Khmer
English
Chinese
Frence
Vietnamese
Thai
សម្ដេចតេជោនាយករដ្ឋមន្ដ្រីបញ្ជាក់ថា គ្មាននរណាចាញ់ក្នុងនយោបាយឈ្នះ-ឈ្នះនោះទេ
ដោយ ៖ មរតក ថ្ងៃទី 03 មករា 2013ម៉ោង 17:15:04
ខេត្ដប៉ៃលិន ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានថ្លែងទៅកាន់ប្រជាពលរដ្ឋក្នុងខេត្ដប៉ៃលិនថា បើគ្មានថ្ងៃ ៧មករា ១៩៧៩ ក៏គ្មានកិច្ចព្រម ព្រៀងទីក្រុងប៉ារីស ហើយក៏គ្មានឆ្នួនផ្ទុះ សន្ដិភាពនៅប៉ៃលិននេះដែរ ខណៈគ្មានអ្នកណាម្នាក់ចាញ់ក្នុងល្បែងនយោបាយ ឈ្នះ-ឈ្នះនោះទេ ពីព្រោះថានយោបាយឈ្នះ-ឈ្នះបាននាំមកនូវសុខសន្ដិភាព ស្ថិរភាពនយោបាយ ការអភិវឌ្ឍលើគ្រប់វិស័យ ជាក់ស្ដែងនៅខេត្ដប៉ៃលិននេះតែម្ដង។
សម្ដេចតេជោថ្លែងបែបនេះ គឺនៅ ក្នុងឱកាសដែលសម្ដេចនិងលោកជំទាវ កិត្ដិព្រឹទ្ធបណ្ឌិតអញ្ជើញជាអធិបតីដ៏ខ្ពង់ខ្ពស់ ក្នុងពិធីសម្ពោធសមិទ្ធផលនានានៅខេត្ដ ប៉ៃលិននាថ្ងៃទី៣ ខែមករា ឆ្នាំ២០១៣។
សម្ដេចមានប្រសាសន៍ថា បើគ្មានថ្ងៃ៧ មករា ១៩៧៩ ក៏គ្មានមុខ អ៊ី ឈាន ដើម្បីធ្វើនយោបាយឈ្នះ=ឈ្នះ មាន សន្ដិភាព មានការអភិវឌ្ឍនៅទីនេះដែរ ហើយបើគ្មានការអភិវឌ្ឍ ក៏មិនអាចថែ រក្សាសន្ដិភាពបានយូរអង្វែងដែរ ។ ដូច្នេះ ចំណងទាក់ទងគ្នារវាងសន្ដិភាព នឹងការ អភិវឌ្ឍត្រូវតែដើរទន្ទឹមគ្នា ។ យើងបាន ដឹងហើយថា អ្វីដែលកើតឡើងលើទឹកដីដ៏ កម្សត់នេះ គឺបានយកអាយុជីវិតមក ប្រថុយជាថ្នូរនឹងសុខសន្ដិភាព ពោលគឺ យើងយកជីវិតមកធ្វើដើមទុនរំដោះប្រទេស ចេញពីរបបប៉ុលពត។
សម្ដេចតេជោបន្ដថា នៅពេលអនុវត្ដ នយោបាយឈ្នះ-ឈ្នះ គឺសម្ដេចបានមកផ្ទាល់ ពីព្រោះវាមិនមែនជារឿងធម្មតានោះទេ គឺត្រូវចារទុកជាប្រវត្ដិសាស្ដ្រនៅ ទីនេះ ពីព្រោះជាទីតាំងឆ្នួនផ្ទុះនៃសន្ដិភាព។ អ្នកប៉ៃលិនទាំងអស់គ្នាដឹងច្បាស់ជាងអ្នក ណាទាំងអស់ ហើយពេលនេះក៏ដឹងយ៉ាង ច្បាស់ដែរ តើខាតឬចំណេញនៅពេល ដែលយើងអនុវត្ដន៍នយោបាយឈ្នះ-ឈ្នះ បញ្ចប់នូវសង្គ្រាមដែលអ្នកជំនាន់មុន បានសាងឡើង ពោលគឺចាប់ផ្ដើមតាំងពី រដ្ឋប្រហារ១៨ មីនា ១៩៧០។
