងការបន្តការរីកចម្រើនរបស់ប្រទេសកម្ពុជា។ ក្នុងនាមជាធនាគារពាណិជ្ជ ម៉ារ៉ូហាន់ ធនាគារជប៉ុន បានរួមចំណែកក្នុងការអភិវឌ្ឍនេះដោយការផ្គត់ផ្គង់ផលិតផល និងសេវាកម្មជូនដល់អតិថិជនឯកជន ស្ថាប័នអាជីវកម្មធនតូច និងមធ្យម និងស្ថាប័នធនាគារ និងស្ថាប័នមីក្រូហិរញ្ញវត្ថុ។ យើងខ្ញុំបានមើលឃើញថា ស្ថាបនាជាក្រុមហ៊ុនឈានមុខដែលមានគំរូអាជីវកម្មរឹងមាំ និងថ្នាក់ដឹកនាំដែលមានជំនាញខ្ពស់។ ក្រុមការងារនេះសម្រេចបានការងារយ៉ាងច្រើនតាំងពីចាប់ផ្ដើមដំបូងជាអង្គការក្រៅរដ្ឋាភិបាលក្នុងឆ្នាំ១៩៩៥ និងបានកម្លាយខ្លួនជាក្រុមហ៊ុនឯកជននៅក្នុងឆ្នាំ២០០៣ព្រមទាំងទទួល បានជោគជ័យក្នុងអាជីវកម្មរបស់ខ្លួន។ យើងខ្ញុំជឿជាក់ថា ស្ថាបនាមានសក្ដានុពលក្នុងការផ្ដល់ឱកាសអោយប្រជាពលរដ្ឋកម្ពុជាទាំងឡាយណាដែលចង់រំដោះខ្លួនពីភាពក្រីក្រដើម្បីរួមចំណែកក្នុងការ អភិវឌ្ឍន៍ប្រទេសកម្ពុជានាពេលអនាគត។ ចំពោះយើងខ្ញុំផ្ទាល់ ដែលជាម៉ារ៉ូហាន់ ធនាគារជប៉ុន ភីអ៊ិលស៊ី ការទិញយកហ៊ុននេះគឺជាធាតុផ្សំដ៏សំខាន់ និងជាចំណុចចាប់ផ្ដើមនៃ ក្រុមហ៊ុន MARUHAN INVESTMENT ASIA PTE. LTD. មានការិយាល័យធំក្នុងប្រទេសសឹង្ហបុរី ដែលទើបនឹងបើកការសម្ពោធជាផ្នែកមួយនៃ MARUHAN Japan ASEAN Financial Group ដើម្បីពង្រឹងដល់ការងារត្រួសត្រាយផ្លូវដែលយើងបានចាប់ផ្តើមក្នុងប្រទេសកម្ពុជាអោយបន្តទៅក្នុងតំបន់អាស៊ានដ៏ទូលំទូលាយ។»
រចនាសម្ព័ន្ធនៃការគ្រប់គ្រងរបស់ ស្ថាបនា លីមីតធីត នឹងរក្សានៅដដែលទាំងអស់ ដោយលោកបណ្ឌិត ប៊ុន មុនី បន្តធ្វើជាប្រធាននាយកប្រតិបត្ដិ។ លោកបណ្ឌិត មានប្រសាសន៍ថា «យើងខ្ញុំមានក្ដីរំភើបចំពោះលទ្ធភាពនៃការវិនិយោគនេះបានផ្ដល់អោយពួកយើង និងពួកយើងមានមោទនភាពជាខ្លាំងដោយការខំប្រឹងប្រែងរបស់យើងក្នុងការចងស្ពានមេត្រីរវាងធនាគារពាណិជ្ជ និងមីក្រូហិរញ្ញវត្ថុក្នុងប្រទេសកម្ពុជាបានសម្រេចជោគជ័យ។ ការវិនិយោគដែល ម៉ារ៉ូហាន់ ធនាគារជប៉ុន នៅក្នុងស្ថាបនា នឹងជួយអោយពួកយើងសម្រេចគោលដៅហួសពីលទ្ធភាពផ្ទាល់របស់ពួកយើង។ ថ្នាក់ដឹកនាំ និងបុគ្គលិករបស់យើងរីករាយចំពោះការដែលមានអ្នកវិនិយោគថ្មី ដែលនឹងនាំមកនូវជំនាញថ្មី ការដឹកនាំ និងហិរញ្ញវត្ថុដែលនឹងបង្កើនសន្ទុះទៅមុខរបស់ក្រុមហ៊ុន ហើយពួកយើងបេ្ដជ្ញាចិត្តយ៉ាងមុតមាំ ក្នុងការគាំទ្រដល់ការរីកចម្រើនធានាបាននូវភាពឈានមុខគេ នៅក្នុងវិស័យមីក្រូហិរញ្ញវត្ថុ។ ការវិនិយោគនេះនឹងជួយពង្រឹងតួនាទីរបស់ពួកយើង ធ្វើអោយយើងកាន់តែសកម្មជាងមុនក្នុងការបង្កើនសំពៀតឥណទានរបស់យើង និងធ្វើអោយយើងអាចផ្ដល់សេវាកម្មហិរញ្ញវត្ថុយ៉ាងទូលំទូលាយបន្ថែមទៀតដែលសហគមន៍កម្ពុជាត្រូវការដើម្បីអភិវឌ្ឍន៍ខ្លួនឯងអោយបានគ្រប់គ្រាន់ ប្រកបដោយប្រសិទិ្ធភាព និងនិរន្តរភាព។ ការចូលរួមរបស់ ម៉ារ៉ូហាន់ ធនាគារជប៉ុន ក្នុងការការវិនិយោគនៅកម្រិតមូលដ្ឋាន គឺជាគ្រឹះសំខាន់បំផុតសម្រាប់ការអភិវឌ្ឍន៍សេដ្ឋកិច្ចរយៈពេលយូរអង្វែងរបស់ប្រទេសកម្ពុជា។»
ផលប្រយោជន៍សម្រាប់ប្រទេសកម្ពុជា និងពលរដ្ឋកម្ពុជាគឺមានភាពទូលំទូលាយ។ ម៉ារ៉ូហាន់ ធនាគារជប៉ុន នឹងបន្តផ្ដល់ផលិតផល និងសេវាកម្មធនាគារពាណិជ្ជស្តង់ដារអន្តរជាតិថ្មីៗ ចំណែកឯស្ថាបនានឹងបន្តផ្ដល់ផលិតផល និងសេវាកម្មល្អជាងគេបំផុតក្នុងវិស័យមីក្រូហិរញ្ញវត្ថុ។
Shorebank International (“SBI”) បានធ្វើជាអ្នកផ្ដល់យោបល់តែមួយគត់ជំនួសមុខអោយអ្នកលក់។ ដោយមានច្បាប់ HBS ធ្វើជាស្មាក្ដីស្របច្បាប់សម្រាប់អ្នកលក់។
ម៉ារ៉ូហាន់ ធនាគារជប៉ុន សូមថ្លែងអំណរគុណចំពោះក្លឹបមេធាវី Bun & Associates ដែលបានបំពេញនាទីជាទីប្រឹក្សាច្បាប់ប្រកបដោយវិជ្ជាជីវៈរបស់ពួកគេក្នុងអំឡុងពេលនៃដំណើរការនៃការវិនិយោគនេះ ៕
.jpg)
