Khmer
English
Chinese
Frence
Vietnamese
Thaiឡានដឹកឈើប្រភេទលេខ១ត្រូវបានបង្ក្រាបដោយមេព្រៃនិងអាវុធហត្ថស្រុកភ្នំស្រួច
ដោយ ៖ វិចិត្រា|ថ្ងៃទី 12 មករា 2013 ម៉ោង 10:00:59
ខេត្ដកំពង់ស្ពឺ ៖ រថយន្ដទួរីស១គ្រឿងដែលផ្ទុក ឈើប្រណីតជាច្រើនដុំ ត្រូវបានកម្លាំងមន្ដ្រី ជំនាញស្ទាក់ចាប់បាន ខណៈដែលជនឆក់ឱកាសកំពុងព្យាយាមបើករថយន្ដគេចពីសមត្ថកិច្ច ។ កាស្ទាក់ឃាត់បានឡានដឹកឈើនេះកាលពី វេលាម៉ោង១០ព្រឹក ថ្ងៃទី១១ ខែមករា ឆ្នាំ២០១៣ នៅចំណុចខាងកើតបន្ទាយទាហានស្រែខ្លុង ស្ថិតក្នុងឃុំអូរ ស្រុកភ្នំស្រួច ខេត្ដកំពង់ស្ពឺ ។
ប្រភពពីសមត្ថកិច្ចបានឱ្យដឹងថា ដោយទទួលព័ត៌មានពីបណ្តាញសម្ងាត់ថា មានឈ្មួញលួចបង្កប់ឈើពីក្រោមកៅអីអង្គុយ ធ្វើដំណើរពីខេត្តកោះកុងចូលមកកាន់ទឹកដីខេត្តកំពង់ស្ពឺ ឆ្ពោះចូលទីក្រុងភ្នំពេញ ។ ម្យ៉ាងដោយមានការសង្ស័យរថយន្ដខាងលើ មន្ដ្រីជំនាញ មន្ដ្រីផ្នែក និងមន្ដ្រីសង្កាត់រដ្ឋបាលព្រៃឈើគីរីវ័ន្ត សហកាជាមួយកម្លាំងកងរាជអាវុធហត្ថស្រុកភ្នំស្រួច នៅលើផ្លូវជាតិលេខ៤ ក៏បានប្រទះឃើញរថយន្តពាក់ស្លាក លេខភ្នំពេញ 2U-4101 នៅចំណុចឃុំអូរ ស្រុកភ្នំស្រួច ខេត្ដកំពង់ស្ពឺ ខណៈដែលរថយន្ដនេះព្យាយាមបើករត់គេចពីការដេញចាប់យ៉ាងប្រកិតរបស់សមត្ថកិច្ច ។ ក្រោយពេលឃាត់បានម្ចាស់រថយន្តពុំបានគេចខ្លួនទៅណានោះទេ ដោយបានយល់ព្រមឲ្យជំនាញធ្វើការតាមច្បាប់ ស្តីពីព្រៃឈើ ។
ប្រភពដដែលបានបន្ដថា ក្រោយដកហូតវត្ថុតាងយកមករក្សាទុកនៅសង្កាត់រដ្ឋបាលព្រៃឈើគីរីវន្តរួចមក សមត្ថកិច្ចបានពិនិត្យឃើញថា ក្នុងរថយន្ដមានផ្ទុកដោយឈើប្រភេទលេខ១ចំនួន១២ដុំ ប្រវែង២ម៉ែត្រ មុខកាត់៨ហ៊ុន ពេលនេះជំនាញកំពុងចាត់ការតាមនីតិវិធី។
សូមបញ្ជាក់ថា ដើមឆ្នាំ២០១៣នេះ ផ្នែករដ្ឋបាលព្រៃឈើបរសេដ្ឋ សហការជាមួយសង្កាត់រដ្ឋបាលព្រៃឈើគីរីវ័ន្ត បង្ក្រាបបានបទល្មើសព្រៃឈើបានជាបន្តបន្ទាប់ ខណៈពេលដែលឈ្មួ្មញមានបំណងដឹកយកទៅលក់នៅឯភ្នំពេញ ៕
.jpg)
