Khmer
English
Chinese
Frence
Vietnamese
Thai
សេង កំសត់ ឡើងសងសឹក អ៊ុង ស៊ីណា នៅស្វៀនTV3ល្ងាចនេះ
ដោយ ៖ យឺន ពន្លឺ ថ្ងៃទី 16 វិច្ឆកា 2012ម៉ោង 10:41:11
ភ្នំពេញ ៖ សេង កំសត់ អ្នកប្រដាល់ក្លិបខេមរិន្ទមានឫទ្ធិ នឹងឡើងប្រកួតសងសឹក អ៊ុង ស៊ីណា អ្នកប្រដាល់ក្លិបបឹងទំពុន កីឡានៅសង្វៀនប៉ុស្តិ៍លេខ៣នាល្ងាចនេះ ខណៈកីឡាករទាំង២ធ្លាប់ជួបគ្នាពីរដងហើយ តែ កំសត់ បានត្រឹមស្មើ និងចាញ់តែប៉ុណ្ណោះ។
អ៊ុង ស៊ីណា ជាអ្នកប្រដាល់ស្រករក្រោយ សេង កំសត់ ទេ ប៉ុន្តែ អ៊ុង ស៊ីណា មានស្នៀតប្រដាល់ល្អទាំងកណ្តាប់ដៃ ទាំងស្នៀតជើង ហើយកម្លាំងស៊ុហ្វរបស់គេក៏ខ្លាំងរឹងមាំដែរ ។ ឯសេង កំសត់ វិញ ស្នៀតប្រដាល់របស់គេមិនអន់ទេ និងវ៉ៃកាចថែមទៀត ។ ប៉ុន្តែភាពខ្លាំងរបស់ កំសត់ បានតែមួយប្រាវប៉ុណ្ណោះ ព្រោះគេមានកម្លាំងស៊ុហ្វមិនគ្រប់គ្រាន់ ដោយសារវ័យរបស់គេរាងជ្រេបន្តិចទៅហើយ។ ទោះជាយ៉ាងណា ពីរបីទឹកដំបូង ស៊ីណា វ៉ៃខ្លាំងដូចព្យុះ តែលើសពីហ្នឹងទៅគេប៉ក់ល្វើយហើយដោយសារអស់ស៊ុហ្វ ។
អ៊ុង ស៊ីណា ប្រកួតចុងក្រោយនេះ គេវាយស្មើជាមួយ ឈាន រស្មី អ្នកប្រដាល់ក្លិបប្រដាល់ខេត្តរតនគិរី។ សេង កំសត់ មិនដឹងថាអាចសងសឹក អ៊ុង ស៊ីណា បានសំរេចឬអត់ទេ ? ព្រោះថា កំសត់ មានចិត្តប្រដាល់តូច មិនសូវហ៊ានប្តូរឡើយ ។
ឱម សំរេច អ្នកប្រដាល់ក្លិបកងពលតូចឆ័ត្រយោង៩១១ នឹងឡើងសាកកណ្តាប់ដៃជាមួយរិន មុន្នី អ្នកប្រដាល់ក្លិបកងទ័ពជើងគោក ។ អ្នកប្រដាល់ទាំងពីរនាក់នេះ ពុំធ្លាប់ដែលជួបគ្នាទេពីមុនមក។ ឱម សំរេច ជាអ្នកប្រដាល់ស្រករក្រោយ ក្បាច់គុនល្អគួរសម តែទាស់ត្រង់វ៉ៃរាងឆេវឆាវបន្តិច ធ្វើអោយការប្រកួតភាគច្រើនទទួលបរាជ័យ ។ អ្នកប្រដាល់រូបនេះ ប្រកួតចាញ់៥ប្រកួតជាប់ៗគ្នាដែលចុងក្រោយគេវ៉ៃចាញ់ភីរម្យ ភក្តី អ្នកប្រដាល់ក្លិបរការខ្នុរគុនខ្មែរដោយពិន្ទុ។ សំរេច តាមមើលប្រហែលជាមិនអាចឈ្នះរិន មុន្នីបានឡើយ ។
រិន មុន្នី ជាអ្នកប្រដាល់ជើងចាស់ដែលពីមុនមានឈ្មោះថា នួន មុន្នី។ ក្រោយពីបាត់មុខមួយរយះយូរមក គេបានវិលមកសង្វៀនវិញ ដោយដូរឈ្មោះ ដូរក្លិបហើយចុងក្រោយមកក្លិបដើមវិញដដែល ។ អ្នកណាប្រកួតជាមួយ មុន្នី គឺពិបាកហើយ ព្រោះអ្នកប្រដាល់រូបនេះ វ៉ៃមិនហ្នឹងមួយកន្លែងនោះទេ គឺរត់ពេញរេញ ឆាកចុះឆាកឡើងឆ្វេងស្តាំ ធ្វើឲ្យគូប្រកួតវិល ហើយទីបំផុត មុន្នី គេឆ្មក់វ៉ៃមួយដៃៗ យកពិន្ទុ។ តាំងពីវិលមកសង្វៀនវិញ គេប្រកួតឈ្នះរហូត ដែលការប្រកួតចុងក្រោយនេះ មុន្នី វាយឈ្នះ ឆាយ មាស អ្នកប្រដាល់ក្លិបតេជៈរាជសីហ៍ខេត្តក្រចេះដោយពិន្ទុ។ ចាំមើលថា ឱម សំរេច អាចយកឈ្នះអ្នកប្រដាល់ រិន មុន្នី ដែលជាជើងខ្លាំងប្រចាំសង្វៀនបានដែរឬទេ? ៕
.jpg)
