Khmer
English
Chinese
Frence
Vietnamese
Thai
យីឡាក់ អរគុណសម្ដេចតេជោដែលដោះលែងទណ្ឌិតថៃ
ដោយ ៖ ហេង សូរិយា ថ្ងៃទី 12 មករា 2013ម៉ោង 10:22:45
ភ្នំពេញ ៖ គេហទំព័រ The Nation របស់ប្រទេសថៃដែលបានចេញផ្សាយ នៅថ្ងៃទី១១ ខែមករានេះបានឱ្យដឹងថា លោកស្រីយីងឡាក់ ស៊ីណាវ៉ាត្រា នាយករដ្ឋមន្ដ្រីថៃបានថ្លែងអំណរអរគុណក្នុងនាមឱ្យប្រជាជនថៃ ចំពោះរាជរដ្ឋាភិបាលកម្ពុជាដែលបានយល់ព្រមលើកលែង ទោសដល់ស្ដ្រីអ្នកទោសថៃ រ៉ាត់ទ្រី ផៃប៉ូ តាណាផៃប៊ូន និងអ្នកទោសបុរសថៃ វីរ៉ា ស៊ុមខ្វាមឃីដ ដែលនឹងត្រូវបន្ធូរបន្ថយ ទោសដើម្បីអាចឈានទៅការលើកលែងទោសនាពេលខាងមុខ ។
លោកស្រី យីងឡាក់ បានបន្ថែមថា រដ្ឋាភិបាលថៃនឹងបន្ដជាសម្ព័ន្ធមិត្ដដ៏ល្អ ជាមួយរដ្ឋាភិបាលកម្ពុជា ។ ក្នុងនោះដែល លោកស្រីនាយករដ្ឋមន្ដ្រីថៃបានបញ្ជាក់ថា មកទល់ពេលនេះរដ្ឋាភិបាលរបស់ លោកស្រីបានជូនដំណឹងដល់សាច់ញាតិ អ្នកទោសថៃ២នាក់នោះរួចរាល់ហើយ ។
រដ្ឋមន្ដ្រីក្រសួងយុត្ដិធម៌លោក អង្គ វង្សវឌ្ឍានា និងជាប្រធានគណៈកម្មាធិការ ជាតិបន្ធូរបន្ថយទោសបានមានប្រសាសន៍ថា ទណ្ឌិតថៃម្នាក់ជាស្ដ្រីឈ្មោះ រ៉ាត់ទ្រី ផៃប៉ូតាណាផៃប៊ូន (Ratree Paiputana paiboon) នឹងត្រូវបានដោះលែងឱ្យមានសេរីភាពជាស្ថាពរនៅថ្ងៃទី១ ខែកុម្ភៈ ឆ្នាំ២០១៣ខាងមុខនេះ ។
ចំណែកឯទណ្ឌិតថៃម្នាក់ទៀតជាបុរស ឈ្មោះ វីរ៉ា ស៊ុមក្វាមឃីត (Veera Somkwamkid) មិនត្រូវបានដោះលែង ឱ្យមានសេរីភាពទេ ប៉ុន្ដែត្រូវបានបន្ធូរ បន្ថយទោស៦ខែក្នុងចំណោមទោសសរុប ៨ឆ្នាំ ។
លោក អង្គ វង្សវឌ្ឍានា បានមាន ប្រសាសន៍ប្រាប់អ្នកកាសែតថា ការដោះលែង និងការបន្ធូរបន្ថយទោសនេះ គឺតាមអនុសាសន៍របស់ប្រមុខរដ្ឋាភិបាល កម្ពុជា ។ លោកថ្លែងយ៉ាងនេះថា “អាហ្នឹង គឺថាសម្ដេចតេជោលោកសុំឱ្យដោះ លែងទៅនៅថ្ងៃទី១ ខែកុម្ភៈ បើនិយាយ ឱ្យចំទៅព្រះរាជពិធីគឺចាប់ពីថ្ងៃទី១ ខែកុម្ភៈ ។ នៅថ្ងៃទី៤ហ្នឹងជាថ្ងៃបូជា ប៉ុន្ដែព្រះរាជពិធីរំកិលព្រះបរមសពចាប់ពីថ្ងៃទី១ហើយ” ។
ព្រះមហាក្សត្រខ្មែរ ព្រះបាទសម្ដេចព្រះបរមនាថ នរោត្ដម សីហមុនី នឹង ឡាយព្រះហស្ដលេខាលើសំណើរបស់ សម្ដេចតេជោ ហ៊ុន សែន នាយករដ្ឋ មន្ដ្រីខាងមុខនេះ ។
លោក វីរ៉ា ស៊ុមខ្វាមឃីត ត្រូវបាន សាលាដំបូងក្រុងភ្នំពេញបានកាត់ទោសកាលពីថ្ងៃទី១ ខែកុម្ភៈ ឆ្នាំ២០១១កន្លង ទៅនេះក្រោមបទចូលទីលានយោធា កម្ពុជាខុសច្បាប់ក្នុងបំណងទុច្ចរិត និង បទប្រមូលព័ត៌មានសំងាត់ប៉ះពាល់ដល់សន្ដិសុខជាតិកម្ពុជា ។ រីឯអ្នកស្រី រ៉ាត់ទ្រី ផៃប៉ូតាណាផៃប៊ូន ត្រូវបានសាលាដំបូង ក្រុងភ្នំពេញបានកាត់ទោសឱ្យជាប់គុក ក្រោមបទចោទដូចគ្នា ៕
.jpg)
