Khmer
English
Chinese
Frence
Vietnamese
Thai
រាជរដ្ឋាភិបាលសម្រេចប្រមូលចំណូលបាន៧៥,៣%ក្នុងត្រីមាសទី៣ឆ្នាំ២០១២
ដោយ ៖ សាគុណ ថ្ងៃទី 14 ធ្នូ 2012ម៉ោង 09:04:05
ភ្នំពេញ ៖ តាមសេចក្តីប្រកាសព័ត៌មានក្រោយកិច្ចប្រជុំ ក្រុមការងារបច្ចេកទេសកែទម្រង់ ការគ្រប់គ្រងហិរញ្ញវត្ថុសាធារណៈ ក្រោមអធិបតី លោកឧប នាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការគោលនយោបាយ សេដ្ឋកិច្ច និងហិរញ្ញវត្ថុ ដោយមានការចូលរួមពីថ្នាក់ដឹកនាំនិងមន្ត្រីរាជការនៃក្រសួងសេដ្ឋ កិច្ចនិងហិរញ្ញវត្ថុ និងតំណាងក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈទាំង ៣៨ក្រសួង ស្ថាប័ន ព្រមទាំងតំណាងដៃគូអភិវឌ្ឍន៍ ទីប្រឹក្សាបច្ចេកទេស និងមន្ត្រីជំនាញ ជាច្រើនរូប កាលពីព្រឹកថ្ងៃទី១៣ ខែធ្នូនេះ បានឲ្យដឹងថា ក្នុងត្រីមាសទី៣ ឆ្នាំ២០១២ រាជរដ្ឋាភិបាលកម្ពុជាសម្រេចបានការប្រមូលចំណូលដល់ទៅ ៧៥,៣% ដែលមានភាព ប្រសើរជាងឆ្នាំកន្លងមក ហើយជាមួយគ្នានេះការចំណាយក៏ត្រូវបានគ្រប់គ្រងនិងអនុវត្ត បានប្រសើរផងដែរ ។
សេចក្តីប្រកាសព័ត៌មានបានឲ្យដឹងទៀតថា កិច្ចប្រជុំនេះបានដំណើរការតាមរបៀប វារៈរួមមានៈ ការពិនិត្យរបាយការណ៍វឌ្ឍនភាពប្រចាំត្រីមាសទី៣ ឆ្នាំ២០១២, ការធ្វើបច្ចុប្ប ន្នភាពនៃការដាក់ឲ្យអនុវត្តយុទ្ធសាស្ត្រគម្រោងការគ្រប់គ្រងហិរញ្ញវត្ថុសាធារណៈតាមប្រព័ន្ធព័ត៌មានវិទ្យា និងបញ្ហាផ្សេងៗ ។
តាមការពិនិត្យលើរបាយការណ៍វឌ្ឍនភាពនៃការងារកែទម្រង់ការគ្រប់គ្រងហិរញ្ញវត្ថុ សាធារណៈក្នុងត្រីមាសទី៣ ឆ្នាំ២០១២ យើងក៏ត្រៀមរៀបចំដាក់អនុវត្តយុទ្ធសាស្ត្រគម្រោង ការគ្រប់គ្រងហិរញ្ញវត្ថុសាធារណៈតាមប្រព័ន្ធព័ត៌មានវិទ្យា ដែលគ្រោងដាក់ដំណើរការនៅ ឆ្នាំ២០១៥ ខាងមុខនេះ ។ ទាំងភាគីរដ្ឋាភិបាលនិងដៃគូអភិវឌ្ឍន៍បានបង្ហាញនូវការយល់ ស្របគ្នា និងវាយតម្លៃខ្ពស់ចំពោះវឌ្ឍនភាពនៃការងារកែទម្រង់ការគ្រប់គ្រងហិរញ្ញវត្ថុ សាធារណៈដែលសម្រេចបាន ក្នុងនោះភាពជឿទុកចិត្តបាននៃថវិកាដែលជាស្នូលគ្រឹះនៃ ការគ្រប់គ្រងហិរញ្ញវត្ថុសាធារណៈនៅតែរក្សាបានផ្អែកតាមការពិនិត្យផ្ទៀងផ្ទាត់ជាមួយនឹង សូចនាកររបស់កម្មវិធីកែទម្រង់ ។
សកម្មភាពកែទម្រង់ដែលគាំទ្រដល់ការបង្កើនគណនេយ្យភាពហិរញ្ញវត្ថុ និងការគាំ ទ្រដល់គម្រោងគ្រប់គ្រងហិរញ្ញវត្ថុសាធារណៈតាមប្រព័ន្ធព័ត៌មានវិទ្យា បាននិងកំពុងអនុវត្ត ព្រមទាំងបានរៀបចំផែនការសកម្មភាពការងារដ៏ច្បាស់លាស់បង្កើតបានជាមូលដ្ឋានរឹងមាំ សម្រាប់ត្រៀមអនុវត្តគម្រោងផងដែរ ។
លោកឧបនាយករដ្ឋមន្ត្រី គាត ឈន់ បានវាយតម្លៃខ្ពស់ចំពោះភាពជាដៃគូរវាងរាជ រដ្ឋាភិបាលនិងដៃគូអភិវឌ្ឍន៍ដែលបានបំពេញការងារជាមួយគ្នាបានល្អប្រសើរ គាំទ្រកម្មវិធី កែទម្រង់ការគ្រប់គ្រងហិរញ្ញវត្ថុសាធារណៈ ព្រមទាំងបានស្វាគមន៍រាល់មតិយោបល់ក្នុង ស្មារតីស្ថាបនារបស់គ្រប់តួអង្គពាក់ព័ន្ធ និងថ្លែងអំណរគុណចំពោះដៃគូអភិវឌ្ឍន៍ ដែលបាន សម្តែងនូវឆន្ទៈច្បាស់លាស់ក្នុងការគាំទ្រកម្មវិធីកែទម្រង់និងផ្តល់ការគាំទ្របន្ថែមទៀតទាំង ផ្នែកបច្ចេកទេសនិងហិរញ្ញវត្ថុ ដើម្បីឲ្យកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ មានដំណើរការទៅមុខជាលំដាប់និងទទួលបានជោគជ័យជាផ្លែផ្កាសម្រេចបានគោលដៅ អភិវឌ្ឍន៍របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតវៃឈ្លាសរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕
.jpg)