ពីមុនខេត្ដប៉ៃលិន សូម្បីតែអ៊ុនតាក់ ក៏មិនអាចចូលបានដែរ បើទោះបីជាចំណាយទឹកប្រាក់ប្រមាណ២ពាន់លានដុល្លារ ប៉ុន្ដែ ហ៊ុន សែន អាចចូលមក កន្លែងនេះបានហើយនាំមកនូវនយោបាយ ឈ្នះ-ឈ្នះ នាំមកនូវការចំណេញដល់ ប្រជាពលដ្ឋទាំងអស់ ជារួមគឺគ្មានអ្នកណា មួយចាញ់ក្នុងល្បែងនយោបាយឈ្នះៗនោះ ទេ។ អតីតកម្លាំងប្រដាប់អាវុធ ប្រជាជន គឺសុទ្ធតែទទួលបានផលពីសន្ដិភាពទាំង អស់ ហើយមិនមែនតែអ្នកប៉ៃលិននោះទេ និយាយជារួមគឺប្រជាជននៅទូទាំងប្រទេស ដែលទទួលបានផលពីឆ្នួនផ្ទុះសន្ដិភាពនៃ តំបន់ប៉ៃលិន និងម៉ាឡៃ។ ផ្ទុយទៅវិញ បើគ្មាននយោបាយឈ្នះ=ឈ្នះដាក់ចេញនៅ ប៉ៃលិនទេ សេចក្ដីសុខក៏គ្មានសម្រាប់អ្នក ប៉ៃលិន និងអ្នកនៅទូទាំងប្រទេសនោះដែរ។
ចំណុចនេះសម្ដេចបញ្ជាក់ថា បើគ្មាន ឆ្នួនផ្ទុះសន្ដិភាពនៅប៉ៃលិន គឺយើងទាំង អស់គ្នាជាប់កាតព្វកិច្ចយោធាដោយសារ តែបញ្ជូនភស្ដុភារ និងថវិកាមករ៉ាប់រង សង្គ្រាមនៅប៉ៃលិន។
លោក អ៊ី ឈាន អភិបាលនៃគណៈ អភិបាលខេត្ដប៉ៃលិន បានលើកឡើងនៅ ក្នុងឱកាសនោះថា ជារៀងរាល់ឆ្នាំយើង ទាំងអស់គ្នាតែងប្រារឰនូវទិវាបុណ្យរំលឹក គុណថ្ងៃ៧មករាមិនដែលខានឡើយ ហើយ តែងតែផ្ដាំកូនចៅឱ្យចងចាំថា ប្រជាជន កម្ពុជារស់សាជាថ្មីឡើងវិញ គឺដោយសារ គុណបុណ្យថ្ងៃ៧មករា ពោលគឺថ្ងៃនេះ បានរំដោះប្រជាជនខ្មែរឱ្យរួចផុតពីរបប ប្រល័យពូជសាសន៍ប៉ុលពតដ៏មហា ឃោរឃៅ។
លោកបន្ដថា វត្ដមានរបស់សម្ដេចតេជោ និងលោកជំទាវកិត្ដិព្រឹទ្ធបណ្ឌិត លើទឹកដីប៉ៃលិនពេលនេះ គឺពិតជាបាន ផ្ដល់កម្លាំងចិត្ដដ៏មហាធំធេង ផ្ដល់នូវ ថាមពល ជំនឿដ៏ខ្លាំងក្លាដល់ប្រជាពលរដ្ឋ បន្ថែមទៀតក្នុងការខិតខំប្រឹងប្រែងកសាង សេដ្ឋកិច្ច ជីវភាពគ្រួសារ និងចលនា សាមគ្គីគ្នា អភិវឌ្ឍន៍ខេត្ដ ឱ្យរីកចម្រើនលើ គ្រប់វិស័យ។
សមិទ្ធផលនានាដែលសម្ដេចតេជោ និងលោកជំទាវកិត្ដិព្រឹទ្ធបណ្ឌិតសម្ពោធ ក្នុងឱកាសនោះរួមមាន វិមានឯករាជ្យ, ផ្លូវភ្លោះលេខ៥៧, ព្រះពុទ្ធរូបផ្ចាញ់មារ, រូបសំណាកលោកយាយយ៉ាត, ហ្លួងព្រះ ស្ដេចកន សួនច្បារហាត់ប្រាណ, រូបសំណាក សេះ៨, ស្ពានថ្មរបស់សម្ដេចតេជោ, អគារមន្ទីរពេទ្យបង្អែក២ជាន់, អគារវិទ្យាល័យទេពនិមិត្ដហ៊ុនសែន២ជាន់, អគារបញ្ជាការវរកងការពារព្រំដែន និងអគារស្នាក់នៅរបស់វរការពារព្រំដែន ៥០៤ស្រែម្អមប៉ៃលិន៥ខ្នង៕
.jpg)
