Khmer
English
Chinese
Frence
Vietnamese
Thai
ទៅមើលការប្រកួតហែលទឹកបានឆ្នោតផ្សងសំណាង!
ដោយ ៖ យឺន ពន្លឺ ថ្ងៃទី 15 វិច្ឆកា 2012ម៉ោង 09:05:38
ភ្នំពេញ ៖ ព្រឹត្តិការណ៍ប្រកួតកីឡាហែលទឹកបានចាប់ផ្ដើមហើយ ដោយបានបើកការពីល្ងាចថ្ងៃទី១៤ វិច្ឆិកាកន្លង ទៅនេះ នៅឯពហុកីឡាដ្ឋានជាតិ ដោយការប្រកួតនេះសហព័ន្ធបានរៀបចំនូវកម្មវិធីពិសេស សម្រាប់អ្នក ដែលចូលមកទស្សនាការប្រកួតនេះដោយសេរី នឹងទទួលបានសន្លឹកឆ្នោត សម្រាប់ធ្វើការផ្សងសំណាងនៅថ្ងៃផ្ដាច់ព្រ័ត្រ ទី១៧ វិច្ឆិកា ចុងសប្ដាហ៍នេះ ។
អគ្គលេខាធិការសហព័ន្ធខ្មែរកីឡាហែលទឹកស្ម័គ្រចិត្ត លោក ហែម ថុន ឲ្យដឹងថា រៀងរាល់ថ្ងៃប្រកួត សហព័ន្ធនឹងចែកឆ្នោតផ្សងសំណាងឲ្យអ្នកចូលរួមទស្សនាបំពេញ ដើម្បីចាប់យករង្វាន់នៅថ្ងៃចុងក្រោយគឺវគ្គផ្ដាច់ព្រ័ត្រ ថ្ងៃទី១៧ វិច្ឆិកានេះ។ “យើងនឹងចែកម្នាក់ មួយសន្លឹករាល់ថ្ងៃ ចាប់ពីម៉ោង៣រសៀលទៅ ដើម្បីលើកទឹកចិត្តឲ្យមានអ្នកមើលកាន់តែច្រើន ទៅមួយថ្ងៃ បាន១សន្លឹក ទៅ២ថ្ងៃ បាន២សន្លឹក រង្វាន់មិនទាន់ប្រាប់ថា ជាអ្វីទេ តែខាងក្រុមហ៊ុន ខេ ស៊ី មេន បានត្រៀមអស់ហើយ។
ជើងឯកយុវជន ខេស៊ីមេន ឆ្នាំនេះមាន ១៤០នាក់ ក្នុងនោះមាន៣៦នាក់ជាកីឡាការិនី មកពីក្លិបហែលទឹកចំនួន១៣ក្លិប។ “មានទាំងជនពិការ កុមារ តូចៗអាយុ៩ឆ្នាំ១១ឆ្នាំ និងអ្នកហែលជំនាញដែរ ហើយក្នុងចំណោមនេះមានជាង៥០នាក់ ស្ថិតក្នុងកម្រិតអាយុយុវជនដែលសហព័ន្ធកំពុងត្រូវការពង្រឹងខ្លាំង” ។
ដោយឡែកសម្រាប់ការប្រកួតហែលទឹក យុវជនពានរង្វាន់ ខេស៊ីមែន ឆ្នាំ២០១២ ថ្ងៃដំបូងនេះបានចេញលទ្ធផលមកខ្លះៗហើយ ក្នុងនោះមានវិញ្ញាសារ ហែលរបៀបសេរីនារីអាយុក្រោម ១៦ឆ្នាំចំណាត់ថ្នាក់លេខ១ បានទៅកីឡាការិនី នេន សុម៉ាលី មជ្ឈមណ្ឌលជាតិហ្វឹកហ្វឺនកីឡាហែលក្នុងថិរវេលា៣៧វិនាទី០២ លេខ ២កីឡា ការិនីទេស លក្ខិណា ខេត្តកំពង់ចាមហែលក្នុងថិរវេលា៤១វិនាទី០៥ និង ចំណាត់ថ្នាក់លេខ៣កីឡាការិនី ឃិន ស្រីល័ក្ខណ៍វិទ្យាល័យជម្ពូរវ័ន្ដហែលក្នុងថិរវេលា៤២វិនាទី១៤ ។
វិញ្ញាសាហែល៥០ម៉ែត្ររបៀបសេរីកុមារាអាយុក្រោម១៤ឆ្នាំ ចំណាត់ថ្នាក់លេខ១ កុមារា ប៊ន កៅលាង មកពីខេត្តកំពង់ចាម ថិរវេលា៣៦វិនាទី៩៤, ចំណាត់ថ្នាក់លេខ២ កុមារា សាន វារៈ មកពីខេត្តកំពង់ចាម ថិរវេលា ៣៧ វិនាទី៩៥ និងលេខ៣ កុមារា ជា វណ្ណា មកពីក្លិបអង្គការមិត្តសម្លាញ់ ថិរវេលា៤៥វិនាទី១១ ៕
.jpg)
