Khmer
English
Chinese
Frence
Vietnamese
Thai
គណបក្សសមរង្ស៊ីមិនពាក់ព័ន្ធបណ្ដឹងសួងសុភ័ណ្ឌស្របពេលដែលតុលាការកោះហៅថ្ងៃ៧ធ្នូ
ដោយ ៖ ហេង សូរិយា ថ្ងៃទី 06 ធ្នូ 2012ម៉ោង 08:30:17
ភ្នំពេញ ៖ ក្នុងពេលដែលសាលាដំបូងរាជធានីភ្នំពេញកោះហៅតំណាង យុវជនគណបក្សសម រង្ស៊ី ឱ្យចូលខ្លួន ទៅបំភ្លឺក្នុងនាមដើមបណ្ដឹងប្រឆាំង សម្ដេចនាយករដ្ឋមន្ដ្រី ហ៊ុន សែន នៅ ថ្ងៃទី៧ ខែ ធ្នូនោះ មន្ដ្រីជាន់ខ្ពស់គណបក្សសម រង្ស៊ី អះអាងថា បណ្ដឹងរបស់លោក សួង សុភ័ណ្ឌ មិនជាប់ពាក់ព័ន្ធជាមួយនឹង គណបក្សសម រង្ស៊ី ឬគណបក្សសម រង្ស៊ី ជាអ្នកផ្ដួចផ្ដើមគំនិតឱ្យមានពាក្យប្ដឹង ផ្ដល់នោះឡើយ។
ព្រះរាជអាជ្ញាសាលាដំបូងរាជធានីភ្នំពេញបានបំពេញនីតិវិធីចាត់ការលើ បណ្ដឹងរបស់យុវជននៃគណបក្ស សម រង្ស៊ី ដែលប្ដឹងសម្ដេចតេជោនាយករដ្ឋមន្ដ្រី ហ៊ុន សែន ទាក់ទងទៅនឹង ព្រឹត្ដិការណ៍ជាន់គ្នានៅលើស្ពានកោះពេជ្រ នោះហើយ។
ព្រះរាជអាជ្ញារងអមសាលាដំបូងរាជធានីភ្នំពេញ លោក សុខ រឿន បានចេញ ដីកាកោះហៅសកម្មជនគណបក្ស សម រង្ស៊ី ឱ្យចូលខ្លួនទៅបំភ្លឺ នៅម៉ោង៨កន្លះ ព្រឹកថ្ងៃទី៧ធ្នូ និងបង្ហាញភស្ដុតាងលើ ពាក្យប្ដឹងសម្ដេចតេជោនាយករដ្ឋមន្ដ្រី ហ៊ុន សែន។
លោក សួង សុភ័ណ្ឌ ប្រធានយុវជន គណបក្ស សម រង្ស៊ី បានដាក់ពាក្យប្ដឹង សម្ដេចតេជោនាយករដ្ឋមន្ដ្រី ហ៊ុន សែន ពីបទឃាតកម្មគិតទុកជាមុន លើករណី ជាន់គ្នាស្លាប់នៅលើស្ពានកោះពេជ្រ នៅ ថ្ងៃបញ្ចប់នៃព្រះរាជពិធីបុណ្យអុំទូក កាល ពីថ្ងៃទី២២ ខែវិច្ឆិកា ឆ្នាំ២០១០។
ប្រធានសម្ព័ន្ធកុលបុត្រខ្មែរ និងជា ប្រធានយុវជននៃគណបក្ស សម រង្ស៊ី លោក សួង សុភ័ណ្ឌ បានថ្លែងថា លោក នឹងចូលខ្លួនទៅបំភ្លឺតាមការកោះអញ្ជើញ និងមានភស្ដុតាងមួយចំនួនដែលនឹង ត្រៀមយកទៅបង្ហាញតុលាការ។
កាលពីថ្ងៃទី៣០ ខែវិច្ឆិកា ឆ្នាំ២០១២ សកម្មជនគណបក្ស សម រង្ស៊ី រូបនេះ បានដាក់ពាក្យប្ដឹងសម្ដេចតេជោនាយករដ្ឋមន្ដ្រី ហ៊ុន សែន និងមន្ដ្រីជាន់ខ្ពស់ មួយចំនួនទៀត ពីបទឃាតកម្មគិតទុក ជាមុន ពាក់ព័ន្ធករណីជាន់គ្នាស្លាប់ និង របួសនៅលើស្ពានកោះពេជ្រ។
យ៉ាងណាក៏ដោយកាលពីថ្ងៃទី២ ខែធ្នូ សម្ដេចតេជោនាយករដ្ឋមន្ដ្រីហ៊ុន សែន បានព្រមានជាសាធារណៈថា លោកនឹង ប្រើសិទ្ធិជាពលរដ្ឋខ្មែរមួយរូបប្ដឹងបកទៅសកម្មជនគណបក្ស សម រង្ស៊ី នោះវិញ ដើម្បីការពារកិត្ដិយស និងសេចក្ដីថ្លៃថ្នូរ របស់លោកផ្ទាល់ផង និងការពារកិត្ដិ យសសេចក្ដីថ្លៃថ្នូររបស់រដ្ឋាភិបាលផង។
