Khmer
English
Chinese
Frence
Vietnamese
Thaiសេចក្តីប្រកាសព័ត៌មានស្តីពីលទ្ធផលប្រជុំនៃសម័យប្រជុំពេញអង្គគណៈរដ្ឋមន្ត្រី(ថ្ងៃទី ០៤ ខែ មករា ឆ្នាំ ២០១២)
ដោយ ៖ |ថ្ងៃទី 04 មករា 2013 ម៉ោង 14:43:23
ភ្នំពេញ ៖ ថ្ងៃទី០៤ ខែមករា ឆ្នាំ២០១៣ វេលាម៉ោង៨និង៣០នាទី នៅវិមានសន្តិភាព មានបើកអង្គប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី ៤ ដើម្បីឆ្លង ៖
១-សេចក្តីព្រាងច្បាប់ ស្តីពីវិសោធនកម្មមាត្រា ៩ និងមាត្រា ១០ នៃច្បាប់ស្តីពី សហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា ។
២-សេចក្តីព្រាងព្រះរាជក្រឹត្យ ស្តីពីការផ្តល់ឋានៈសាស្ត្រាចារ្យ ។
៣-សេចក្តីព្រាងអនុក្រឹត្យ ស្តីពីក្រមសីលធម៌ឆ្មប ។
៤-បញ្ហាផ្សេងៗ
ក្រោយពីបានស្តាប់របាយការណ៍ និងមតិពិភាក្សាផ្លាស់ប្តូរយោបល់រួចមក កិច្ចប្រជុំពេញ អង្គគណៈរដ្ឋមន្ត្រីបានសម្រេចអនុម័តនូវ ៖
១- សេចក្តីព្រាងច្បាប់ ស្តីពីវិសោធនកម្មមាត្រា ៩ និងមាត្រា ១០ នៃច្បាប់ស្តីពីសហ លក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា
សេចក្តីស្នើសុំធ្វើវិសោធនកម្មមាត្រា ៩ និងមាត្រា ១០ នៃច្បាប់ស្តីពីសហលក្ខន្តិកៈមន្ត្រី រាជការស៊ីវិលនៃព្រះរាជាណាចក្រកម្ពុជា ត្រូវបានរៀបចំឡើងដោយរដ្ឋលេខាធិការដ្ឋានមុខងារ សាធារណៈ ក្នុងគោលបំណង ៖
-ចង់ឲ្យច្បាប់ពាក់ព័ន្ធនឹងការគ្រប់គ្រងមន្ត្រីរាជការស៊ីវិល មានភាពរលូនជាមួយច្បាប់ ពាក់ព័ន្ធនឹងការគ្រប់គ្រងមន្ត្រីក្រុមនីតិបញ្ញត្តិ ។
-ចង់រក្សាលក្ខណៈត្រឹមត្រូវនៃលិខិតបទដ្ឋានគតិយុត្តមួយចំនួនពាក់ព័ន្ធនឹងការគ្រប់គ្រង មន្ត្រីរាជការស៊ីវិលដែលមានស្រាប់ ហើយដែលបានចែងឡើងក្នុងគោលដៅអនុវត្តខ្លឹមសារនៃ មាត្រាដែលត្រូវស្នើសុំធ្វើវិសោធនកម្មនេះ ។
-បើកផ្លូវដល់ការកសាង និងកែសម្រួលលិខិតបទដ្ឋានគតិយុត្តមួយចំនួនទៀត ដែល ពាក់ព័ន្ធនឹងខ្លឹមសារនៃមាត្រាដែលត្រូវស្នើសុំធ្វើវិសោធនកម្មនេះផងដែរ ។
២-សេចក្តីព្រាងព្រះរាជក្រឹត្យ ស្តីពីការផ្តល់ឋានៈសាស្ត្រាចារ្យ ៖
អនុលោមតាមស្មារតីច្បាប់ស្តីពីការអប់រំ ដែលត្រូវបានប្រកាសឲ្យប្រើតាមព្រះរាជក្រម លេខ នស/រកម/១២០៧/០៣២ ចុះថ្ងៃទី ០៨ ខែ ធ្នូ ឆ្នាំ ២០០៧ ក្រសួងអប់រំ យុវជន និងកីឡា បានរៀបចំសេចក្តីព្រាងព្រះរាជក្រឹត្យ ស្តីពីការផ្តល់ឋានៈសាស្ត្រាចារ្យ មានគោលបំណងលើក កម្ពស់គុណវុឌ្ឍិរបស់គ្រួបង្រៀន ដើម្បីរួមចំណែក អភិវឌ្ឍការបណ្តុះបណ្តាលធនធានមនុស្ស នៅតាមគ្រឹះស្ថានឧត្តមសិក្សាឲ្យមានគុណភាពខ្ពស់ ក៏ដូចជាមានគោលដៅ រៀបចំនីតិវិធី និង យន្តការសម្រាប់ការប្រឡងជ្រើសរើសសាស្ត្រាចារ្យ និងកំណត់លក្ខខណ្ឌរបស់បេក្ខជនដែល អាចប្រឡងជ្រើសរើសជាសាស្ត្រាចារ្យផងដែរ ។
