Khmer
English
Chinese
Frence
Vietnamese
Thaiពាក់កណ្ដាលម៉ារ៉ាតុងឆ្នាំនេះអាចនឹងកើនដល់៦០០០នាក់
ដោយ ៖ យឺន ពន្លឺ|ថ្ងៃទី 10 វិច្ឆកា 2012 ម៉ោង 10:18:10
ភ្នំពេញ ៖ ដោយយោងតាមគណៈកម្មាធិការរៀបចំទិវារត់ប្រណាំងពាក់ កណ្ដាលម៉ារ៉ាតុងអន្ដរជាតិអង្គរ បានឱ្យដឹងថា អ្នកចុះឈ្មោះចូលរួមរត់ប្រណាំង ពាក់កណ្ដាលម៉ារ៉ាតុងនៅខេត្ដសៀមរាបនោះ មានចំនួន៤.៤២៥នាក់ហើយ ដោយនេះមិនទាន់រាប់បញ្ចូលនៅតាមសហ ព័ន្ធ និងអង្គភាពផ្សេងផងទេ ខណៈដែលព្រឹត្ដិការណ៍នេះនឹងធ្វើនៅថ្ងៃទី២ ខែធ្នូ ឆ្នាំ ២០១២ខាងមុខនេះ ។
លោក វ៉ាត់ ចំរើន អគ្គលេខាធិការ នៃគណៈកម្មាធិកាជាតិអួឡាំពិកកម្ពុជា ឱ្យដឹងថា តាមគម្រោងលោកចង់កំណត់ ត្រឹមតែ៥.៨០០នាក់ប៉ុណ្ណោះ តែខ្លះមិន ដាក់ពាក្យប្រកួតមុនទេ ទាល់តែដល់ថ្ងៃ ប្រកួតទើបមកដាក់ពាក្យ ហើយចូលរួម ប្រកួតតែម្ដង ។ យើងមិនអាចរារាំងគេ មិនឱ្យប្រកួតបានឡើយ ព្រោះពួកគេជា អ្នកទេសចរ ដែលខ្លះទើបនឹងមកដល់ កម្ពុជា ហើយគេចង់រត់ជាការកម្សាន្ដ សប្បាយប៉ុណ្ណោះ ។ លោកសង្កត់ធ្ងន់ថា ព្រឹត្ដិការណ៍នេះមិនស្រួលអាចមានអ្នកចូលរួមរត់ប្រណាំងដល់ទៅ៦០០០នាក់ជាងឯណោះ ។
ព្រឹត្ដិការណ៍នេះរៀបចំឡើងក្នុងគោលបំណងរកជំនួយឧបត្ថម្ភដល់កុមារកំព្រា និងជនពិការក្នុងប្រទេសកម្ពុជា និងដើម្បី ទាក់ទាញភ្ញៀវទេសចរឱ្យមកលេងប្រទេស កម្ពុជាឱ្យកាន់តែច្រើនថែមទៀតតាម រយៈការលេងកីឡានេះ ។ ព្រឹត្ដិការណ៍រត់ពាក់កណ្ដាលម៉ារ៉ាតុងនៅខេត្ដសៀមរាបឆ្នាំនេះក៏មានការរត់ចម្ងាយ១០គីឡូម៉ែត្រ ៥គីឡូម៉ែត្រ និង៣គីឡូម៉ែត្រ ជាលក្ខណៈគ្រួសារផងដែរ ។
សម្រាប់កម្ពុជាមកទល់ពេលនេះ មានព្រឹត្ដិការណ៍រត់ពាក់កណ្ដាលម៉ារ៉ា តុងចំនួន៣ហើយ គឺពាក់កណ្ដាលម៉ារ៉ា តុងអន្ដរជាតិខេត្ដសៀមរាប ពាក់កណ្ដាល ម៉ារ៉ាតុងខេត្ដព្រះសីហនុ និងពាក់កណ្ដាល ម៉ារ៉ាតុងភ្នំពេញ ។ លោក វ៉ាត់ ចំរើន កំពុងតែមានមហិច្ឆតាបង្កើតព្រឹត្ដិការណ៍ ពាក់កណ្ដាលម៉ារ៉ាតុងនៅភូមិភាគឦសាន មួយទៀត តែនៅមិនទាន់ដឹងថាពេល ណានោះទេ ។
គួររំលឹកផងដែរថា ព្រឹត្ដិការណ៍នេះ មានប្រវត្ដិ១៦ឆ្នាំមកហើយ គឺចាប់តាំង ពីឆ្នាំ១៩៩៦មក ដែលជាព្រឹត្ដិការណ៍ ប្រកួតអន្ដរជាតិមួយសម្រាប់រកជំនួយសប្បុរសធម៌ ។ កម្មវិធីនេះត្រូវបានរៀបចំ ឡើងក្នុងតំបន់កេរដំណែលវប្បធម៌ដ៏ល្បីល្បាញនៅក្នុងពិភពលោកដែលបានជ្រើស រើស និងទទួលស្គាល់ដោយអង្គការយូ ណេស្កូនៅឆ្នាំ១៩៩២ ៕
