Khmer
English
Chinese
Frence
Vietnamese
Thaiកាមរីឆ្លាមដឹកឈើប្រណីតបោលលឿនបែកកង់មុខបុករះស្លាប់មនុស្ស៣នាក់
ដោយ ៖ ស៊ាង ឡាយ|ថ្ងៃទី 11 មករា 2013 ម៉ោង 13:06:17
ខេត្តក្រចេះ ៖ កាមារីឆ្លាមដឹកឈើប្រណីត១គ្រឿងបែកកង់មុខ បុករះពេញផ្លូវ បណ្តាលឲ្យអ្នកជិះម៉ូតូ២នាក់ស្លាប់ និងកន្លែងលក់ទំនិញក្បែរចិញ្ចើម ផ្លូវម្នាក់ទៀតបានស្លាប់ក្នុងថ្លុកឈាមនៅនឹងកន្លែងកើត ។ ហេតុការណ៍នេះបានកើតឡើងកាលពីវេលាម៉ោង៦និង១០នាទីល្ងាច ថ្ងៃទី១០ ខែមករា នៅលើកំណាត់ផ្លូវជាតិលេខ៧ ត្រង់ចំនុចភូមិក្បាលត្រាច ឃុំស្រែចារ ស្រុកស្នួលខេត្តក្រចេះ។
នគរបាលស្រុកស្នួលបានឲ្យដឹងថា គ្រោះថ្នាក់ចរាចរណ៏នេះ បង្កឡើងដោយរថយន្ត១គ្រឿងម៉ាកកាមារីឆ្លាម ពណ៌ក្រហម ពាក់ស្លាកលេខភ្នំពេញ2C-1961 បើកបរដោយឈ្មោះ ខាត់ ភាព ភេទប្រុសអាយុ៤២ឆ្នាំ រស់នៅភូមិក្បាលស្នួល ឃុំស្នួល ស្រុកស្នួល ហើយនៅក្នុងរថយន្តបង្កហេតុនេះមានផ្ទុកទៅដោយឈើប្រណីតប្រភេទធ្នង់ជាច្រើនដុំ។
នគរបាលចរាចរណ៍ស្រុកស្នួលបានឲ្យដឹងថា កាលពីវេលាកើតហេតុខាងលើរថយន្ត១គ្រឿងនេះបានបើកបរ ក្នុងល្បឿនលឿននិងបានបែកកង់មុខខាងឆ្វេង ក៏បានរេចង្កូតទៅបុកម៉តូ១គ្រឿងម៉ាកណេវ ពណ៌ក្រហម គ្មានស្លាកលេខ បើកបរក្នុងទិសដៅបញ្ច្រាសទិសគ្នា ចំពីមុខពេញ ទំហឹង បណ្តាល ឲ្យជនរងគ្រោះជាអ្នកជិះម៉ូតូពីរនាក់ មាន ១.ឈ្មោះ ហុង ត្រា អាយុ១៦ឆ្នាំ អ្នកឌុប និងទី២.ឈ្មោះ យ៉ាន ស្ងួន អាយុ១៩ឆ្នាំ ជនរងគ្រោះទាំងពីរនាក់មានទីលំនៅឃុំទន្លូង ស្រុកមេមត់ ខេត្តកំពង់ចាម បានស្លាប់ភ្លាមៗនៅនឹងកន្លែង ហើយរថយន្តក៏រេចង្កូតក្រឡាប់ ទៅបុកតូបលក់ចាប់ហួយនៅចិញ្ចើមផ្លូវ បណ្តាលឲ្យសង្កត់លើបុរសម្នាក់ឈ្មោះ ឆាយ ឈួន អាយុ៦០ឆ្នាំ ជាម្ចាស់ មានទីលំនៅកន្លែងកើតហេតុ បណ្តាលឲ្យស្លាប់បាត់បង់ជីវិត ភ្លាមៗនៅក្នុងថ្លុកឈាមយ៉ាងអណោចអធម ។
ដោយឡែកអ្នកបើកបររថយន្តបង្កហេតុ ដែលបានបុករះបណ្តាលឲ្យមានមនុស្សចំនួនបីនាក់ ស្លាប់បន្តបន្ទាប់គ្នានោះ ក៏ត្រូវរងរបួសធ្ងន់ដោយ ឈើកៀបបុកជាប់ក្នុងរថយន្ត និងត្រូវនាំទៅសង្គ្រោះបន្ទាន់នៅមន្ទីរពេទ្យនៅប្រទេសវៀតណាម។
ប្រភពព័ត៌មានបានឲ្យដឹងថា រថយន្តមួយគ្រឿងនេះ បានដឹកឈើប្រណីតប្រភេទ ធ្នង់ចេញតំបន់ភ្នំព្រិច ក្នុងឃុំស្វាយជ្រះ ស្រុកស្នួល ដឹកយកឆ្ពោះទៅលក់នៅវៀតណាម តាមស្រុកមេមត់ ខេត្តកំពង់ចាម ។
កន្លងមកគេសង្កេតឃើញមានរថយន្តដឹកឈើជាច្រើនគ្រឿងតែងតែបង្ករគ្រោះថ្នាក់ដល់បងប្អូនអ្នកធ្វើដំណើរទៅមកតាមដងផ្លូវជាញឹកញាប់។
ក្រោយពីកើតហេតុកម្លាំងជំនាញបានចុះទៅពិនិត្យ មើលដល់ទីតាំងកើតហេតុ និងបាននាំទាំងរថយន្ត និងម៉ូតូ មករក្សាទុកបណ្តោះអាសន្ន នៅអធិការនគរបាលស្រុកស្នួល ដើម្បីកសាងសំណុំរឿងទៅតាមច្បាប់ ៕