សេចក្តីព្រាងព្រះរាជក្រឹត្យ ស្តីពីការផ្តល់ឋានៈសាស្ត្រាចារ្យ មានចំនួន ០៦ជំពូក និង ២៧ មាត្រា មានវិសាលភាពអនុវត្តចំពោះគ្រូបង្រៀននៅតាមគ្រឹះស្ថានឧត្តមសិក្សា ដែលមាន បំណងទទួលឋានៈជាសាស្ត្រាចារ្យជំនួយ សាស្ត្រាចារ្យរង និងសាស្ត្រាចារ្យ/សាស្ត្រាចារ្យមហា បរិញ្ញាដែលស្ថិតក្រោមការគ្រប់គ្រងរបស់ក្រសួងស្ថានប័ននានារបស់រដ្ឋលើកលែងតែវិស័យ យោធា-សន្តិសុខ និងវិស័យសាសនា ។
៣- សេចក្តីព្រាងអនុក្រឹត្យ ស្តីពីក្រមសីលធម៌ឆ្មប ៖
រាជរដ្ឋាភិបាលបានខិតខំយកចិត្តទុកដាក់លើកកំពស់ការការពារ និងថែទាំសុខភាព ជូនប្រជាពលរដ្ឋទាំងនៅជនបទដាច់ស្រយាល និងទីប្រជុំជន ។ ទន្ទឹមនឹងការរីកចំរើននៃ ហេដ្ឋារចនាសម្ព័ន្ធ និងបុគ្គលិក សុខាភិបាល ចំនួនឆ្មបក៏បានកើនឡើង ព្រមទាំងមានគណៈ វិជ្ជាជីវៈគ្រប់ជំនាញផងនោះ ស្ថានភាពសុខភាពរបស់ប្រជាជនកម្ពុជាត្រូវបានប្រសើរឡើង និង លើកកម្ពស់ជាបន្តបន្ទាប់ ជាពិសេសសុខភាពមាតា ទារក និងកុមារ ។ មកដល់ពេលនេះ ឆ្មបក្នុងក្របខណ្ឌរដ្ឋនៃក្រសួង សុខាភិបាល កំរិតមធ្យមមានចំនួន ២៤២៥នាក់ និងបឋមចំនួន ២១៦៥នាក់ គិតត្រឹមខែ វិច្ឆិកា ឆ្នាំ ២០១២ ។ យោងតាមតួលេខដែលបានមកពីការអង្កេត សុខភាព និងប្រជាសាស្ត្រនៅកម្ពុជា អត្រានៃការពិនិត្យថែទាំស្ត្រីក្នុងពេលមានគភ៌បានកើន ឡើងជាបន្តបន្ទាប់ ក្នុងនោះអត្រានៃការ ពិនិត្យលើកទីមួយបានកើនពី ៣៨% នៅឆ្នាំ ២០០០ ដល់ ៨៩% នៅឆ្នាំ ២០១០ ។ អត្រានៃការ ពិនិត្យលើកទី ២ កើនពី ២២% នៅឆ្នាំ ២០០០ ដល់ ៨៤% នៅឆ្នាំ ២០១០ ។ អត្រានៃការពិនិត្យ ថែទាំក្រោយសម្រាលកូនរួចក៏មានការកើនឡើង ផងដែរ ក្នុងនោះការពិនិត្យពីរដងមុនសម្រាល បានកើនឡើងដល់ ៨០% នៅឆ្នាំ ២០១០ ដល់ ៨៦% នៅឆ្នាំ ២០១១ ។ ការអប់រំដល់ស្ត្រី និងគ្រួសារ និងការកែលំអស្ថានភាពផ្តល់សេវា សង្គ្រោះបន្ទាន់ផ្នែកសម្ពព និងការថែទាំទារកទើប នឹងកើតបាននឹងកំពុងបន្តធ្វើជាប្រចាំ ។ អត្រា មរណភាពមាតាបានថយចុះពី ៤៧២ ក្នុងចំណោម កំណើតរស់ ១០០ពាន់នាក់ នៅឆ្នាំ ២០០៥ មកនៅ ២០៦ ក្នុងចំណោមកំណើតរស់ ១០០ពាន់នាក់ នៅឆ្នាំ ២០១០ ។ ឯអត្រាមរណភាព ទារកអាយុក្រោម ១ឆ្នាំ បានថយចុះពី ៩៥ ក្នុងចំណោម កំណើតរស់ ១០០០នាក់ នៅក្នុងឆ្នាំ ២០០០ មកនៅ ៤៥ ក្នុងចំណោមកំណើតរស់ ១០០០នាក់ ក្នុងឆ្នាំ ២០១០ ។