សម្ដេចតេជោនាយករដ្ឋមន្ដ្រីបញ្ជាក់ ថា ប្រសិនបើតុលាការរកមិនឃើញ ពិរុទ្ធភាពណាមួយថា សម្ដេចជាប់ពាក់ ព័ន្ធនឹងករណីមនុស្សឃាតគិតទុកជាមុនទេនោះ សម្ដេចនឹងប្ដឹងបកទៅប្រធាន ក្រុមយុវជនគណបក្សប្រឆាំង ហើយ ពេលនោះកុំមានពាក្យថា សម្ដេចគាប សង្កត់ខាងផ្នែកនយោបាយ។ សម្ដេចតេជោ ហ៊ុន សែន បានមាន ប្រសាសន៍ថា “ខ្ញុំសុំសិទ្ធិប្ដឹងបក នេះជា សិទ្ធិស្របច្បាប់របស់ពលរដ្ឋ ហើយកុំថា នេះជាការគំរាមកំហែងខាងនយោបាយ។ សិទ្ធិនយោបាយត្រូវបានបង្ហាញយ៉ាង ច្បាស់នៅពេលនេះថា ពលរដ្ឋកម្ពុជា មានសិទ្ធិប្ដឹងនាយករដ្ឋមន្ដ្រី ហើយ អ៊ីនចឹងអស់លោកនៅក្រៅប្រទេសក្នុង ប្រទេសពិនិត្យមើលទៅសិទ្ធិអីទៀត បើផ្ដាច់ការមែនមិនចាំបាច់ឱ្យទៅដល់តុលាការ ប៉ុល ពត ដែលឱ្យប្ដឹងអ៊ី្ចឹង? ប៉ុលពតគ្រាន់តែរអ៊ូថា ស៊ីមិនគ្រប់ គ្រាន់ក៏យកទៅវ៉ៃចោលដែរ។ ខ្ញុំមិន និយាយច្រើនទេ កុំឱ្យថាជះឥទ្ធិពលទៅ តុលាការទុកឱ្យតុលាការរកទៅ ប៉ុន្ដែ គ្រាន់តែបង្ហាញថា យុវជនជាន់នេះមាន សិទ្ធិគ្រប់បែបយ៉ាងទាំងអស់ រាប់ទាំង សិទ្ធិប្ដឹងនាយករដ្ឋមន្ដ្រីទៅតុលាការ”។
បើតាមប្រធានអង្គការក្រុមអ្នកច្បាប់ ការពារសិទ្ធិកម្ពុជា លោកមេធាវី សុក សំអឿន មានទស្សនៈថា បទចោទដែល ប្ដឹងសម្ដេចនាយករដ្ឋមន្ដ្រី ហ៊ុន សែន ពីបទឃាតកម្មគិតទុកជាមុននេះ ហាក់ ជាការប្ដឹងបែបនយោបាយ គឺមិនត្រឹម ត្រូវ និងមិនឆ្លើយតបទៅនឹងផ្លូវច្បាប់ នោះទេ។
លោក សុន ឆ័យ មន្ដ្រីជាន់ខ្ពស់ និង ជាអ្នកតំណាងរាស្ដ្រគណបក្សសម រង្ស៊ី បានអះអាងថា បណ្ដឹងរបស់ប្រធានយុវ ជនគណបក្សសម រង្ស៊ី មិនជាប់ពាក់ព័ន្ធ ជាមួយគណបក្សសម រង្ស៊ី នោះឡើយ ។ លោកអះអាងថា បណ្ដឹងរបស់យុវជន សួង សុភ័ណ្ឌ គឺជារឿងបុគ្គល មិនពាក់ ព័ន្ធនឹងការណែនាំរបស់គណបក្សសម រង្ស៊ី នោះទេ។ លោកសុន ឆ័យ ថ្លែងថា “មានការចោទប្រកាន់ថា ប្រហែលជា រឿងនយោបាយរបស់គណបក្ស សម រង្ស៊ី, តុលាការអាចសិក្សាមើលទៅបើថា មិន ត្រឹមត្រូវ ដល់តែថា គាត់ប្ដឹងបកវិញ យើងស្រេចបាត់ទៅហើយ ហើយបើគាត់ ប្ដឹងតបវិញនោះ សួង សុភ័ណ្ឌ នេះ វាសនាប្រហែលជាធ្ងន់ធ្ងរជាងមូរ សុខ ហួរទៅទៀត”។
ទាំងអ្នកច្បាប់ ទាំងអ្នកវិភាគនយោបាយ និងមន្ដ្រីគណបក្សសម រង្ស៊ីនោះ ផងយល់ថា បណ្ដឹងរបស់ប្រធានយុវជន គណបក្សសម រង្ស៊ី មានចរិតនយោបាយ និងកេងចំណេញមុនការបោះឆ្នោតឆ្នាំ២០១៣ខាងមុខ ៕
.jpg)