ដើម្បីគ្រប់គ្រងអ្នកប្រកបវិជ្ជាជីវៈសុខាភិបាល និងពង្រឹងការអនុវត្តក្រមសីលធម៌ នៅ ក្រោមការឧបត្ថម្ភ គាំទ្រដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី និងការយកចិត្តទុកដាក់ ពីលោកជំទាវកត្តិព្រឹទ្ធបណ្ឌិត ប៊ុន រ៉ានី ហ៊ុន សែន គណៈឆ្មបកម្ពុជាក៏បានបង្កើតឡើងតាម ព្រះរាជក្រឹត្យលេខ នស/រកត/០៩០៦/៣៨៩ ចុះថ្ងៃទី ១៨ ខែ កញ្ញា ឆ្នាំ ២០០៦ ។
អនុវត្តតាមស្មារតីនៃព្រះរាជក្រឹត្យ ស្តីពីការបង្កើតគណៈឆ្មបកម្ពុជានេះ ក្រុមការងាររបស់ ក្រសួងសុខាភិបាល និងគណៈឆ្មបកម្ពុជា បានសហការគ្នារៀបចំសេចក្តីព្រាងក្រមសីលធម៌ឆ្មប ដែលមានគោលបំណងលើកកម្ពស់សីលធម៌ សេចក្តីថ្លៃថ្នូរ គុណធម៌ ភាពសុច្ចរិត ប្រសិទ្ធភាព មានវិន័យការងារ និងអកប្បកិរិយាល្អ ក្នុងការប្រកបវិជ្ជាជីវៈឆ្មប ជាពិសេសគឺលើកកម្ពស់ គុណភាព និងប្រសិទ្ធភាពនៃការផ្តល់សេវាថែទាំក្នុងអំឡុងពេលមានគភ៌ ពេលសម្រាលកូន ក្រោយពេលសម្រាលកូន និងការអប់រំពិគ្រោះយោបល់ពីបញ្ហាសុខភាព ដើម្បីកាត់បន្ថយអត្រា មរណៈដល់កុមារ និងទារក ។
សេចក្តីព្រាងអនុក្រឹត្យ ស្តីពីក្រមសីលធម៌ឆ្មបមាន ០៧ ជំពូក និង ៣៨ មាត្រា ។
៤-បញ្ហាផ្សេងៗ
បន្ទាប់ពីអង្គប្រជុំពេញអង្គគណៈរដ្ឋមន្ត្រី និងអាជ្ញាធរដែនដីខេត្ត-រាជធានី កម្លាំង ប្រដាប់អាវុធដែលចូលរួមប្រជុំតាមរយៈវីដេអូខនហ្វឺរឺន ស្មឹងស្មាធគោរពព្រះវិញ្ញាណខ័ន្ធ ព្រះ បរមសព ព្រះមហាវីរក្សត្រ នរោត្តម សីហនុ ព្រះវរៈរាជបីតាជាតិ “ព្រះបរមរតនកោដ្ឋ” រួចមក សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍កោតសរសើរ និងថ្លែង អំណរគុណជូនចំពោះមន្ត្រីរាជការ កងកម្លាំងប្រដាប់អាវុធ ដែលបានចូលរួមសម្រេចភារកិច្ច របស់រាជរដ្ឋាភិបាលបានជោគជ័យក្នុងឆ្នាំ ២០១២ កន្លងមក និងបានជូនពរ សូមឲ្យមានសុខភាព ល្អ និងទទួលបានជោគជ័យក្នុងការងារ នាឆ្នាំ២០១៣ បន្តទៀត ។
សម្តេចតេជោនាយករដ្ឋមន្ត្រី បានណែនាំឲ្យក្រុមប្រឹក្សាកំណែទម្រង់រដ្ឋបាល និងក្រសួង សេដ្ឋកិច្ច និងហិរញ្ញវត្ថុ ពិភាក្សាកែសម្រួលតម្លើងបៀវត្សជូនមន្ត្រីរាជការដែលស្ថិតក្នុងក្រប ខ័ណ្ឌ “ឃ” ឲ្យបានខ្ពស់ជាងសព្វថ្ងៃ ដើម្បីកាត់បន្ថយគម្លាតជាមួយបៀវត្សមន្ត្រី រាជការក្នុងក្រប ខ័ណ្ឌ “ក” ឲ្យបានតិច ។
អង្គប្រជុំពេញអង្គគណៈរដ្ឋមន្ត្រី បានបិទសម័យប្រជុំនៅវេលាម៉ោង ១១ និង ៣០នាទី ។
រាជធានីភ្នំពេញ, ថ្ងៃទី ០៤ ខែ មករា ឆ្នាំ ២០១៣
.jpg)
.jpg)
